1 Samueli 30 - Wunta Mempori

Pombalono i Daudi a nto Amale

¹ Ko'otulu oleono i Daudi saru luwuno miano mehawe i Sikala, umariomo domensapoio to Amale Wita Nege ka Sikala. Domenangi ira ka domesongkoo kotano.

² Dotawa ira luwuno beine ka luwuno mia i ra'ai, mota'u ke mongura nahina pinepatedo maupo te'asa mia tendeano domewawa ira ka dompotilaloakono pelempado.

³ I Daudi saru luwuno miano hawe a ngkota atuu. Mengkaaomo, kota atuu umariomo tinunu ka kombiado saru anado tama ka beine tinawa.

⁴ Mengeseomo i Daudi saru luwuno sorodaduno, ranta nami dompokompengese mbo'u.

⁵ Orua ira kombiano i Daudi tinawa, onaemo i Ahinoa, to Yisire'eli, ka i Abigai, umari kombiano i Naba, to Karameli.

⁶ Tedungkuomo i Daudi hangano dompotae palili ira mewunoakono watu. Luwuno palilino masusa aroado, hangano anano tama ka beine. Sine i Daudi mohawe roso inso ndi Ondae i Ue, Ue Alano.

⁷ Ka i'amba i Daudi parentao sando mpesomba Abiata anano i Ahimele, ipotae, ”Wawaomo epo ndi ongkue.” Iwawaomo i Abiata epo ndi Daudi.

⁸ Ka i'amba i Daudi mo'ema pontiso ndi Ondae i Ue, ipotae, ”Asalakono aku lumulu ira ke mia memosa'o atuu? Nde da aku koa humawe ira ke?” Mepau Ira i Ue ndi onae, ”Lulu iramo, hangano menteeano kohumawe ira ka motola ira luwuno tinawa.”

⁹ Ka i'amba lumako i Daudi ka nomo etu mia anu tumondao hawe a ngkorono Mo'are Besori, kontongaano asa ntia inso ndi ondae mpenaa-naa i ra'ai.

¹⁰ I Daudi saru pato etu mia mpotilalo mpepolulu, ka orua etu mia susuano anu tedoa mokendo ba domensakio Korono Mo'are Besori mpenaa-naa i ra'ai.

¹¹ A ntonga mpada domehaweo asa mia to Masiri ka domewawao ndi Daudi. Dompoweeakono roti ka ikaano, ka dompopo'inuakono uwoi.

¹² Ka do'amba mpoweeakono asa mpole kukisi ara ka orua kukisi kisimisi. Mansano mongkaa, morosoomo mbo'u, hangano tolu oleo ka tolu wongi nahi hori mongkaa.

¹³ Ka i'amba mesikeno i Daudi ndi onae, ”Atano isema omue ka isua insoamu?” Sumangki mia atuu, ”Ongkue mangalitau to Masiri, atano asa to Amale. Dobinta aku ueku hangano otulu oleo anu lalo, mahaki aku.

¹⁴ Umari kamimo mensapoio Wita Nege to Kereti, i wita Yehuda, ka Wita Nege to Kalebi. Ka maupo Sikila umariomo kimesongkoo.”

¹⁵ Mesikeno i Daudi ndi onae, ”Upolio ke wawa aku a mia memosa'o atuu?” Ipotae, ”Ipesumpamo ndi ongkue a nee-Do Ue Ala, nine nahi komiu mepate aku ke meweengako aku a ngkaedo ueku, aku koa wawa komiu a mpo'iangado mia mosa'o atuu.”

¹⁶ Mia atuu tumeoo i Daudi iraane, ka dokita iramo mia atuudo ntesiarawo a wawo wita, mpongkaa ka mpo'inu mporame-rameako pinomurudo anu hadio, anu merinontudo inso a witado to Pelisiti ka i witado to Yehuda.

¹⁷ Tisomono umpeda meene, i Daudi sumapoi ira ranta hawe sumoo oleo. Nahina maupo te'asa mia inso ndi ondae anu tola, sangkadio pato etu mangalitau anu mpolai mpompesawiki unta.

¹⁸ I Daudi wali umalao luwu anu me'inalado to Amale. I Daudi motola ira mbo'u orua ira kombiano.

¹⁹ Nahina anu tetadi inso ndi ondae, moiko anu kodei ke anu langkai, ana ntama maupo beine, pinomuru maupo luwuakoano anu inalado, ipokule ira luwu i Daudi.

²⁰ I Daudi umalao luwuno bembe bimba ka sapi. Luwuno atuu dopokonse'elu ira i arono pinotuwu susuaano, ka dompotae, ”Onaemo ndio pinomuruno i Daudi.”

²¹ Ka i'amba i Daudi hawe a rua etu mia anu tedoa memokendo mentondao, anu binintano umpeda Korono Mo'are Besori. Mpeluarako ira mentotowoo i Daudi ka palili anu mentondao. Irangkuhi ira i Daudi mia atuudo ka isangkalima ira.

²² Sine, mpepau iramo luwuno mia mosa'o wineweuno ka melambaha i olodo mia anu melako tumondao i Daudi, dompotae, ”Hangano nahi domelako saru ontae, nahi kita mpoweeako ira maupo hapa anu pinomuru anu inalato. Sine, ana ka beinedo nte'o'asa mia moiko ba domewawa ira!”

²³ Ipotae i Daudi, ”Luwumiu pepaekompoku, si mpoweweu kanatuu saru hapa anu pinowee-Do i Ue ndi ontae. Dokongkomi kitamo ka Dopeweengako iramo a ngkaeto mia melambaha anu sumapoi kita.

²⁴ Isema anu ta merorongeakomiu mongkona anu andio? Hangano tiano mia anu mo'ia modagai sangka, mengkena saru tiano mia anu lumako metea. Ondae ira pada mpohawe tia.”

²⁵ Mompu'u oleo atuu ranta potilaloano, mongkona atuu pinokogagiomo pompakosia ka atorado to Isaraeli ranta oleo andio.

Pompoweeno i Daudi a mia memota'u i Yehuda

²⁶ Mansano hawe i Daudi i Sikala, i'oliwio asantia pinomuru atuu a mia memota'u i Yehuda, ka a wali-walino, saru pe'oliwi, ”Ndiomo pompowee tiamiu inso a mpinomuru anu inala a iwali-Do i Ue,”

²⁷ a sompo-sompo mia memota'u i Beteli, i Ramoti i Wita Nege, i Yatiri,

²⁸ i Aro'eri, i Sipimoti, i Esitemoa,

²⁹ i Rakali, ka luwuno kotado to Yerahime'ela, a luwuno kotado to Keni,

³⁰ i Horima, i Bori-Asani, i Ataki,

³¹ i Heberoni, ka a luwuno po'ianga anu hori tetoroano i Daudi saru luwuno miano.