1 Samueli 4 - Wunta Mempori

^1a Ka pinauno i Semueli hawe a luwudo to Isaraeli.

Burua Pedandia-Do i Ue rinontu

^1b To Isaraeli mpeluarako meteaako ira to Pelisiti ka mpekema i Ebe-Haese, ka to Pelisiti mpekema i Apeki.

² To Pelisiti mpo'atora baresido umaropi ira to Isaraeli. Peteaa tedoa langkai. To Isaraeli mentenangi a nto Pelisiti, anu memate a mpeteaa atuu bara'ura pato nsowu mia.

³ Mansado mpekule sorodadudo to Isaraeli a mpekemaado, mpotae iramo luwu mia mota'udo, ”Tembio Ondae i Ue ka Doweweu kita mentenangi a nto Pelisiti oleo andio? Aiwa ka tome'alao burua pedandia-Do i Ue inso i Silo ka Do'aiwa i Ue i oloto kumadudui kita inso a ngkaedo iwali.”

⁴ Ka do'amba tongku atuu mpontena mia lumako i Silo. Domentandeo inso i ra'ai burua pedandia-Do Ueno luwuakoano, anu po'ianga-Do iwawono kerubi. Orua ira anano i Eli, i Hopini ka i Pinehasi, rau ira i ra'ai umpeda a burua pedandia-Do Ue Ala

⁵ Haweno burua pedandia-Do i Ue a mpekemaa, mpebooli ira luwuno to Isaraeli, tedoa memawongko ranta rende wita.

⁶ Rumongeo peboolido atuu, mpotae ira to Pelisiti, ”Hapa dompebooliako tedoa meroku a mpekemaado to Ibarani atuu?” Mansado mento'orio to Pelisiti nine burua pedandia-Do i Ue haweomo a mpekemaado to Isaraeli,

⁷ medoito iramo hangano potaedo, ”Ondae Ue Ala hawe Iramo a mpekemaa atuu.” Mpotae ira, ”Memasola kitamo! Nahi hori hina gagi anu kanandio se'eluno.

⁸ Memasola kitamo! Isema ta polio motola kita inso a ngkae-Do Ue Ala anu mongkokongiri andio? Ondaemo andio Ue Ala anu humuku ira to Masiri mperupa-rupa pohuku i pada one.

⁹ Pokorosoo aroamiu ka imemosia, Oo to Pelisiti, kasi megagi atado to Ibarani, kana ondae hori ira megagi atamiu. Impokomosiao aroamiu ka impeteamo!”

¹⁰ Mpetea iramo to Pelisiti ka donangi ira to Isaraeli, sompo mia molai a ngkemano. Tenangido atuu tedoa langkai. Inso a nto Isaraeli anu mate, tolu pulu nsowu sorodadu anu mpelempa.

¹¹ Ka burua pedandia-Do Ue Ala rinontu ka orua ira anano i Eli mate.

¹² Asa mia inso a nto Benami molai inso a mpeteaa ka ihawe i Silo oleo koa atuu, sangkano teberi-beri ka mewita toro'uluno.

¹³ Mansano hawe, i Eli kontongaano mentoro a ngkadera mesisikori a wiwi nsala, hangano aroano mondende masusaakono burua pedandia-Do Ue Ala. Mia atuu aiwa i kota ta pauo lele atuu, onaemo ka dontewuka mpebooli ihino kota atuu.

¹⁴ Rumongeo peboolido atuu, mesikenoomo i Eli, ”Hapa dontewukaako atuu?” I tempono atuu hawe mia mompauakono lele i Eli.

¹⁵ Tinuwuno i Eli, sio pulu ka oalu nta'u. Matano morawuomo nami pongkita.

¹⁶ Motae mia atuu ndi Eli, ”Ongkuemo anu molai inso a mpeteaa dasarai kuhawe.” Mesikeno i Eli, ”Hapamo anu gagi, anaku?”

¹⁷ Sumangki anu mowawa lele atuu, ”To Isaraeli mpolai ira inso i arodo to Pelisiti ka bawaa mentenangi langkai. Orua ira anamiu, i Hopini ka i Pinehasi, mate iramo ka Burua Pedandia-Do Ue Ala rinontu.”

¹⁸ Mansano ipauo mongkona Burua Pedandia-Do Ue Ala, tebangkuomo i Eli sinsingara inso a ngkadera, i horino pewowa bente. Tepudu we'uno ka mate, hangano mota'uomo ka koroino mewalo. Onae moparenta gagi puu mpobitara a nto Isaraeli pato pulu nta'u tehineno.

¹⁹ Ponino beine, kombiano i Pinehasi, kontongaano mentia ta ronga me'ana. Mansano rumongeo nine Burua Pedandia-Do Ue Ala rinontuomo ka ponino anu tama saru tamano mate iramo, mepobingko mahaki kompono, onae ka ipentoro ka ipe'ana.

²⁰ Mansano ta ronga mate, luwuno beine anu mpentade umpedaakono, mpotae, ”Si doito, nde omue umarikomo me'anaakono asa ana ntama.” Sine nahi sangki ke maupo merio ira.

²¹ Ineeakono anano atuu i Ikabo, ipotae, ”Tetadiomo marambaa inso i Isaraeli,” hangano Burua Pedandia-Do Ue Ala rinontuomo ka hangano ponino ka tamano mate iramo.

²² Ipotae, ”Tetadiomo marambaa inso i Isaraeli, hangano Burua Pedandia-Do Ue Ala rinontuomo.”