1 Samueli 16 - Wunta Mempori

I Semueli umurapio i Daudi

¹ Pau-Do i Ue ndi Semueli, ”Ranta hawe te'ipia masusano aroamu hangano i Saulu, ka hinaano lano nami Kubeheo gagi mokoledo to Isaraeli? Alaomo lana saitu kau ihiio tandu ponaapamu lana ka lakomo. Aku tumenako lumako ndi Isai to Beteleme, hangano i olodo luwuno anano, Kubinikiomo asa mia gagi mokoledo bawaa-Ku.”

² Ipotae i Semueli, ”Kana'umpe ka aku lumako? Tewala irongeo i Saulu, ta mepate aku.” Pau-Do i Ue, ”Wawao asa sapi da mongura kau pauo, ’aku aiwa mompesombaako pesomba ndi Ondae i Ue.’

³ Oluo i Isai a mpoweweua gau mpesomba atuu. Aku koa pauakomu hapa anu ta wineweumu. Mia anu kupauakomu, onae anu ko'umurapio.”

⁴ Iweweuo i Semueli menunu kana pau-Do i Ue. Mansano hawe i Beteleme, mpondende ira mia mota'u mentotowoo, ka dompotae, ”Hawemiu andio, nde mowawa komiu moikoa?”

⁵ Isangki ira, ”Humbee, mentee! Aku aiwa mompesombaako pesomba ndi Ondae i Ue. Impokomemporio koroimiu ka ime'aiwa a mpoweweua gau mpesomba saru ongkue.” Ka i'amba mokomemporio i Isai saru luwuno anano anu tama ka i'olu ira a mpoweweua gau mpesomba.

⁶ Mansado mehawe, ikitao i Semueli i Eliabi, kai pewowoloo, ”Manasa, i aro-Do i Ue, mentade mia anu Inurapi-Do.”

⁷ Sine pau-Do i Ue ndi Semueli, ”Si kitao rupano ke koroino anu ondau, hangano nami Kubeheo. Komba kana pongkitado mia, hangano mia mongkita hapa anu i arono matano, sine Ondae i Ue mongkita aroano.”

⁸ Umarino atuu i Isai moboio i Abinada ka itenao telalo i arono i Semueli, sine ipotae i Semueli, ”Mia mbo'u andio nahi Dobinikio i Ue.”

⁹ Ka i'amba i Isai tumenao i Sama ka itelalo, sine ipotae i Semueli, ”Onae mbo'u andio nahi Dobinikio i Ue.”

¹⁰ Kanatuumo i Isai tumena ira opitu anano mpe'eu-eu telalo i arono i Semueli, sine ipotae i Semueli ndi i Isai, ”Luwudo andio nahi Dobiniki ira i Ue.”

¹¹ Ka i'amba mesikeno i Semueli ndi Isai, ”Onaemo luwuke andio anamu?” Sumangki i Isai, ”Da hinao asa anu tompasusu, sine kontongaano mompakambi asa bawaa bembe bimba.” Motae i Semueli, ”Pontena mia lumako umalao, hangano nahi kita mpongkaa, ba napi hawe i ndi'ai.”

¹² Ka i'amba i Isai montena mia lumako umalao. Kombisino mororontaha, matano tekosi ka montama koroino. Mepau Iramo i Ue, ”Pentademo urapio, nde onaemo andio mia bininiki-Ku.”

¹³ I'alao i Semueli tandu anu me'ihiako lana saitu atuu kai urapio i Daudi i olodo pepaekompono. Mompu'u oleo atuu Penaa-Do i Ue pabawaio ka kumongkomio mpiha i Daudi. Umarino atuu mekuleomo i Semueli i Rama.

I Daudi gagi puu pompekakaakono i Saulu

¹⁴ Kontongaano atuu Penaa-Do i Ue bintao i Saulu, onaemo ka itebobarasai hangano pabawano i mosa'o anu pine'ehe-Do i Ue.

¹⁵ Luwuno atano i Saulu motaeakono, ”Kau to'orio koa, pabawa anu mosa'o inso ndi Ondae Ue Ala weweuko ka utebobarasai;

¹⁶ po'ineeomo ueku itena ira atamiu anu mekakaa komiu mo'ungke asa mia anu pande memae kasapi. Tewala hawe pabawa mosa'o anu inso ndi Ondae Ue Ala atuu mewinsoki komiu, asalakono kai pemae kasapi, ranta ka irodo.”

¹⁷ Ipotaeako ira i Saulu luwuno atano atuu, ”Impo'ungkeakunemo asa mia anu pande memae kasapi ka wawaomo ndi ongkue.”

¹⁸ Sumangki asa mia atano, ”Menteeano kukitaomo asa mia anano i Isai to Beteleme, anu pande memae kasapi. Onae asa sorodadu anu mosia, pande mepau, montama koroino. Ondae i Ue kumongkomio.”

¹⁹ Ka i'amba i Saulu montena mia lumako ndi Isai saru pe'oliwi, ”Tenaomo i Daudi, anamiu anu kontongaano mompakambi asa bawaa bembe bimbano kai aiwa ndi ongkue.”

²⁰ Onaemo kai alao i Isai asa kalide, ipatekeo roti, asa kadu kuli anggoro ka asa ana bembe. Ka itenao i Daudi, anano, wawaakono i Saulu.

²¹ Kanandiomo i Daudi hawe ndi Saulu ka igagi puu pompekakaakono. Onae tedoa ipehohawao i Saulu, ka onae gagi puu mpowawa sangka mpeteano.

²² Ka i'amba i Saulu montena mia lumako ndi Isai saru pe'oliwi, ”Po'ineeomo i Daudi ka ikongko gagi puu pompekakaakoku, hangano mawongko aroaku ndi onae.”

²³ Gagi, sompo tempo pabawano i mosa'o anu inso ndi Ondae Ue Ala mewinsokio i Saulu, i'alaomo i Daudi kasapino ka ipemaeakono. Tetareroomo i Saulu ka rodoomo aroano; penaa mosa'o atuu meluarakoomo inso ndi onae.