1 Samueli 7 - Wunta Mempori

¹ Me'aiwa iramo to Kiriati-Yeari ka domewawao Burua Pedandia-Do i Ue. Domewawao i rahano i Abinada a pongkuno wita ka dompokomemporio i Eleasa anano, anu ta dumagaio Burua Pedandia-Do i Ue.

I Semueli moparenta gagi puu mpobitara

² Tehine ntu'u, rua pulu nta'umo burua pedandia atuu ipo'ia i Kiriati-Yeari. Luwudo to Isaraeli mpo'ema pompehohawa-Do i Ue.

³ Ka i'amba i Semueli motaeako ira luwudo to Isaraeli, ”Tewala komiu mpepokule ndi Ondae i Ue a bobotolino aroamiu, imeliahakono luwuno anu pinesombaido mia hawe ka i Asitore inso i olomiu ka impo'asao aroamiu ndi Ondae i Ue. Butu ndi Ondae pesombaamiu, ka Ondae i Ue Ira motolakomiu inso a ngkaedo to Pelisiti.”

⁴ Umarino atuu luwudo to Isaraeli mpetadiakono luwuno tinaha pelahumoa Baala ka Asitore ka dompesomba butu ndi Ondae i Ue.

⁵ Ka i'amba motae i Semueli, ”Pumpu ira luwudo to Isaraeli i Misipa. Aku mekakaiakomiu ndi Ondae i Ue.”

⁶ Mansado mpepumpu i Misipa, mpontambu ira uwoi ka dome'uwuo i aro-Do i Ue. I ra'ai mempuasa ira oleo atuu ka dompotae, ”Mentehala kamimo ndi Ondae i Ue.” Ka i Semueli moparenta gagi puu mpobitara a nto Isaraeli i Misipa.

⁷ Mansado merongeo to Pelisiti nine to Isaraeli mpepumpu iramo i Misipa, luwuno mokoledo to Pelisiti melako mpe'iwaliako ira to Isaraeli. Domerongeo to Isaraeli anu gagi atuu, ka medoito iramo a nto Pelisiti.

⁸ To Isaraeli mpotaeakono i Semueli, ”Si penaa-naa pekakaiakami ndi Ondae i Ue, Ue Alato, ka Dokadudui kita inso a ngkaedo to Pelisiti.”

⁹ Ka i'amba i Semueli mo'ala asa ana bimba anu da mo'uo ka ipesombaakono ndi Ondae i Ue gagi pesomba tinunu asa ngkoroi. I Semueli mekakaiako ira to Isaraeli ndi Ondae i Ue ka Dosangkio i Ue.

¹⁰ Kontongaano i Semueli mompesombaako pesomba tinunu atuu, mehawe iramo to Pelisiti mpeteaako ira to Isaraeli. Sine oleo atuu Ondae i Ue morundu i wawodo, unino tedoa mongkokongiri mepontu to Pelisiti ka Dosiarawo ira. Onae ka domentenangi a nto Isaraeli.

¹¹ To Isaraeli mpeluarako inso i Misipa, dolulu ka donangi ira to Pelisiti hawe lumaloo Beti-Kara.

¹² Ka i'amba i Semueli umalao asa watu ka i pontoroo i olono Misipa ka Yesana. Ineeakono Ebe-Haese, pengkonaano, ”Hawe i ndi'ai Dotulungi kita i Ue.”

¹³ Kanandiomo dontenangi to Pelisiti ka nami dompewinso mbo'u i witado to Isaraeli. Kae-Do i Ue umewai ira to Pelisiti asa ntinuwuno i Semueli.

¹⁴ Luwuno kota anu umari me'inalado to Pelisiti a nto Isaraeli, dowali mpe'ueo to Isaraeli, inso i Ekeroni hawe i Gati. Domempoko'alao mbo'u to Isaraeli wita i horino, inso a nto Pelisiti. To Isaraeli ka to Amori, mesintuwu iramo.

¹⁵ I Semueli moparenta gagi puu mpobitara a nto Isaraeli asa ntinuwuno.

¹⁶ Sompo-sompo ta'u onae lumako i Beteli, i Giliga, ka i Misipa, moparenta gagi puu mpobitara a nto Isaraeli a luwuno po'ianga atuu.

¹⁷ Umarino atuu ka i'amba mekule i Rama, hangano i ra'ai rahano. Inso i ra'ai ipoparenta gagi puu mpobitara a nto Isaraeli. I tu'ai, ipowangu meda pontunua pesomba ndi Ondae i Ue.