1 Samueli 2 - Wunta Mempori

Po'unde-undeno i Hana

¹ Mekakaiomo i Hana, ”Aroaku mawongko hangano Omiu Ue, rosoku Itandeo, kupengingisii ira luwuno iwaliku, mawongko aroaku hangano pontulungi-Miu.

² Nahina anu mempori kana Omiu Ue, hangano nahina anu susua sangkadio Omiu, ka nahina pepekaduduia anu moroso kana Ondae Ue Alato.

³ Siimo mbo'u imengkolaba-laba mpau, pau anu nahina pengkonaano, siimo ipeluarako inso ia wiwimu, nde Ondae i Ue atuu Ue Ala anu tumo'orio luwuakoano, ka luwuno wineweudo mia Ondae putusio.

⁴ Panado pongkiari tepuduomo, sine mia molema mpesulepeako roso.

⁵ Mia anu hieno mowohi, kanandio-andio ipetamboakono koroino hangano kaanga, sine mia anu hieno mokoninggo, kanandio-andio naamo mbo'u. Sekonopo mia bita me'ana opitu, sine mia anu hadio anano, me'i'isei aroano.

⁶ Ondae i Ue mompepate ka mompotuwu, ka Ondae mompotii a mpo'iangado mia mate ka mowuatako inso i ra'ai.

⁷ Ondae i Ue weweuo mia gagi mongkokolaro ka gagi kaea. Ondae mompotii ka Ondae koa mbo'u mowuatako.

⁸ Dopokoroso ira mia molema inso a ntebobarasaiado, ka Dotande ira mia mongkokolaro inso a marasaiado, ka Dompontoro ira saru luwuno ulea mokole, ka mpohawe ira pentoroa anu pinelangkai. Nde Ondae i Ue pu'uno wawontolino, i wawono Donaao wawo wita.

⁹ Dokongkomio pelempado mia pinehohawa-Do, sine mia mosa'o gauno ira memate a wongi-wongiano, nde komba hangano roso onaeno, mia gagi pabawa.

¹⁰ Mia anu umewai Ira i Ue, ta pinoko tampula; hangano ondae, ka Dotekuda kana rundu i langi. Ondae i Ue pabawaio asa wawontolino andio; Ondae moweeakono roso a mokole anu bininiki-Do, ka moweeakono pabawa a mia anu inurapi-Do.”

Lambahado anano i Eli

¹¹ Umarino atuu mekuleomo i Elikana i Rama, sine nana'ote atuu gagi puu pompekakaako-Do i Ue, a pontaateno sando mpesomba Eli.

¹² Sine orua ira anano i Eli anu tama, lambaha ira, nahi dopelangkai Ira i Ue,

¹³ maupo tiado sando mpesomba ia bawaa. Tewala hinao mia anu mpopesombaako pesombano, ka kontongaano bau atuu ninahu, haweomo tinenano sando mpesomba mowawa siru sarampa mesampa otolu a ngkaeno,

¹⁴ ka ipeduhuakono a laro ngkuro, ke a ngkawali. Luwuno anu pinongko'alano siru sarampa atuu, i'alao sando mpesomba atuu tiano onaeno. Kanandiomo doweweu ira luwudo to Isaraeli anu me'aiwa i Silo.

¹⁵ Tendeano, se'eluno napi tinunu taba pesomba, haweomo tinenano sando mpesomba, ka ipotaeakono mia anu mowawa pesombano, ”Poweeakono sando mpesomba bau raramiano, hangano nahi behe montarima bau anu ninahu, butu koa anu momata.”

¹⁶ Tewala mia atuu sumangki, ”Po'ineeomo ka itinunu ari tabano, ka u'amba mo'ala po'eheno aroamu,” mia tinena atuu ta motaeakono mia mowawa pesomba, ”Kanandio-andio powee akumo, tewala naahi aku mo'ala lioku.”

¹⁷ Hangano wineweudo kanandio, halado mia mongura orua ira atuu tedoa langkai i aro-Do i Ue, hangano dope'uru-uruo pesomba ndi Ondae i Ue.

¹⁸ I Semueli gagi puu mpompekakaako i aro-Do i Ue. Onae da mongura mompakeomo lemba epo inso a sangka lena.

¹⁹ Sompo-sompo ta'u ineno monseuakono lemba meloe kodei tiano ka iwawaakono tempono ilako saru tamano mompesombaako pesomba sompo ta'u.

