1 Samueli 20 - Wunta Mempori

Pedandiado i Daudi ka i Yonata

¹ I Daudi molai inso i Nayoti, i Rama. Onae hawe ndi Yonata ka ipotae, ”Hapake wineweuku? Hapa salaku ka hapa halaku ndi ondae amamu ka ipontoo ta mepate aku?”

² Sumangki i Yonata, ipotae, ”Kuto'orio ntu'u, nahi kopinepate. Kau to'oriokoa, luwuno anu ira weweuo amaku, kodei ke langkai asalakono dopauo ndi ongkue se'elu. Tembio ka ira wunio ndi ongkue? Nahi pewinso akalaku.”

³ Sine i Daudi mokomanasaakono aroano i Yonata, ipotae, ”Ondae amamu doto'orio ntu'u, omue tedoa moiko ndi ongkue, onaemo ka dopewowoloo, ’ka simansa tumo'orio i Yonata mongkona andio, ranta kai masusa aroano.’ Sine a nee-Do i Ue anu tuwu ka tuwumu, asa laampa'amokoa olono ongkue ka matea.”

⁴ Motae i Yonata ndi Daudi, ”Maupo hapa anu po'eheno aroamu, aku tumulungiko.”

⁵ Ipotae i Daudi ndi Yonata, ”Uto'oriomo, tisomo Wula Wo'ohu, asalakono aku mentoro mongkaa meronga saru mokole. Po'inee akumo aku lumako mewuni i tonga mpada hawe ngkiniwia ko'otolu oleono.

⁶ Tewala mansa do'ungke aku amamu, pauako ira, ’I Daudi tedoa mepepehohawa ndi ongkue mo'ema ta lumako i Beteleme, Kotano, hangano i ra'ai luwudo anu mpepe'etu ira mpoweweu gau mpesomba sompo ta'u.’

⁷ Tewala sumangki, ’Moiko koa,’ pengkonaano da aku koa tuwu. Sine tewala tumampu'u ira tekuda, manasa bobotoliomo aroado ira sumolangi aku.

⁸ Tewala kanandio, popokitaomo petenunumu ndi ongkue, hangano umarikomo moweweu pedandia i aro-Do i Ue saru ongkue. Tewala hinao salaku, omuemu mepate aku. Tembio ka upeweengako aku ndi ondae amamu?”

⁹ Sine sumangki i Yonata, ”Komba ta gagi ndi omue! Ba mansa kuto'orio nine ondae amaku bobotoliomo aroado ira sumolangiko, nahi aku pauakomu ke?”

¹⁰ Mesikeno i Daudi ndi Yonata, ”Isema anu ta pauakune tewala tekuda ira amamu?”

¹¹ Ipotae i Yonata ndi Daudi, ”Aiwamo ka topeluarako lumako a mpada.” Onaemo ka dopeluarako orua ira a mpada.

¹² Ipotae i Yonata ndi Daudi, ”A nee-Do i Ue, Ue Alado to Isaraeli, tisomo ke te'ipua, bara'ura tempo kanandio, aku moporooo leludo amaku. Moiko ke naahi ndi omue Daudi, aku montena mia aiwa pauakomu.

¹³ Tewala tinoodo amaku ira sumolangiko, po'ineeomo Ondae i Ue moweeakono pohuku anu mobea ndi Yonata ka maupo laalo mbo'u, ba nahi kupauakomu ka motolako ka ulako tekadudui. Ondae i Ue kumongkomiko kana Dokongkomi ira amaku i ndi'upua.

¹⁴ Tewala da tuwu aku, si kolupeo pedandiato i aro-Do i Ue? Sine tewala mate akumo,

¹⁵ popokitaako ira mpiha inuleku petenunumu ranta nahina tampulaano, maupo itempono Dopokoropu ira i Ue luwuno iwalino i Daudi inso i wawontolino.

¹⁶ Kanandiomo i Yonata moweweu pedandia saru somborino i Daudi, ipotae, Po'ineeono Ondae i Ue mombaloakono i Daudi a luwuno iwalino.”

¹⁷ I Yonata tumenao i Daudi ka ipesumpa tepohonapo mbo'u a pompehohawano i Daudi ndi onae, hangano i Yonata mehohawao kana koroino onaeno.

¹⁸ Umarino atuu, ipotae i Yonata ndi onae, ”Tisomo Wula Wo'ohu. Ira me'ungkeko hangano mooa pentoroamu.

¹⁹ Sine te'ipua, asalakono ira me'ungkeko. Asalakono ka ulako a mpewuniamu ia oleo gagiano atuu, ka pentoromo umpeda a watu Eseli.

²⁰ Aku mompotola otolu ana mpana i horino watu atuu, kana-kana hinao anu ta pinanaku.

²¹ Ka uto'oriokoa! Aku montena tetenaaku, ’Lakomo bini ira mata mpana atuu.’ Tewala kupotaeakono tetenaa atuu, ’Kitao mata mpana atuudo te'alaako i ndi'ai, alaomo!’ Ka aiwamo, hangano, a nee-Do i Ue anu tuwu, tekaduduiko ka nahina masolaa hapa-hapa.

