1 Samueli 25 - Wunta Mempori

Mateno i Semueli

¹ Mateomo i Semueli ka luwudo to Isaraeli mpepumpu mpo'inomboakono. Ka domengkaburuo i Rama, po'iangano. I Daudi lumako i Pada One Parani.

I Daudi, i Naba ka i Abigai

² Tempo atuu hinao asa mia tama i Maoni, anu hinao pompakambiano pinotuwu i Karameli. Mia atuu tedoa kaea, bimbano tolu nsowu ka bembeno asa nsowu. Onae kongko i Karameli tempono pogontia wulu bimbano.

³ Neeno mia atuu i Naba ka kombiano meneeako i Abigai. Beine atuu pande ka tekosi, sine tamano atuu kasara ka mosa'o gauno. Onae inuleno i Kalebi.

⁴ I pada one, i rongeo i Daudi nine i Naba kontongaano mogonti wulu bimbano.

⁵ Ka i'amba i Daudi montena miano hopulu ira, ka ipotaeako ira, ”Imelakomo i Karameli ntepohaweakono i Naba, imempauakono tabeaku ndi onae.

⁶ Imempauakono tabea andio: Tabea ka rodoa ndi omiu ka pe'asa rahamiu, ka luwuno arataamiu.

⁷ Dasarai andio kurongeo nine kontongaamiu mogonti wulu bimba. Puu mpopakambimiu anu me'umpeda ndi omami, nahi kisosanggolo ira ka nahina anu tetadido maupo hapamokoa, tempono dompo'ia i Karameli.

⁸ Isikeno ira miamiu ka ira mempauakomiu. Gagi ipehohawa iramo miaku, onaemo ka dome'aiwa tempono oleo pogawea. Ipoweeako iramo atamiu andio ka anamiu i Daudi hapa anu hina ndi omiu.”

⁹ Miano i Daudi mehawe raane. A neeno i Daudi, dompohaweakono ndi Naba kana anu pinau atuu, ka do'amba mpesikori.

¹⁰ Sine isangki ira i Naba miano i Daudi, ”Isema i Daudi? Isema anano i Isai atuu? Tempo andio hadio tetenaa anu mpolai inso a uedo.

¹¹ Kana'umpe aku umalao rotiku, uwoi inuaku ka pinotuwu kusumbeleomo tiado mia mpogonti wulu bimbaku ka aku meweengakono a mia nahi kuto'orio ba isua dome'inso?”

¹² Mpekule iramo miano i Daudi, mansado mehawe, domempauakono kana pinauno atuu.

¹³ Ipotaeako ira i Daudi miano, ”Sisingge mia metampio ponaino.” Onaemo ka dompetampio ponaido, kanatuu koa mbo'u i Daudi ipetampio ponaino. Bara'ura pato etu mia anu tumondao i Daudi, anu orua etu mia mpo'ia mpodagai sangkado.

¹⁴ Tempo atuu asa miano pauakono i Abigai, kombiano i Naba, kanandio, ”I Daudi montena miano inso i Pada One aiwa mompohawe tabeano ndi ueto, sine ipepaukiako ira.

¹⁵ Ka hinaano mia atuudo tedoa ira mpe'aroa ndi omami. Nahi dososanggolo kami nahina tetadi mami maupo hapamokoa tempono kimengkoraane-ngkoramai umpeda ndi ondae, tempono kimpo'ia i pada.

¹⁶ Ondaemo anu dumagai kami wongi ka meene tempono kimpompakambi asa bawaa bembe bimba umpeda ndi ondae.

¹⁷ Onaemo ka ipewowoloomo ka ito'oriomo hapa anu komiu weweuo, hangano masolaa asalakono ta hawe ndi ondae ueto ka luwuno pe'asa rahado. Onae asa mia lambaha ranta ka nahi behe inoluako mepau.”

¹⁸ Mompari-pariomo i Abigai umalao rua etu roti, orua kadu anggoro, bauno olima bimba anu ninahuomo, olima ponsa'u gandu hinolei, asa etu kukisi kisimisi ka orua etu kukisi ara. Luwuno atuu pinateke a ngkalide.

¹⁹ Umarino atuu ipotaeako ira tetenaano, ”Imelakomo ntese'elu, aku tumonda komiu.” Sine nahi pinauako i Naba, tamano.

²⁰ Kontongaano montindulu kalide pesawiano beine atuu, i Daudi mbo'u montindulu me'aro a beine atuu sine terereiako torukuno. Onaemo ka itepodupaako ira beine atuu.

²¹ I Daudi umariomo mepau, ”Nahina tuduno kukongkomi ira luwuno arataano mia andio i pada one, nahina maupo hapa anu tetadi arataano. Sine moikono aroaku isuloakono anu mosa'o.

²² Po'ineeomo Ondae i Ue Ala humukuo mobea i Daudi, maupo lalua mbo'u, tewala hinao te'asa tama ndi onae anu tuwu hawe mo'oru.”

²³ Mansano kumitao i Abigai i Daudi, mompari-pari metii inso a ngkalideno ka ipenggolontu i arono i Daudi mesomba ra'ino hawe a wita.

