1 Samueli 19 - Wunta Mempori

I Daudi tepotola inso ndi Saulu

¹ I Saulu motaeakono i Yonata, anano ka luwuno atano, nine i Daudi asalakono ta pinepate. Sine i Yonata, anano i Saulu, tedoa i'ineheakono i Daudi.

² I Yonata pauakono i Daudi, ”Amaku i Saulu mo'ungke-ungkeako ta mepateko. Gagi tisomo mo'oru, pompe'inandai, po'ungke pewuniamu kau pewuni.

³ Aku meluarako lumako a mpada, aku mentade i horido amaku umpeda a mpo'iangaamu atuu. Aku mepau-pauako ira mongkona omue. Kana'umpe leludo, aku koa pauakomu.”

⁴ I Yonata mompauakono amano anu pinemoikono mongkona i Daudi, ipotae, ”Si mansa omiu mokole moweweu anu nahi mentee ndi Daudi, miamiu, hangano nahina wineweuno anu nahi mentee ndi omiu, ka luwuno wineweuno ndi omiu tedoa moiko.

⁵ Ita'oomo penaano mepateo to Pelisiti atuu ka Ondae i Ue moweeako ira to Isaraeli poponangia anu langkai. Ikitaomo ka ipo'undeakono. Tembio ka ihaweako aroamiu moweweu hala a reano mia anu nahina salano, komiu mepateo i Daudi nahina pu'uno?”

⁶ Ipe'ala-alao i Saulu pinauno i Yonata, onaemo ka ipesumpa, ”A nee-Do i Ue anu tuwu, i Daudi nahi ta pinepate.”

⁷ I Yonata moboio i Daudi, ka i'amba pauakono luwuno pinaudo amano. Umarino atuu iwawao i Yonata i Daudi ndi Saulu ka ipo'angga ndi onae kana se'eluno.

⁸ Mansano gagi mbo'u peteaa, i Daudi lumako meteaako ira to Pelisiti ka tedoa langkai ponangido, onae ka dompolai inso ndi onae.

⁹ Kontongaano i Saulu mesana-sanaa i rahano, pabawano mosa'o anu pine'ehe-Do i Ue mewinsokio. Hinao kansai a ngkaeno i Saulu, kontongaano i Daudi memaekono kasapi anu a ngkaeno.

¹⁰ I Saulu ta mepahoakono i Daudi saru kansai atuu a rere. Sine i Daudi ipesiliakono inso a ngkansaino i Saulu anu pinepahoakono a rere. I Daudi molai ka toola wongi atuu.

¹¹ I Saulu tumena ira mia lumako mompora i rahano i Daudi ka dompepateo tempono mo'oru. Sine i Mikali, kombiano i Daudi, pauakono, ”Tewala nahi upolai wongi andio tisomo kopinepate.”

¹² Ka i'amba i Mikali motiio i Daudi mesala a pentangoa. Tolaomo i Daudi, hangano molai.

¹³ Umarino atuu i'alao i Mikali keu tinaha kana mia ka inaao a mpoturia, iponaakono pa'ulua wulu bembe a uluno poturia ka i tutuwiakono hawu.

¹⁴ Hawedo mia tinenano i Saulu rumakoo i Daudi, ipotae i Mikali, ”I Daudi mahaki.”

¹⁵ I Saulu wali tumena ira mia atuu ipotae, ”Imewawao tangki dasano i ndi'ai ka ipinepate.”

¹⁶ Mpewinso iramo mia mentinena atuu, domengkitao hinao keu tinaha a mpoturia atuu ka pa'ulua wulu bembe a uluno poturia.

¹⁷ Ipotae i Saulu ndi Mikali, ”Tembio ka upopo'oo aku kanandio, mo'ineeo iwaliku lumako, ranta kai tola?” Sine sumangki i Mikali, ”Ipotaeakune: Po'ineeomo aku lumako, ke inehemu kupepateko?”

¹⁸ I Daudi molai, ka itola. Onae aiwa ndi Semueli i Rama, ka ipauakono luwu wineweuno i Saulu ndi onae. Ka i'amba lumako iramo i Daudi saru i Semueli mo'ia i Nayoti.

¹⁹ Pinauako i Saulu nine i Daudi mo'ia i Nayoti, Rama.

²⁰ I Saulu tumena ira mia lumako merakoo i Daudi. Sine, domengkitao asa bawaa nabi kontongaado mebukeako Penaa, i Semueli petewawado. Luwuno mia mentinenano i Saulu atuu, ipabawai ira koa mbo'u Penaa-Do Ue Ala, ranta ondae mbo'u kana iramo nabi.

²¹ Mansano pinauako i Saulu anu gagi atuu, onaemo kai wali montena mia susua, sine ondae koa mbo'u mebukeako Penaa kana nabi. Kopentoluno i Saulu montena mbo'u mia, ka ondae koa mbo'u mebukeako Penaa kana nabi.

²² Ka i'amba lumako onaeno i Rama, ka hawe a nsumuru langkai i Seku, mesikenoomo, ”Isua ira i Semueli ka i Daudi?” Sumangki mia atuu, ”Kongko ira i Nayoti, i Rama.”

²³ Lumakoomo i Saulu i Nayoti, i Rama, sine da a nsala, ipabawaiomo Penaa, a laro pelempaano bukeako Penaa kana nabi ranta kai hawe i Nayoti, i Rama.

²⁴ Ilohuo i Saulu sangkano ka bukeakoomo Penaa kana nabi i arono i Semueli. Asa oleo ka asa wongi atuu itepombole kolambe-lambe. Onaemo ka dompotae mia, ”Saru mbo'u i Saulu ke tewinso nabi?”