²² Sine tewala kupotaeakono tetenaaku anu mongura atuu: ’Mata mpana atuu lalu ngkoraane!’ Ka lakomo, nde Ondae i Ue Dope'eheo ka ulako.

²³ Mongkona pedandia i olono ongkue ka omue, Ondae i Ue gagi sakosii ndi ontae ranta nahina tampulaano.”

²⁴ Lumakoomo i Daudi mewuni a ntonga mpada. Haweakoomo Wula Wo'ohu, mentoroomo mokole a mpelimbua ira mpongkaa.

²⁵ Mokole mentoro a wela pentoroado umpeda a rere, i Yonata i arodo, i Abinere mentoro i horino i Saulu, sine pentoroano i Daudi mooa.

²⁶ Oleo atuu nahi pompau hapa-hapa i Saulu, hangano ipewowoloo, ”Bara'ura hinao anu gagi ndi onae; bara'ura nahi morina; oo, mentee onae nahi morina.”

²⁷ Sine ko'orua oleono Wula Wo'ohu atuu, pentoroano i Daudi da mooa. Mesikenoomo i Saulu ndi Yonata, ”Tembio anano i Isai nahi hawe a mpelimbua, moiko indiawi maupo oleo andio?”

²⁸ Sumangki i Yonata, ”I Daudi tedoa mepepehohawa ndi ongkue mo'ema ta lumako i Beteleme,

²⁹ ipotae: ’Po'ineeomo ka kulako, hangano i kota hinao poweweua gau pesomba ndi omami anu mpepe'etu, ka pepaekompokumo anu tumena aku. Kanandio-andio tewala upehohawa aku po'ineeomo ka kulako tepohaweako ira pepaekompoku.’ Onaemo pu'uno ka nahi hawe ia mpelimbua mokole.”

³⁰ Tensilaomo tekudano i Saulu ndi Yonata, ipotaeakono, ”Ana nahi pompelangkai mia mota'uno, kana nahi pinaguru! Nde nahi kuto'orio ke nine u'ala-alaakono anano i Isai, anu kanatuu mokoko'iio koroimu ka anu me'anaakomu.

³¹ Hangano, tewala anano i Isai atuu da tuwu i wawontolino andio, omue ka poparentaamu nahi ta moroso. Kanandio-andio pontena mia ka domewawao ndi ongkue, hangano asalakono ta mate.”

³² Sine sumangki i Yonata ipotaeakono amano, ”Tembio ka ta pinepate? Hapamo anu wineweuno?”

³³ Sine, i Saulu kumansaio i Yonata ta mepateo. Ka ito'oriomo i Yonata nine bobotoliomo aroano amano ta mepateo i Daudi.

³⁴ Hangano tensila tekudano, mentadeomo i Yonata bintao meda pongkaanga. Ko'orua oleono Wula Wo'ohu atuu, i Yonata nahi pongkaa hapa-hapa, hangano masusa aroano mewowoloo i Daudi, hangano ipokongkuramao amano.

³⁵ Mansano mo'oru, i Yonata meluarako a mpada saru asa mia tetenaano anu da kodei, montonda pedandino ndi Daudi.

³⁶ Ipotaeakono tetenaano atuu, ”Pelulumo bini ira ana mpana anu aku mepanaakono.” Kontongaano tetenaa atuu melulu i Yonata mepanaakono ana mpana lumaloo tetenaa atuu.

³⁷ Mansano hawe tetenaa atuu a tedontaano ana mpana pinepanaakono i Yonata, mebooliomo i Yonata inso i bungkuno tetenaa atuu, ipotae, ”Komba ke ana mpana atuu lalu ngkoraane?”

³⁸ Ka i'amba I Yonata mebooli inso i bungkuno tetenaa atuu, ”Te'ala, tuturako si butu pentade.” Ka i'amba tetenaano i Yonata binio ana mpana atuu ka ipekule ndi ueno.

³⁹ Tetenaano atuu nahi ponto'ori hapa-hapa, butu i Yonata ka i Daudi anu tumo'orio pengkonaano.

⁴⁰ Ka i'amba i Yonata weeakono sangka peteano a tetenaano anu tumondao, ka ipotaeakono, ”Lakomo, wawao andio i kota.”

⁴¹ Mansano lumako tetenaa atuu, meluarakoomo i Daudi inso i bungkuno watu Eseli. Mesombaomo pentolu ra'ino hawe a wita. Pada ira mewoo-woo ka mengese tamoako i Daudi.

⁴² Ka i'amba i Yonata motaeakono i Daudi, ”Lakomo temoiko, Ondae i Ue kumaduduiko, hangano umari kitamo mesumpa a nee-Do i Ue, kanandio, ’Ondae i Ue Ira kongko i oloto, ongkue ka omue ka hawe a inuleku ka inulemu ranta nahina tampulaano.’ ”

⁴³ Umarino atuu lumakoomo i Daudi, ka i Yonata mbo'u mekule i kota.