1 Tawarika 11 - Wunta Mempori

I Daudi gagi mokoledo to Isaraeli

¹ Luwuno to Isaraeli mpepumpu mpe'aro ndi Daudi i Heberoni ka dompotae, ”Omami mpe'asa rea ka ihi saru omiu.

² Mompu'u i ndi'ipua tempono da moparenta i Saulu, omiumo anu metewawa a luwuno peleludo sorodadu to Isaraeli. Ondae i Ue, Ue Alamiu mepau Iramo ndi omiu, Omuemo anu ta pakambi ira bawaa-Ku Isaraeli, ka omuemo anu ta gagi petewawado bawaa-Ku Isaraeli.”

³ Ka i'amba me'aiwa iramo luwuno mia memota'u Isaraeli mpe'aro ndi ondae mokole i Heberoni. Ka i'amba i Daudi moweweu pedandia saru ondae i Heberoni i aro-Do i Ue. Dome'urapio i Daudi gagi mokoledo to Isaraeli, kana anu pinau-Do i Ue telalo i Semueli.

I Daudi mongko'alao Yerusale ka rodo i ra'ai

⁴ I Daudi meronga luwuno to Isaraeli melako i Yerusale; onaemo i Yebusi. I ra'aimo dompo'ia to Yebusi, palilino wita atuu.

⁵ Palilino Yebusi mpotae ira ndi Daudi, ”Nahi kopolio mewinso i ndi'ai!” Sine i Daudi mongko'alao bente pekorahakoa Sioni, onaemo kota Daudi kanandio-andio.

⁶ Se'eluno motae i Daudi, ”Isema anu tese'elu numangi ira to Yebusi, onae ta gagi petewawa.” Ka i'amba i Yoabi anano i Seruya tese'elu monsapoi, onaemo ka igagi petewawado sorodadu.

⁷ Ka i'amba i Daudi rodo a bente pekorahakoa atuu, onaemo pu'uno mia meneeakono kota Daudi.

⁸ Limbu kota atuu ipokomorosoo, mompu'u inso i Milo lumimbuo luwuno, sekono i Yoabi wali wanguo toreano inso a ngkota atuu.

⁹ Kopaba-pabawano i Daudi, hangano Ondae i Ue, Ue Alano luwuakoano kumongkomio.

Puu mpeteano i Daudi

¹⁰ Ndiomo luwuno tadulako i olodo luwuno sorodaduno i Daudi, anu moroso mokowalio meronga luwuno to Isaraeli, ka ipohawe potoro mokole ka mpotoroo gagi mokole, kana anu pinau-Do i Ue mongkona Isaraeli.

¹¹ Ndiomo burino luwuno sorodaduno i Daudi: i Yasobami anano i Hakemoni, petewawado Otolu Mia Mosia. Onaemo anu umioo kansai mompepate tolu etu mia i larono asa mpeteaa.

¹² Umarino onae, i Eleasari anano i Dodo, to Ahohi atuu; onae asa mia inso a Otolu Mia Mosia atuu.

¹³ Onae kongko merongaakono i Daudi i Pasi-Damimi, tempono to Pelisiti mpepumpu i ra'ai ira mpetea. Hinao asa mpo'ianga wita lere buke gandu jelai i ra'ai. Tempono dompolai sorodadu inso i arodo to Pelisiti,

¹⁴ mpo'ala ira po'ianga i tonga-tongano lere atuu. Dompokokorahakono ka menangi ira to pelisiti. Kanatuumo Dopoweeako ira i Ue ponangia anu langkai.

¹⁵ Otolu mia inso a tolu pulu petewawa hori ira me'aiwa a ntorukuno watu tepohaweakono i Daudi umpeda kunepo Adulami, kontongaano sorodadudo to Pelisiti mpekema i lembono Repaimi.

¹⁶ I tempo atuu i Daudi kongko a laro bente torukuno ka sorodadu mpodagaido to Pelisiti mekongko i Beteleme a tempo anu mengkena.

¹⁷ I Daudi pauo po'eheno, ipotae, ”Ba mansa hinao mia anu mowee aku mo'inu uwoi inso a nsumuru Beteleme umpeda a mpewowa langkai!”

