1 Tawarika 10 - Wunta Mempori

Mateno i Saulu

¹ I tempono to Pelisiti mpetea umewai ira to Isaraeli, to Isaraeli mpolai inso i arodo to Pelisiti ka hadio anu mempinepate matumbole i mentorukuno Giliboa.

² To Pelisiti meluluo mpiha i Saulu ka luwuno anano. Dompepateo i Yonata, i Aminada ka i Malikisua, luwuno anano i Saulu.

³ Peteaa atuu tedoa ipemobeao i Saulu. Domehaweo anu mpepana ka domebelaio.

⁴ Motae i Saulu a puu mpowawano parewa mpetea, ”Butaomo ponaimu ka tobo akumo, kasi mansa mia anu nahi dompetindi andio mpemae-maeakune.” Sine puu mpowawano parewa mpetea nahi behe, hangano onae tedoa doito. Ka i'amba i Saulu umalao ponai atuu ka ipebangkuako i wawono.

⁵ Kumitao i Saulu mateomo, puu mpowawa parewa mpeteano mbo'u mebangkuako i wawono ponai ka imate.

⁶ Kanandiomo i Saulu, otolu ira anano memate ka luwuno somborino mate mperonga-ronga.

⁷ Kumitao sorodadudo to Isaraeli mpolai iramo ka i Saulu saru luwuno anano memate iramo, luwuno to Isaraeli anu i lembono mebintao luwuno kotado ka dompolai mbo'u. Ka do'amba to Pelisiti me'aiwa ka merodo i ra'ai.

⁸ Tisomono tempono dome'aiwa to Pelisiti lumolohi ira mia anu mempinepate atuu, domehaweo i Saulu ka luwuno anano ntepombole i mentorukuno Giliboa.

⁹ Domelolohio i Saulu ka me'alao uluno saru luwuno sangka mpeteano. Ka do'amba mpotena mia a luwuno siuno wita Pelisiti ka dompohaweo lele atuu a luwuno lahumoado ka a mpalili.

¹⁰ Ka do'amba menaao luwuno parewa mpeteano i Saulu a raha mpopesombaia luwuno pinesombaido ka mendoeo taku uluno i rahano Dagoni.

¹¹ Mansado to Yabe-Gileadi merongeo mongkona luwuno anu domeweweuomo to Pelisiti ndi Saulu,

¹² melako iramo luwuno mia moroso ntu'u me'alao wata ngkoroino i Saulu ka wata ngkoroido luwuno anano. Domewawao i Yabesi ka mengkaburuo luwuno wukudo i totono keu tarabanti, i Yabesi. Umarino atuu mempuasa ira i larono opitu oleo.

¹³ Kanandiomo mateno i Saulu, hangano nahi petenunu ndi Ondae i Ue, hangano nahi tondao pau-Do i Ue ka mesikeno mbo'u mo'ema pontiso a onituno mia mate,

¹⁴ ka nahi po'ema pontiso-Do i Ue. Onaemo pu'uno ka Dopepateo i Ue ka meweengakono potorono mokole ndi Daudi anano i Isai.