1 Samueli 5 - Wunta Mempori

Burua Pedandia-Do i Ue i wita Pelisiti

¹ Umarido to Pelisiti merontuo burua pedandia-Do Ue Ala, inso i Ebe-Haese domelako mewawao i Asidodi

² Dome'alao to Pelisiti burua pedandia-Do Ue Ala atuu ka domewawao i raha mpesombaa Dagoni. Domenaao i horino Dagoni.

³ Mansano tisomono mo'oru dompewangu mia i Asidodi, domengkitaomo Dagoni atuu tebangku, rupano a wita i arono Burua Pedandia-Do Ue Ala. Ka do'amba me'alao Dagoni atuu wali mempokuleo a mpo'iangano.

⁴ Sine tisomono, mansado mpewangu mo'oru, domengkitaomo Dagoni atuu tebangku, rupano a wita i arono Burua Pedandia-Do i Ue. Uluno ka orua pele ngkaeno Dagoni atuu tepudu ka tetadiako i arono pewowa. Butumo koa koroino anu da mo'ia.

⁵ Onaemo pu'uno luwuno sando mpesomba Dagoni ka luwuno mia anu mpewinsokio raha mpesombaa Dagoni, nahi dompelanda i arono pewowa raha mpesombaa Dagoni i Asidodi hawe oleo andio.

⁶ Kae-Do i Ue moweeako ira to Asidodi ka petengi-tengido pohuku anu tedoa mobea ka dompondidi-ndidi. Dopoweeako ira pohuku haki lowe a ngkoroido.

⁷ Kumitao anu kanatuu, mpotae ira to Asidodi, ”Burua Pedandia-Do Ue Alado to Isaraeli, nahi moiko ipo'ia ndi ontae, hangano kae-Do anu mokora umewai kita ka Dagoni anu pinesombaito.”

⁸ Onaemo ka dompontena mia a luwuno mokole i Pelisiti ka dompepumpu. Mpesikeno ira to Asidodi, ”Hapa anu kita meweweuo mongkona Burua Pedandia-Do Ue Alado to Isaraeli?” Mesangki ira mokole, ”Burua Pedandia-Do Ue Alado to Isaraeli asalakono ka ilinimba i Gati.” Ka do'amba melimbao Burua Pedandia-Do Ue Alado to Isaraeli atuu i ra'ai.

⁹ Sine mansado melimbao, kongkono koa mbo'u kae-Do i Ue mokontewuka ira ka tedoa lansara i kota atuu. Luwuno mia i kota atuu Dohukuako ira haki lowe anu hadio ndi ondae, mompu'u inso a nana'ote hawe a mia mota'u.

¹⁰ Ka do'amba mewawao Burua Pedandia-Do Ue Ala atuu i Ekeroni. Haweno Burua Pedandia-Do Ue Ala atuu i Ekeroni, mpebooli iramo to Ekeroni, ”Domelimbao Burua Pedandia-Do Ue Alado to Isaraeli ndi ontae, ira mpepate kita saru tongkuto.”

¹¹ Onaemo ka dompontena mia lumako pauako ira luwuno mokoledo to Pelisiti ka dompepumpu. Ka dompotae, ”Imewawao Burua Pedandia-Do Ue Alado to Isaraeli atuu mempokuleo a mpo'iangano, kasi tomemate saru tongkuto.” Gagiomo a luwuno kota atuu ntewukaako matea, hangano pohuku-Do i Ue tedoa mobea.

¹² Luwuno mia anu nahi mate, Dohukuako ira haki lowe hadio a ngkoroido ka peraipido i laro kota atuu hawe i langi.