¹⁸ Ka i'amba otolu mia atuu mansa mpewinso a mpekemaado to Pelisiti. Mpotambu ira uwoi inso a nsumuru Beteleme umpeda pewowa langkai, mentandeo ka mewawao ndi Daudi. Sine i Daudi nahi behe uminuo, tendeano ipesombaakono gagi pesomba tinawa ndi Ondae i Ue,

¹⁹ ka i'amba motae, ”Nahi aku ntu'u weweuo, oo Ue Ala! Nde tekonake ku'inuo rea ta'ono penaado mia andiodo? Hangano monta'o penaa, domewawao.” Gagi nahi behe uminuo. Onaemo anu wineweudo otolu mia puu mpetea atuu.

²⁰ I Abisai, uaino i Yoabi, onaemo petewawadotolu pulu mia atuu. Onaemo anu umioo kansai mepate ira tolu etu mia. Onae tenee i olodo mia tolu pulu atuu.

²¹ I olodo mia tolu pulu atuu, onae lalu pinelangkai. Lano onae gagi petewawado, sine nahi pengkenaako ira Otolu Mia Mosia atuu.

²² Umarino atuu i Benaya anano i Yoyada inso i Kabeseeli, asa mia anu moroso ntu'u langkai wineweuno anu moiko. Onae mompepate orua sorodadu, singa inso i Moabi. Onae horio metii a laro aa ka mepateo asa singa, i asa oleo seru baku.

²³ Ipepateo mbo'u asa to Masiri anu ondauno olima hiku. A ngkaeno to masiri atuu hinao kansai kana keu pongkalulu sawu hinoru. Sine onae i'aropiakono tuko, rumontuo kansai inso a ngkaeno to Masiri atuu, ka i'amba mepateakono kansaino onaeno.

²⁴ Onaemo anu wineweuno i Benaya anano i Yoyada; onae telele neeno i olodo mia tolu pulu puu mpetea atuu.

²⁵ Onae lalu pinelangkai i olodo tolu pulu mia atuu, sine nahi pengkenaako ira Otolu Mia Mosia. I Daudi motoroo gagi petewawado puu mpodagaino.

²⁶ Luwuno puu mpetea susuano anu moroso ntu'u: i Asaeli, pepaekompono i Yoabi; i Elihanani anano i Dodo inso i Beteleme.

²⁷ I Samoti, to Harodi; i Helesi, to Peloni;

²⁸ i Ira anano i Ikesi to Tekoa; i Abieseri to Anatoti;

²⁹ i Sibikai, to Husa; i Ilai, to Ahohi;

³⁰ i Maharai, to Netopa; i Heledi anano i Ba'ana, to Netopa;

³¹ i Itai anano i Ribai inso i Gibea i witano i Benami; i Benaya, to Piratoni;

³² i Hurai inso i Nahale-Gaasi; i Abieli, to Beti-Araba;

³³ i Asamaweti, to Bahurimi; i Eliahaba, to Saaliboni;

³⁴ i Hasiemi to Gisoni; i Yonata anano i Sage, to Harari;

³⁵ i Ahiami anano i Sakari, to Harari; i Elipali anano i Uri;

³⁶ i Heperi, to Mekerati; i Ahia, to Peloni;

³⁷ i Hesero, to Karameli; i Naarai anano i Esibai;

³⁸ i Yoeli, pepaekompono i Natani; i Mibahari anano i Hagari;

³⁹ i Seleki, to Amoni; i Naharai, to Beeroti, puu mpowawa parewa peteano i Yoabi, anano i Seruya;

⁴⁰ i Ira, to Yeteri; i Garebi, to Yeteri;

⁴¹ i Uria, to Heti; i Sabadi anano i Ahalai;

⁴² i Adina anano i Sisa, to Rube, petewawado to Rube ka tolu pulu mia saru onae;

⁴³ i Hanani anano i Ma'aka; i Yosapa, to Metini;

⁴⁴ i Usia, to Asitaro; i Sama ka i Yeieli, luwuno anano i Hotami, to Aro'eri;

⁴⁵ i Yediaeli anano i Simiri ka i Yoha pepaekompono, to Tisi;

⁴⁶ i Elieli, to Mahawimi; i Yeribai ka i Yosawia, luwuno anano i Elanaami; i Yitima, to Moabi;

⁴⁷ i Elieli, i Obedi ka i Yaasieli, to Mesobaia.