1 Tawarika 12 - Wunta Mempori

Mia anu tumondao i Daudi i Sikalagi

¹ Ndiomo luwuno mia anu ntepo'asa saru i Daudi i Sikalagi, tempono ipeliahako inso i arono i Saulu anano i Kisi. Ondae mbo'u ntewinso luwuno sorodadu anu mpokowalio a laro mpeteaa.

² Ondaemo luwuno puu mpompana anu polio mompekembiako watu ka mompotola ana mpana inso a wo'eno mekae ngkoana ke manggali. Ondae andio pe'etuno i Saulu, inso a nsuku Benami:

³ i Abieseri, petewawano, ka i Yoasi, luwuno anano i Semaa, to Gibea; i Yesieli ka i Peleti, luwuno anano i Asamaweti; i Beraka ka i Yehu, to Anatoti;

⁴ i Yisimaia, to Gibeoni, asa sorodadu i olodo mia tolu pulu atuu, anu gagi petewawado tolu pulu mia; i Yeremia, i Yehasieli, i Yohanani ka i Yosabadi, to Gedera;

⁵ i Elusai, i Yerimoti, i Bealia, i Semaria ka i Sepatia, to Harupi;

⁶ i Elikana, i Yisia, i Asare'eli, i Yoeseri ka i Yasobami, luwuno to Korahi;

⁷ i Yoela, i Sebadia, anano i Yerohami inso i Gedori.

⁸ Inso a nto Gadi mbo'u hinao anu meponsia, melimba ndi Daudi a benteno i pada one. Ondae luwuno sorodadu anu moroso ka mosia, luwuno mia anu polio metea, pande mpopake kanta ka kansai. Rupado kana singa ka magasido kana lagiwa i wawo mentorukuno.

⁹ I Eseri, petewawano, i Obaja, mia ko'orua; i Eliabi, mia ko'otolu;

¹⁰ i Misamana, mia ko'opaa; i Yeremia, mia ko'olima;

¹¹ i Atai, mia ko'onoo; i Elieli, mia ko'opitu;

¹² i Yohanani, mia ko'oalu; i Elisabadi, mia ko'osio;

¹³ i Yeremia, mia kohopulu; i Makabanai, mia kohopulu ka asa.

¹⁴ Onaemo atuu luwuno mia inso ia inuleno i Gadi, anu gagi luwu petewawa sorodadu; asa mia anu lalu kodei pototono asa etu mia ka anu lalu langkai pototono asa nsowu mia.

¹⁵ Ondaemo atuu anu mensakio koro Yarade a wula amba-ambano, maupo korono atuu moowo. Ondaemo anu sumaari ira luwuno palilino lembono i sabaano oleo ka i sumooano oleo.

¹⁶ Asa ntia inso a inuleno i Benami ka i Yehuda me'aiwa ndi Daudi a bente atuu.

¹⁷ I Daudi meluarako tepohaweako ira ka motae, ”Tewala aiwamiu ndi ongkue saru tinoo manangai komiu mpokowali aku, aku koa me'asa aroaakomiu. Sine, tewala tinoomiu komiu mpe'akala mpeweengako aku a iwaliku, kahinaano nahi kupoweweu anu mosa'o, po'ineeomo Ondae Ue Alado uempu'uto kumitao atuu ka humuku komiu.”

¹⁸ Ka i'amba Penaa-Do i Ue pabawaio i Amasai, petewawado mia tolu pulu atuu, ipotae, Omami andio mpe'alaako ndi omue, hei Daudi, ka mperonga saru omue, hei anano i Isai! Manangaia, manangaia ka manangaia tia-Do anu tumulungiko, hangano Ondae Ue Alamu, Ondaemo anu tumulungiko! Ka i'amba i Daudi tumarima ira ka motoro ira gagi tadulako sorodadu.

¹⁹ Inso ndi Manase mbo'u hinao anu melimba ndi Daudi, tempono iperongaako ira to Pelisiti mpetea umewaio i Saulu. Bakanaano komba itulungi ira, hangano onae tinena lumako mansano luwuno mokole kotado to Pelisiti memputusio, dompotae, ”Tewala onae melimba ndi Saulu, ueno, ta mansa tetadi uluto.”

²⁰ A laro pelempaano lumako i Sikalagi, ba'opia mia inso a nsuku Manase mpelimba ndi onae: i Adanahi, i Yosabadi, i Yediaeli, i Mikaeli, i Yosabadi, i Elihu ka i Seletai, saru luwuno petewawa sorodadu asa nsowu suku Manase.

