1 Samueli 31 - Wunta Mempori

Mateno i Saulu

¹ Tempono dompe'iwali to Pelisiti ka to Isaraeli, to Isaraeli mpolai inso i arodo to Pelisiti ka hadio mempinepate tumambole a mentorukuno Giliboa.

² To Pelisiti lumulu ira mpiha i Saulu ka luwuno anano. Dompepateo i Yonata, i Abinada, ka i Malikisua, luwudo anano i Saulu.

³ Peteaa atuu komobe-mobeano ipembasaio i Saulu. Domehaweo puu mpompana ka domebelaio tedoa ondalo.

⁴ Motae i Saulu a mia mowawa sangka mpeteano, ”Butao ponaimu, ka tobo aku, kasi mansa mia anu nahi dompetindi andio mentobo aku ka dompemae-maeakune.” Sine mia anu mowawa sangka mpeteano atuu nahi behe, hangano tedoa doito. Onaemo ka i'alao i Saulu ponai atuu ka ipebangkuako i wawono ponai atuu.

⁵ Ikitao mateomo i Saulu, mia mowawa sangka mpeteano atuu mebangkuako mbo'u i wawo ponai atuu, ka mate ira meronga.

⁶ Kanandiomo teweweuno i Saulu, otolu ira anano, ka mia anu mowawaakono sangka mpeteano, saru luwuno miano memate ira luwu oleo atuu.

⁷ Mansano domengkitao mpolai iramo sorodadu Isaraeli ka i Saulu saru otolu ira anano memate iramo, luwudo to Isaraeli anu mpo'ia i asambalino lembono ka anu i asatowano koro Yarade mpolai mebintao luwuno kotado. Ka do'amba mehawe to Pelisiti mpo'ia i ra'ai.

⁸ Tisomono tempono to Pelisiti me'aiwa lumolohi ira mia mempinepate atuu, domehaweo i Saulu ka otulu ira anano tepombole a mentorukuno Giliboa.

⁹ Domempoleo uluno i Saulu ka melolohio sangka mpeteano. Ka do'amba mpontena mia mempaleleo lele atuu i asa wawo wita Pelisiti, i raha pelahumoaado ka a mpalili.

¹⁰ Ka i'amba luwuno sangka peteano i Saulu domenaao a raha mpelahumoaado i Asitore ka wata ngkoroino domendoeo a bente kota i Beti-Seani.

¹¹ Mansado merongeo palili i Yabesi-Gilea anu wineudo to Pelisiti ndi Saulu,

¹² mpelungka iramo luwuno mia moroso ntu'u, ka dompelempa asa wongi. Dome'alao wata ngkoroino i Saulu ka luwuno wata ngkoroido anano inso a bente i Beti-Seani. Ka do'amba mpekule i Yabesi ka domentunuo wata ngkoroido i ra'ai.

¹³ Dome'alao wukudo ka domengkaburuo a ntoto ngkeu tamarisika i Yabesi. Umarino atuu, mempuasa ira opitu oleo tehineno.