1 Samueli 17 - Wunta Mempori

I Golia umewai ira puu peteado to Isaraeli

¹ To Pelisiti pumpu ira sorodadudo ira mpe'iwali. Mpepumpu ira i Soko a witado to Yehuda ka mpekema i olono Soko ka Aseka i Epesa-Dami.

² I Saulu ka to Isaraeli mpepumpu ira koa mbo'u ka dompekema i Lembono Tarabanti. Dome'atorao baresi mpeteado umaropi ira to Pelisiti.

³ To Pelisiti mpentade a pongkuno wita anu asa ka to Isaraeli mpentade a mpongku wita susuano, ka hinao lembono i olodo.

⁴ Me'umbaakoomo inso i olodo sorodadu Pelisiti asa mia anu pinerorohido, meneeako i Golia, inso i Gati. Ondauno onoo hiku ka asa otuwe.

⁵ I uluno hinao songko mala, onae mompake lemba sira; mobeano lemba sira atuu lima nsowu sikala mala.

⁶ Pontutuwi inso a mala rau a ngkaruno ka kansai mala ipesambao.

⁷ Tangke kansaino kana keu pompalulua hinoru, mobeano mata kansaino nomo etu sikala labu, ka asa mia mowawa kanta melempa i arono.

⁸ Onae mentade ka ipebooliako ira puu mpeteado to Isaraeli, ipotaeako ira, ”Tembio ka impeluarako luwu mpo'atora baresi mpetea? Nde nahi mento'orioke, ongkue andio to Pelisiti ka omiu luwu atano i Saulu? Impobinikimo te'asa mia i'olomiu kai petii umaropi aku.

⁹ Tewala ipokonangi aku ka ipepate aku, kami megagi atamiu. Sine tewala ongkue anu monangi ka kupepateo, komiu megagi ata mami ka komiu ntepe'ata ndi omami.”

¹⁰ Motae mbo'u to Pelisiti atuu, ”Oleo andio baresido to Isaraeli nahi kurekeo. Impobinikimo te'asa mia kai aiwa tumaroi aku.”

¹¹ Rumongeo pepauno to Pelisiti atuu, i Saulu ka luwudo to Isaraeli mpondende iramo medoito.

I Daudi mosia umaropio i Golia

¹² I Daudi anano i Isai to Eparata inso i Beteleme-Yehuda. I Isai hinao anano oalu ira tama. Tempono poparentaano i Saulu, mia atuu mota'uomo ka pinemota'u.

¹³ Otolu ira anano i Isai anu te'aka, dotondaomo i Saulu metea. Needo otolu ira anano anu melako mpetea atuu, onaemo: anu aka, i Eliabi, anu ko'orua, i Abinada, ka anu ko'otolu, i Siama.

¹⁴ Anu tompasusu onaemo i Daudi. Ko'otolu ira anano anu te'aka atuu melako mentondao i Saulu.

¹⁵ Sine i Daudi wela mekule inso ndi Saulu, lumako mompakambi bimbano amano i Beteleme.

¹⁶ I larono pato pulu oleo, mo'oru ka ngkiniwia, to Pelisiti atuu wela aiwa umewa.

¹⁷ I Isai motaeakono i Daudi anano, ”Po'alaako ira akamu asa efa gandu hinolei ka hopulu roti andio. Pontuturako lako a mpekemaa ndi ondae akamu.

¹⁸ Ka hopulu mpole keju andio wawaakono petewawa puu mpetea asa nsowu. Tepohaweako ira koa luwu akamu ka powawa petondoni inso ndi ondae.

¹⁹ I Saulu saru ondae ka luwudo to Isaraeli kontongaado mpeteaako ira to Pelisiti i Lembono Tarabanti.”

²⁰ Da mo'oru mewanguomo i Daudi ka ipeweengakono bimbano a asa mia puu mpodagai. Lumakoomo i Daudi ka iwawao anu itenaakono i Isai. Kontongaado sorodadu mpeluarako mpo'atora baresido ka domengkora.

²¹ To Isaraeli ka to Pelisiti, mpebaresi ntepopo'aro.

²² I Daudi meweengakono luwuno sangkado a ngkaeno puu podagai sangka ka ipelulu tetutu a baresi. Kohaweno i ra'ai mesikeno a pepaekompono mongkona teweweudo.