²¹ Ondae mpokowalio i Daudi mpo'ewai gerombola, hangano ondae luwuno sorodadu anu moroso ntu'u ka luwuno petewawa sorodadu.

²² Mingki sompo oleo mia mehawe mpokowalio i Daudi, ranta ondae megagi bawaano sorodadu anu langkai, kana sorodadu-Do Ue Ala.

I Daudi pinotoro gagi mokole i Heberoni

²³ Ndiomo porokono sorodadu anu tetinda ira mpetea, anu me'aiwa ndi Daudi i Heberoni ira mempaheo pentoroano mokole inso ndi Saulu melimba ndi Daudi, menunu saru petena-Do i Ue.

²⁴ Inuleno i Yehuda anu montande kanta ka kansai, porokono nomo nsowu ka halu etu mia anu tetinda ira mpetea.

²⁵ Inso a inuleno i Simeo luwuno sorodadu anu moroso ntu'u ira mpetea, porokono pitu nsowu ka asa etu mia.

²⁶ Inso a inuleno i Lewi, hinao pato nsowu ka nomo etu mia,

²⁷ tiniangiako i Yoyada, petewawado sukuno i Haruni ka meronga onae, hinao tolu nsowu ka pitu etu mia,

²⁸ saru i Sadoki, asa sorodadu mongura anu moroso ka mosia saru rua pulu ka orua mia petewawado pe'etuno.

²⁹ Inso a inuleno i Benami, luwuno pepaekompono i Saulu, hinao tolu nsowu mia. Hawe tempo atuu hadio inso ndi ondae da kongkodo mpetenunu a nsomborino i Saulu.

³⁰ Inso a inuleno i Eparai, hinao rua pulu nsowu ka halu etu mia sorodadu anu moroso ka mosia, luwuno mia tenee i olodo anu pepe'etu.

³¹ Inso a nsuku Manase anu entonga atuu, hinao hopulu ka oalu nsowu mia anu neeno teburi kai petonda motoroo i Daudi gagi mokole.

³² Inso a inuleno i Isakari, luwuno mia anu pande mobasa tempo anu kona, ranta ka domento'orio hapa anu asalakono domeweweuo to Isaraeli, porokodo rua etu petewawa saru luwuno pepaekompo pe'asa sukuno anu i totono parentado.

³³ Inso ndi Sebulo, luwuno mia anu polio metea anu pinoweeako mperupa-rupa parewa mpetea, porokono lima pulu nsowu mia. Mpepatinda ira mpopokowali saru nahi mesampa aroa.

³⁴ Inso ndi Napatali hinao asa nsowu mia petewawa meronga saru tolu pulu ka opitu nsowu mia anu mowawa kanta ka kansai.

³⁵ Inso a nsuku Dani, luwuno mia anu tetinda ira mpetea, porokono rua pulu ka oalu nsowu ka nomo etu mia.

³⁶ Inso ndi Asieri, luwuno mia anu polio ka tetinda ira mpetea, porokono pato pulu nsowu mia.

³⁷ Inso i asatowano koro Yarade, inso i olodo to Rube, to Gadi ka entongano suku Manase anu susua, luwuno mia anu mpowawa mperupa-rupa parewa mpetea, porokono asa etu rua pulu nsowu mia.

³⁸ Luwuno atuu onaemo sorodadu, mia anu tetinda mpopokowali a laro baresi mpeteaa. Ondae me'aiwa i Heberoni moleo aroado ira mpotoroo i Daudi gagi mokole a luwuno Isaraeli, luwuno mbo'u to Isaraeli anu susua, bobotoli aroado ira mpotoroo i Daudi gagi mokole.

³⁹ Mpo'ia ira i ra'ai saru i Daudi i larono otolu oleo, mpongkaa ka mpo'inu mperonga, hangano luwuno pepaekompodo mpopatindaako ira kaanga.

⁴⁰ Luwuno mia anu mpo'ia umpeda ndi ondae, ka inso ndi Isakari, i Sebulo ka i Napatali, mpowawa ira mbo'u kaanga anu pinateke a ngkalide, unta, bagali ka sapi. Kaanga atuu hadio ntu'u, onaemo tarigu, sanggara ara ka sanggara kisimisi, anggoro ka lana, sapi ka asa bawaa bembe bimba. Mentee ntu'u hinao mawongkoa i Isaraeli.