1 Samueli 27 - Wunta Mempori

I Daudi i olodo to Pelisiti

¹ Motae i Daudi i laro aroano, ”Asa tempo ta mepate aku i Saulu. Laluopo aku lumako i witado to Pelisiti. Gagi nami ta hori mbo'u i Saulu umungke aku a luwuno witado to Isaraeli ka akumo tola inso a ngkaeno.”

² Ka i'amba i Daudi saru nomo etu miano lumako me'asambaliako i kota Gati poparentaano i mokole Akisi anano i Maoko.

³ I Daudi saru luwuno miano, mpo'ia ndi mokole Akisi i kota Gati, sisingge mia saru somborino. I Daudi saru orua kombiano, onaemo i Ahinoa, beine inso i Yesire'eli ka i Abigai, umari kombiano i Naba, beine inso i Karameli.

⁴ Mansano pinauako i Saulu nine i Daudi molaiomo i kota Gati, menaa-naaomo umungkeo.

⁵ Ipotae i Daudi ndi mokole Akisi, ”Tewala ipehohawa aku, ipowee aku asa wita iwiwino kota ka kupo'ia i ra'ai. Tembio ka aku mo'ia ndi omue i kota mokole.”

⁶ Oleo atuu i mokole Akisi weeakono kota Sikila ndi onae. Onaemo pu'uno Sikila dompe'ueo luwuno mokole Yehuda ranta hawe oleo andio.

⁷ Tehineno ipo'ia i Daudi i witado to Pelisiti, asa nta'u opaa wula.

⁸ I Daudi saru luwuno miano, melako mensapoi ira to Gesuri, to Girisi ka to Amale. Ondaemo andio palili anu mpo'ia i wita anu menggoe inso i Telami te'aro i Suri hawe i wita Masiri.

⁹ Tewala ipongko'alao i Daudi asa wita ipepate ira luwu tama, maupo beine. Irontu ira asa bawaa bembe bimba, sapi, kalide, unta ka sangka ka do'amba mpekule ndi mokole Akisi.

¹⁰ Tewala mesikeno i Akisi, ”Oleo andio isua imelako mposapoi?” Ka sumangki i Daudi, ”I wita Nege po'iangaado to Yehuda” ke ”Wita Nege po'iangaado to Yerame'eli” ke ”Wita Nege po'iangaado to Keni.”

¹¹ Luwuno ipepate ira i Daudi, nahina pino'inee tuwu, moiko tama maupo beine anu winawano i Gati, hangano ipewowoloo, ”Ba domansa mempopauo mongkona omami: Kanandio doweweu kami i Daudi.” Kanandiomo ipoweweu i Daudi tempono ipo'ia i witado to Pelisiti.

¹² Onaemo ka ipe'ala-alao i Akisi i Daudi, hangano ipewowoloo, ”Onae domemokoburuakonomo ntu'u to Isaraeli pe'asa tongkuno. Onae tamo gagi tetenaaku mpiha.”