²⁴ Onae menggolontu a ngkaruno i Daudi ka ipotae, ”Ongkuemo koa, Oo ueku, anu tumembio sala atuu. Ipehohawao tetenaamiu andio aku mepau ka iperorongeakono pinauno tetenaamiu andio.

²⁵ Siimo iperioo i Naba, mia lambaha atuu, hangano kana neeno kanatuumo onae, neeno i Naba, mia nahi montaso pinewowolono. Ongkue nahi kukita ira mia tinenamiu,

²⁶ Kanandio-andio ueku, a nee-Do i Ue anu tuwu ka tumuwumiu, hangano Ondae i Ue anu umonto komiu mombalaoko kaemiu a iwalimiu, po'ineeomo luwuno iwalimiu anu montoo ta sumolangi komiu ueku kana i Naba!

²⁷ Ndiomo pompowee kupowawaakomiu ueku, po'ineeomo ka domewineeako miamiu anu tumondakomiu.

²⁸ Siimo inaao i laro aroamiu koweweeno tetenaamiu andio, Ondae i Ue asalakono Ira wanguo inulemiu anu moroso, hangano omiu ueku moweweu peteaa-Do i Ue ka nahi hori moweweu anu mosa'o tempono ituwu.

²⁹ Ande-andeno hinao mia anu lumulu komiu ta mepate komiu, penaamiu ta tekadudui a laro luwuno mia anu mentuwu mpomperorohi ndi Ondae i Ue, Ue Alamiu, sine penaado iwalimiu Ira mesembiakono.

³⁰ Tewala Dopokogagiomo i Ue luwuakoano anu moiko anu pinau-Do mongkona omiu, ka Dopokogagi komiumo mokoledo to Isaraeli,

³¹ nahi komiu mompemasusa hangano nahina pu'uno kai pompepate ka mombaloako kaemiu. Tewala Ondae i Ue moweweu anu moiko ndi omiu ueku, si kolupeo tetenaamiu andio.”

³² Motae i Daudi ndi Abigai, ”Unde-unde Iramo i Ue, Ue Alado to Isaraeli, anu tumenako aiwa tepohaweakune oleo andio.

³³ Te'unde-undeomo pandemu ka te'unde-undeomo koroimu, anu oleo andio umonto aku monsinga pasua rea ka mombaloako kaeku.

³⁴ Sine a nee-Do i Ue anu tuwu, Ue Alado Isaraeli anu umonto akumo moweweu anu mosa'o ndi omue, ande-andeno ba omue nahi uronga aiwa tepohaweakune, asalakono nahina maupo te'asa tama anu da tuwu ndi Naba hawe kai mewanta oleo.”

³⁵ Ka i'amba tumarimao i Daudi hapa anu iwawaakono beine atuu ka ipotaeakono, ”Pekulemo temoiko i rahamu. Kupe'ala-alaomo pinaumu ka kutondaakomu po'emamu.”

³⁶ Mansano hawe i Abigai ndi Naba, onae kontongaano morame-rame langkai i rahado kana porame-ramedo mokole. Mawongko ntu'u aroano i Naba ka tedoa molangu. Onaemo pu'uno ranta ka isaba oleo, beine atuu nahi pompauakono hapa-hapa ndi Naba.

³⁷ Tisomono mo'oru, mewanguomo i Naba ka tetadiomo molanguno, ipauakonomo kombiano luwuno anu gagi atuu. Mingki te'onto ipenaa, koroino tidongkora kana watu.

³⁸ Bara'ura hopulu oleo umarino atuu, Ondae i Ue humukuo i Naba ranta ka imate.

³⁹ Irongeo i Daudi nine mateomo i Naba, ipotae, ”Unde-unde Ira i Ue, anu tumaloi aku inso a mpompe'uru-uruno i Naba ndi ongkue, ka anu umontoo tetenaa-Do moweweu mosa'o. Ondae i Ue humukuo i Naba hangano wineweuno anu mosa'o.” Ka i'amba i Daudi montena mia mepauakono i Abigai ta umalao gagi kombiano.

⁴⁰ Tetenaano i Daudi mehawe ndi Abigai i Karameli, ka dompotaeakono, ”Omami itena kami i Daudi aiwa umalakomiu ta gagi kombiado.”

⁴¹ Mentadeomo beine atuu, ka ipenggolontu ra'ino tii a wita ka ipotae, ”Tetenaamiu andio, mepatinda gagi puu pompekakaako anu ta mowo'ohi karudo tetenaado ueku atuu.”

⁴² Umarino atuu i Abigai lumako, mesawi a ngkalideno ka domentondao olima ira beine puu pompekakaakono. Melako iramo tumonda ira mia tinenano i Daudi, ka gagiomo kombiano i Daudi.

⁴³ Kanatuu koa mbo'u i Ahinoa inso i Yisire'eli ikombiaomo i Daudi. I Daudi kumombia ira orua ira beine atuu.

⁴⁴ I Saulu meweengakono i Mikali anano, kombiano i Daudi ndi Paliti anano i Laisi inso i Galimi.