1 Samueli 21 - Wunta Mempori

I Daudi i Nobi

¹ I Daudi haweomo i Nobi ndi sando mpesomba Ahimele. Mondende aroano i Ahimele tumotowoo i Daudi ka ipotaeakono, ”Tembio ka i'asa-asamu nahina maupo te'asa mia walimu?”

² Sumangki i Daudi ndi sando mpesomba Ahimele, ”Ondae mokole tumena aku. Dopotae, ’Maupo te'asa mia kasihina tumo'orio mongkona anggaa anu kuweeakomu ka anu kutenaakomu.’ Onaemo pu'uno luwuno tetenaaku kutena iramo melako a mpo'ianga susua.

³ Gagi kanandio, hapa anu hina ndi omiu? Ipowee akumo roti te olima ke hapamo koa anu hina.”

⁴ Sumangki sando mpesomba atuu ndi Daudi, ”Nahina roti biasa ndi ongkue sangkadio roti mempori, polomokoa luwudo tetenaamiu atuu nahi dompe'asa mpoturiako beine.”

⁵ Sumangki i Daudi ndi sando mpesomba atuu, ”Tewala kami melako mpetea, omami nahi moiko kimpe'asa mpoturiako beine. Koroido tetenaaku morina maupo a mpelempaa biasa tamoako oleo andio, koroido luwu morina.”

⁶ I'alao sando mpesomba roti mempori ka i weeakono, hangano nami hina roti i ra'ai sangkadio roti pesomba. Roti atuu domentandeomo mia inso i aro-Do i Ue, kai i'oleo roti atuu i inala, ninaa mbo'u roti wo'ohu.

⁷ I oleo atuu i ra'ai hinao asa mia pegawaino i Saulu, anu tinena mo'angga i aro-Do i Ue. Neeno i Do'egi to Edomi, petewawa puu pompakambino i Saulu.

⁸ Motae i Daudi ndi Ahimele, ”Nahinake ndi omiu i ndi'ai kansai ke ponai? Hangano ponaiku ke maupo sangka peteaku nahi kuwawao hangano madara dotena aku mokole.”

⁹ Ipotae sando mpesomba atuu, ”Ponaino i Golia to Pelisiti anu pinepatemu i Lembono Tarabanti, onae anu kongko i ndi'ai, tinongoako sawu i bungkuno epo. Tewala mingkiko umalao, alaomo, hangano nahina anu susua ndi'ai sangkadio ponai atuu.” Sumangki i Daudi, ”Nahina anu kanatuu, iwee akumo.”

I Daudi i Gati

¹⁰ I oleo koa mbo'u atuu i Daudi molai inso ndi Saulu, ka i hawe i Gati, ndi Akisi mokoleno kota atuu.

¹¹ Dompotae tetenaano i Akisi ndi onae, ”Komba onaeke andio i Daudi mokole i wita atuu? Komba mongkona onaeke mia mpenani mpesangki-sangki ka melumense, dompotae: I Saulu monangi sowu-sowuno iwali, sine i Daudi monangi pulu-pulu nsowuno?”

¹² Luwuno pau atuu mokonsalalaroo aroano i Daudi, ka gagiomo tedoa doito, ndi Akisi, mokole Gati.

¹³ Onaemo pu'uno ka ibalio leluno i arodo ka mo'onde-onde mekombe. Onae megogaresi a mpewowa langkai ka ipo'ineeo ilino waa a wulu danggono.

¹⁴ Ipotaeako ira i Akisi tetenaano, ”Nahi mengkitaoke mia arau nine mia mekombe? Tembio ka imewawao ndi ongkue?

¹⁵ Nde da makurake mia mekombe ndi ongkue, ranta ka imewawao mia andio mpopokitao pekombeno ndi ongkue? Pototono ke mia andio mewinso i rahaku?”