²³ Kontongaano mepauako ira, meluarakoomo asa mia anu pinerorohi inso a puu mpeteado to Pelisiti. Neeno i Golia to Pelisiti inso i Gati. Ipauo luwuno pau anu mengkena kana se'eluno ka irongeo i Daudi.

²⁴ Kumitao mia atuu, luwudo to Isaraeli mpolai me'olaiakono hangano tedoa ira medoito.

²⁵ Dompotae to Isaraeli, ”Imengkitaomoke mia meluarako arau? Onae aiwa me'uru-uru kita to Isaraeli. Isema anu mepateo, ondae mokole mokokaeao langkai, mokole ta meweengakono anano beine ndi onae ka pe'asa rahano nahi ira mpo'owahi sima'ulu i Isaraeli.”

²⁶ Ka i'amba i Daudi motaeako ira mia anu mpentade umpeda ndi onae, ”Hapa anu ta wineweuto a mia anu mepateo to Pelisiti atuu ka moko'olaio pompe'uru-uruno a nto Isaraeli? Isema to Pelisiti anu nahi petindi atuu, ka ipe'uru-uru ira puu mpetea-Do Ue Ala anu tuwu?”

²⁷ Mesangki ira mia atuu kana pau anu mengkena, ”Kanatuumo ta wineweu a mia anu mepateo.”

²⁸ Mansano rumongeo i Eliabi, pepaekompono te'aka pepauno i Daudi saru mia atuudo, tekuda i Eliabi ka ipotaeakono i Daudi, ”Tembio kau aiwa? Ndi sema upeweengakono asa bawaa bembe bimba anu ba opia atuu i pada one? Kuto'orio koweweemu ka pe'akalapimu. Aiwako komongkita peteaa.”

²⁹ Sine sumangki i Daudi, ”Hapa anu wineweuku? Butu aku mesikeno.”

³⁰ Ka i'amba lumako a mia susua mesikeno kana hieno. Luwudo mia atuu mengkena sangkido kana sangkido mia anu sinikenono se'elu.

³¹ Pinauno i Daudi domerongeo mia hadio, ka domempauakono i Saulu. Onaemo ka ipontena mia i Saulu moboio.

³² Motae i Daudi ndi Saulu, ”Kasi mansa domengkodei aroa mia hangano onae, atamiu andio ta lako umewaio to Pelisiti atuu.”

³³ Sine ipotae i Saulu ndi Daudi, ”Nahi kopolio tumaroio to Pelisiti atuu, da tedoako mongura, onae atuu da mongura gagiomo sorodadu.”

³⁴ Ipotae i Daudi ndi Saulu, ”Atamiu andio leleo mompakambi asa bawaa bembe bimbado i ama. Sompo ihina singa ke berua hawe momperangkami asa bimba inso a bawaano,

³⁵ kululuo, kutunduhio ka kupotolao bimba atuu inso a ngangano. Tempono ta merangkami aku, kusangkuo danggono ka kutunduhio ranta ka imate.

³⁶ Atamiu andio mompepateomo singa ka berua. To Pelisiti anu nahi petindi atuu ta mengkena kana asa kodehora atuu, hangano ipe'uru-uru iramo puu mpetea-Do Ue Ala anu tuwu.”

³⁷ Ipotae mbo'u i Daudi, ”Ondae i Ue anu motola akumo inso a kukuno singa, ka kukuno berua, Ondae koa mbo'u ta motola aku inso a ngkaeno to Pelisiti atuu.” Ipotae i Saulu ndi Daudi, ”Lakomo! Ondae i Ue kumongkomiko.”

³⁸ Ka i'amba i Saulu mokonaakono sangka mpeteano ndi Daudi, ipokonaakono songko mala a uluno, ka ipokonaakono lemba sira.

³⁹ Ipetanggoakono i Daudi ponaino a lemba mpeteano ka ipompete'umala melempa, hangano napi hori umarahakono. Motae i Daudi ndi Saulu, ”Nahi kupokompelempa saru luwuno andio, nde nahi kuhori umarahakono.” Onaemo kai lohuo i Daudi.

Tepotarodo i Daudi ka i Golia

⁴⁰ Iwawao i Daudi tukono a ngkaeno, ka i'amba mobiniki olima watu anu molori inso a ngkorono anu mo'are ka iwinsoo a ngkadu-kadu mpopakambino. Saru kembi a ngkaeno kai umpedaakono to Pelisiti atuu.