²⁰ Ka i'amba i Eli rumonso ira i Elikana saru kombiano kanandio, ”Po'ineeomo Ondae i Ue moweeakomiu inule inso a beine andio euno ana anu ipeweengakonomo ndi Ondae i Ue.” Umarino atuu mekule iramo a mpo'iangado.

²¹ Doronsoo i Ue i Hana onae ka imentia ka ipe'anaako ira otolu ana ntama ka orua ana beine. Tempo atuu i Semueli anu da mongura, kolangka-langkaino i aro-Do i Ue.

²² I Eli mota'uomo ntu'u. Irongeo luwuakoano anu wineweudo orua ira anano a nto Isaraeli, ranta ka dompe'asa mpoturiako ira beine anu mpompekakaako a mpewowa Kema Tepotowoa.

²³ Onaemo ka ipotaeako ira, ”Kurongeo inso a luwudo to Isaraeli mongkona luwuno wineweumiu anu mosa'o, tembio ka ipoweweu kanatuu?

²⁴ Si kanatuu anaku. Komba lele anu moiko rinongeku pinaleledo bawaa-Do i Ue.

²⁵ Tewala mia tehala a mpe'asa miano, Dopolio Ue Ala mokomoiko ira. Tewala asa mia tehala ndi Ondae i Ue, isema anu ta polio gagi po'oloti?” Sine nahi doperorongeakono patuduno amado, hangano po'ehe-Do i Ue mepate ira.

²⁶ Sine i Semueli anu da mongura, kolangka-langkaino ka tekense Dopekonao i Ue ka mia.

Pinau anu ta gagi mongkona i Eli saru pe'asa rahano

²⁷ Asa nabi hawe ndi Eli ka ipotae ndi onae, ”Kanandiomo pau-Do i Ue: I tempono ue mpu'umiu da ipabawai ira i Pirao i Wita Masiri, mepopoto'ori Akumo ndi ondae.

²⁸ Kubinikiomo inso a luwudo tongku Isaraeli gagi sando mpesomba anu mompesombaako pesomba ndi Ongkue a wawo meda pontunua pesomba, montunu dupa, ka melembaako lemba epo i aro-Ku. Kuweeako iramo inulemu luwuakoano pesombado to Isaraeli anu tinunu a api.

²⁹ Tembio ka nahi upelangkaio pesomba sinumbele ka pesomba kaanga anu kutenaakomiu mempatindao a mpo'iangaa-Ku? Tembio ka upelangkai irapo anamu sekonopo Ongkue, ka impokomadooakono koroimiu bau anu lalu moiko inso a mpesombado bawaa-Ku Isaraeli?

³⁰ Onaemo pu'uno, kanandio pau-Do i Ue, Ue Alado to Isaraeli, lano Kupauomo: Pe'asa rahamu ka inulemu, ira mpopekakaako gagi sando mpesomba i aro-Ku ranta nahina tampulaano. Sine kanandio-andio, kanandiomo pau-Do i Ue: Nahi Aku mokogagio kanatuu, hangano isema anu melangkai Aku Kupelangkaio, sine isema anu me'uru-uru Aku, nahi ta pinerio.

³¹ Nami ta tehine mbo'u tamo ronga hawe tempono, Aku mokomolemako saru inulemu, ranta nami ta hina maupo te'asa mia a inulemu anu melai tinuwuno.

³² Kana iwali, komosisiriakono kumitao luwuakoano poronso-Ku a nto Isaraeli. Tamo kanatuu mpiha, nahi ta hina maupo te'asa mia inulemu anu melai tinuwuno.

³³ Sine asa mia inso i olomiu anu nahi Aku mokompenaa-naao inso a anggaa mompekakaako a meda pontunua pesomba ndi Ongkue, anu ta weweuo matamu mahaki ka me'i'isei aroamu. Luwuno inulemu ira memateako ponaido iwali.

³⁴ Hapa anu ta gagi ndi orua ira anamu, i Hopini ka i Pinehasi, onae ta gagi petondoni ndi omue: i larono asa oleo ira pada mate.

³⁵ Aku motoroo asa sando mpesomba anu metenunu ka melelu menunu kana po'eheno aroa-Ku ka sumanga-Ku. Aku mokohadioo inuleno anu mpetenunu ka mentuwu i arono mia inurapi-Ku.

³⁶ Ka i'amba ba isema inulemu anu da tuwu, ira me'aiwa mpenggolontu mpesombaio ka dompohawe asa doi salaka ke asa roti, ka ira mpotae: ipowee aku anggaa mompokowali anggaado sando mpesomba, poolo ka kupohawe mongkaa asa nsibi roti.”