1 Samueli 24 - Wunta Mempori

I Daudi nahi behe mepateo i Saulu

¹ Inso i ra'ai, i Daudi lumako mo'ia i Ena-Gedi.

² Pekuleno i Saulu umarino lumulu ira to Pelisiti, pinauako kanandio, ”I Daudi rauo i Pada One Ena-Gedi.”

³ I Saulu mobiniki tolu nsowu mia inso a luwudo to Isaraeli, ka ilako umungkeo i Daudi saru luwuno miano i torukuno Watu Bembe Ntobu.

⁴ Onae hawe a walaka bimba i wiwinsala. I ra'ai hinao kunepo, i Saulu mewinso i larono ta teta'i i ra'ai, kontongaano i Daudi saru luwuno miano rau ira mpentoro i larono kunepo atuu

⁵ Mpotae iramo miano i Daudi, ”Onaemo andio oleo anu dinandi-Do i Ue ndi omue: Kitao, Kupeweengakono iwalimu ndi omue, weweuomo ndi onae hapa anu pinemoikomu.” Mentadeomo i Daudi ka i peningka-ningka sumeseio untuno lemba meloeno i Saulu.

⁶ Sine umarino atuu, i Daudi wali me'o'ole hangano iseseio untuno lemba meloeno i Saulu.

⁷ Ipotaeako ira miano, ”Po'ineeomo Ondae i Ue ka Dopoko'olaiakune woweweu anu andio, kasi kupotiio kaeku umewaio mia anu inurapi-Do i Ue! Hangano onaemo mia anu inurapi-Do i Ue.”

⁸ I Daudi mopoto'oriako ira pau atuu a miano ka nahi eheako ira dome'ewaio i Saulu. I Saulu lumakoomo bintao kunepo atuu motilaloakono pelempaano.

⁹ Ka i'amba i Daudi meluarako mbo'u inso a laro kunepo atuu, ka i'amba mebooli ndi Saulu inso i bungkuno, ”Oo ue mokole!” I Saulu mewolili i bungkuno, ka i'amba mesomba i Daudi ra'ino tii a wita.

¹⁰ Motae i Daudi ndi Saulu, ”Tembio ka iperorongeakono paudo mia mpotae, ’I Daudi montoo ta sumolangi komiu?’

¹¹ Oleo andio ikitaakonomo matamiu nine oleo andio Ondae i Ue meweenga komiu a ngkaeku i laro ngkunepo atuu. ’Hinao mia tumena aku mepate komiu, sine kupehohawa komiu, hangano kupewowoloo, nahi aku motiio kaeku umewai ira ueku, hangano ondaemo mia anu inurapi-Do i Ue.’

¹² Ikitao, Amaku, ndiomo untuno lemba meloemiu a ngkaeku sine nahi kupepate komiu! Gagi temolinomo pinewowolomiu ka ikitaomo nine kaeku nahina wineweuno anu mosa'o umewai komiu. Nahi kupoweweu hala ndi omiu, maupo iwela lumulu aku mingki mepate aku.

¹³ Po'ineeomo Ondae i Ue gagi puu pobitara i oloto. Po'ineeomo Ondae i Ue anu mombaloakune ndi omue, sine nahi aku umewai komiu,

¹⁴ kana popotundaado mia nse'elu, ’Wineweu mosa'o inso a mia mosa'o’. Gagi, kaeku nahi ta umewai komiu

¹⁵ Isemake anu linuluno mokoledo to Isaraeli? Isemake anu linulumiu? Butu dahu mate! Butu anu kana kutu!

¹⁶ Po'ineeomo Ondae i Ue anu gagi puu mpobitara ka moweweu pomputusi i oloto. Po'ineeomo Ondae i Ue kumitao ka kumorahakono kara-karaku ka mowee aku moleoa, tepotola inso a ngkaemiu.”

¹⁷ Mansano umari i Daudi mohaweo pau atuu ndi Saulu, motaeomo i Saulu, ”Omueke anaku Daudi anu mepau atuu?” Ka i'amba i Saulu mengese meroku,

¹⁸ Motaeomo ndi Daudi, ”Omue anu mentee, ongkue sala, hangano omue moweweu anu moiko ndi ongkue, sine ongkue moweweu anu mosa'o ndi omue.

¹⁹ Oleo andio upokomengkaaomo wineweumu anu moiko ndi ongkue, maupo Ondae i Ue Dopeweengako akumo a ngkaemu, sine nahi upepate aku.

²⁰ Hinaoke mia anu mohawe iwalino, butu ipotolao ka ilako nahi pepateo? Ondae i Ue sumuloakono anu moiko ndi omue pompehohawamu ndi ongkue oleo andio.

²¹ Kanandio-andio kuto'oriomo nine omue asalakono gagi mokole ka poparentaa i Isaraeli ta moroso a ngkaemu.

²² Pesumpamo ndi ongkue a nee-Do i Ue nine nahi ira mempinokoropu inuleku ka nahi ta tetadi neeku inso a mpepe'etuaku.”

²³ Umarino atuu mesumpaomo i Daudi ndi Saulu. Ka i'amba i Saulu mekule i rahano, ka i Daudi saru luwuno miano melako a bentedo.