⁴¹ To Pelisiti atuu melempa ko'umpe-umpedano ndi Daudi ka i arono hinao puu mpowawa kanta.

⁴² Mansano to Pelisiti atuu mengkita ka ikitao i Daudi, ipe'uru-uruo hangano i Daudi da mongura, kombisino mororontaha ka montama rupano.

⁴³ To Pelisiti atuu motaeakono i Daudi, ”Dahu akuke ranta kau aiwa tumotowoakune tuko?” Ka i'amba to Pelisiti atuu tumotonaao i Daudi a neeno luwuno anu pinesombai susua.

⁴⁴ To Pelisiti atuu motae mbo'u ndi Daudi, ”Aiwamo ramai! Baumu aku weeako ira manu-manu i laro meene ka kondehora a ntonga mpada.”

⁴⁵ Motae i Daudi a nto Pelisiti atuu, ”Omue tumotowoakune ponai, kansai, ka pando sine ongkue tumotowoko a nee-Do Ueno luwuakoano, Ue Ala puu mpeteado to Isaraeli anu pine'uru-urumu.

⁴⁶ Oleo andio Ondae i Ue Ira meweengakomu a ngkaeku ka aku mepateko ka aku poleo ulumu. Oleo koa mbo'u andio wata ngkoroido sorodadu to Pelisiti aku weeako ira manu-manu i laro meene ka kondehora mo'ila, ka domento'orio asa wawontolino nine to Isaraeli hinao Ue Alado.

⁴⁷ Luwuno mia anu tepumpu i ndi'ai ira mento'orio nine Ondae i Ue mongkadudui komba mompake ponai, kansai ke pando, hangano peteaa andio peteaa-Do i Ue. Ondae Ira meweengakomiu a ngkae mami.”

⁴⁸ Mansano lumako to Pelisiti atuu umpedaakono ta umewaio i Daudi, mompari-pariomo i Daudi melulu te'aro a puu mpeteado iwali ta umaropio to Pelisiti atuu.

⁴⁹ Iwinsoo i Daudi kaeno a laro ngkadu-kadu atuu. I'alao asa watu ka ipesembiakono, koona a ra'ino to Pelisiti atuu. Watu atuu tetano a ra'ino onaemo ka itebangku rupano a wita.

⁵⁰ I Daudi numangiakono kembi ka watu a to Pelisiti atuu. Inangio to Pelisiti atuu ka ipepateo. Nahina ponai a ngkaeno i Daudi.

⁵¹ Meluluomo i Daudi ka ipentade i horino i Golia, ibutao ponaino inso a tampino. I Daudi mepateo ka ipoleakono ponai uluno. Mansano domengkitao to Pelisiti nine pongkiarido mateomo, mpolai iramo.

⁵² Melako iramo to Isaraeli ka to Yehuda mengkokora-kora ka domelulu ira to Pelisiti ranta hawe umpeda i Gati ka a mpewowa langkai Ekoroni. To Pelisiti anu mempinepate tepopombole asa ngkeu sala te'aro i Sa'araimi, hawe i Gati ka Ekoroni.

⁵³ Umarido melulu ira to Pelisiti, mpekule iramo to Isaraeli mempomuruo pekemado.

⁵⁴ I'alao i Daudi uluno i Golia ka iwawao i Yerusale, sine sangka mpeteano inaao a laro ngkemano onaeno.

⁵⁵ Mansano kumitao i Saulu peluarakono i Daudi umaropio to Pelisiti atuu, mesikenoomo ndi Abinere, tadulako sorodaduno, ”Anano isemake ana mongura atuu?” Sumangki i Abinere, ”Tabeamiu mokole, nahi kuto'orio.”

⁵⁶ Ipotae mokole, ”Lakomo pesikenoakono, anano isema ana mongura atuu.”

⁵⁷ Mansano mekule i Daudi umarino mepateo i Golia, i Abinere moboio ka iwawao me'aro ndi Saulu. Uluno i Golia atuu da kongko a ngkaeno i Daudi.

⁵⁸ Mesikeno i Saulu ndi Daudi, ”Oo ana mongura, umue anano isema?” Sumangki i Daudi, ”Ongkue anano atamiu i Isai, to Beteleme.”