1 Samueli 8 - Wunta Mempori

To Isaraeli mpo'ema mokole

¹ Mansano mota'uomo i Semueli, ipotoro ira anano anu tama gagi puu mpobitara a nto Isaraeli.

² Neeno anano anu aka i Yoeli ka anano anu ko'orua i Abia. Orua ira moparenta gagi puu mpobitara i Bereseba.

³ Sine orua ira anano atuu nahi dotondao peleluno amado. Montarima ira pompowee anu nahi moleo ka dowoliliki ira kara-kara, anu sala pinokomentee ka anu mentee pinokonsala.

⁴ Onaemo pu'uno luwuno mia mota'u to Isaraeli mpepumpu ka dome'aiwa ndi Semueli i Rama.

⁵ Dompotae ndi onae, ”Omiu mota'u komiumo, ka orua ira anamiu nahi dotondao pelelumiu. Gagi, ipompotoroa kami asa mokole anu moparenta ndi omami, kana luwuno tongku susua.”

⁶ Sine masusa aroano i Semueli rumongeo po'emado, ”Ipoweeakami asa mokole anu moparenta ndi omami.” Onaemo ka ipekakai i Semueli ndi Ondae i Ue.

⁷ Pau-Do i Ue ndi Semueli, ”Tondaako ira po'ehedo palili luwuno anu domempauakomu. Komba omue anu nahi domentarimako, sine Ongkue kasi Kugagi mbo'u mokoledo.

⁸ Dompebungkui Aku ka dompesomba a anu pinesombai susua, mompu'u Kutaate ira mpeluarako inso i wita Masiri ranta hawe kanandio-andio. Kana'umpe domeweweu Aku kanatuumo domeweweuko.

⁹ Onaemo ka utondaako ira nineedo. Sine pauako ira temanasa ntu'u pabawano mokole anu ta moparenta ndi ondae.”

¹⁰ Luwuno pinau-Do i Ue, ipauako ira i Semueli a mpalili anu mpo'ema asa mokole ndi onae,

¹¹ ipotae, ”Andio pabawano mokole anu ta moparenta ndi omiu. Onae ta umala ira anamiu anu tama gagi sorodadu a ngkareta mpe'iwali, sorodadu mpengara, ke anu mpelulu i arono karetano.

¹² Onae ta tumena ira gagi petewawa asa nsowu sorodadu ka petewawa lima pulu sorodadu. Ondae ira mpopadeko lereno ka mensowiakono. Ondae ira mpoweweu sangka mpetea ka sangka mpetea a ngkaretano.

¹³ Onae ta umala ira anamiu beine gagi puu mpoweweu mina-mina, puu mponahu, ka puu mpoweweu roti.

¹⁴ Onae ta umalao wua pinopaho anu lalu moiko i leremiu, i lere anggoromiu ka i lere saitumiu, ta mewineeako luwuno pegawaino.

¹⁵ Onae ta umalao tia hopuluno inso a gandumiu, wuano anggoro i leremiu, ira mewineeako pegawai a langkanae ka pegawai anu susua.

¹⁶ Onae ta umalao atamiu tama ka beine, pinotuwumiu anu lalu moiko ka kalidemiu, ta pinake mo'angga anggaano.

¹⁷ Onae ta umalao tia hopuluno bembe bimbamiu. Ka omiu ta gagi atano.

¹⁸ I tempo atuu komiu mperaipi hangano mokole anu bininikimiu atuu, sine i tempo atuu Ondae i Ue nahi Ira sumangki komiu.”

¹⁹ Sine nahi domperorongeakono palili pinauno i Semueli ka dompotae, ”Naahi, asalakono kai hina mokole ndi omami,

²⁰ omami mbo'u inehe mami kana luwuno tongku susua. Mokole mami ta parenta kami, petewawa mami ka lumako metea saru omami.”

²¹ Iperorongeakono i Semueli luwuno pinaudo palili ka ipohaweo ndi Ondae i Ue.

²² Pau-Do i Ue ndi Semueli, ”Tondaako ira po'ehedo, ka potoroako ira asa mokole.” Ka i'amba i Semueli motaeako ira to Isaraeli, ”Imelakomo nte'o'asa mia mekule i kotano.”