1 Samueli 15 - Wunta Mempori

I Saulu nami Dobeheo i Ue gagi mokole

¹ Motae i Semueli ndi Saulu, ”Ongkue Dotena akumo i Ue umurapiko gagi mokoledo to Isaraeli bawaa-Do. Gagi, perorongeakono pau-Do i Ue.

² Kanandio pau-Do i Ue luwuakoano: Aku mbaloo hapa anu wineweudo to Amale a nto Isaraeli. Dotowoki ira to Isaraeli tempono dompeluarako inso i wita Masiri.

³ Kanandio-andio, lakomo ka nangi ira to Amale. Pokoropuo luwuakoano anu hina ndi ondae ka sipehohawa ira. Pepate ira luwuno tama, maupo beine, nana'ote maupo ana dalo, sapi maupo bimba, unta maupo kalide.”

⁴ Onaemo ka ipumpu ira i Saulu palili ka iparesao baresido i Telaimi, rua etu nsowu mia puu mpetea mpelempa ngkaru ka hopulu nsowu mia to Yehuda.

⁵ I Saulu haweomo umpeda i kotado to Amale ka itena ira sorodaduno mpewuni a ngkorono mo'are.

⁶ Ipotaeako ira i Saulu to Keni, ”Imelakomo te'olai inso i olodo to Amale, ka sikuropu komiu saru ondae, hangano imempopokitaomo pe'aroamiu a luwudo to Isaraeli tempono dompeluarako inso i wita Masiri.” Mpeliahako iramo to Keni inso i olodo to Amale.

⁷ I Saulu numangi ira to Amale mompu'u inso i Hawila hawe i Suri, i sabaano oleo wita Masiri.

⁸ I Aga, mokoledo to Amale, domerakoo tuwu-tuwu, sine luwuno palilino domeropuako ira mata mponai.

⁹ Sine i Saulu ka luwuno palili nahi dompepateo i Aga. Kanatuukoa mbo'u asa bawaa bembe bimba ka sapi anu tekosi ka mewalo, ana bimba ka luwuno anu masuli olino nahi domebehe mpokoropuo. Sine luwuno anu nahina olino ka anu mosa'o dompokoropuo.

¹⁰ Haweomo pau-Do i Ue ndi Semueli,

¹¹ ”Me'o'ole Aku motoroo i Saulu gagi mokole, hangano ipebungkui aku ka nahi tondao pau-Ku.” Mompemasusaomo i Semueli, onaemo ka ipekakai ndi Ondae i Ue asa wongi.

¹² Da mo'oru, mewanguomo i Semueli lumako ta tepohaweakono i Saulu, sine pinauako i Semueli nine, ”I Saulu lumakoomo i Karameli mowangu tugu petondoni poponangino. Ka i'amba mekule lumako i Giliga.”

¹³ Mansano hawe i Semueli ndi Saulu, motaeomo i Saulu ndi Semueli, ”Ondae i Ue rumonsokomiu! Umariomo kupolempao songka-Do i Ue.”

¹⁴ Sine motae i Semueli, ”Tewala kanatuu, tembio kai hina pebeelido asa bawaa bembe bimba, pe'ongelino sapi anu rinongeku?”

¹⁵ Motae i Saulu, ”Luwuno atuu mewinawa inso a nto Amale. Dompo'inee ira palili nahi dompepate ira asa bawaa bembe bimba, ka sapi anu tekosi ta pinesombaako ndi Ondae i Ue, Ue Alamiu, sine toreano kimpepateo luwu.”

¹⁶ ”Sompoomo!” Motae i Semueli ndi Saulu, ”Aku pauakomu hapa pau-Do i Ue ndi ongkue hieno wongi.” Sumangki i Saulu, ”Ipauomo.”

¹⁷ Motae i Semueli, ”Maupo ukodei potaeno aroamu, komba omue ke petewawado to Isaraeli? Omue umariomo Do'urapiko i Ue gagi mokoledo to Isaraeli.

¹⁸ Omue Dotenako i Ue, saru pe'oliwi: Lakomo peteaako ira ranta ka domeropu to Amale, mia mentehala atuu, ka peteaako ira ranta kau pokoropu ira.

¹⁹ Tembio ka nahi uperorongekono pau-Do i Ue? Tembio kau po'ala pinomuru kau poweweu anu mosa'o a pongkita-Do i Ue?”

²⁰ Motae i Saulu ndi Semueli, ”Tendeano kurongeokoa pau-Do, onaemo ka kulako kana petena-Do i Ue. Kuwawao i Aga mokoledo to Amale, ka palilino pingko kuropu ira.

²¹ Sine palili mpo'ala ira inso a pinomuru atuu asa bawaa bembe bimba ka sapi anu tekosi inso a luwuno anu ba kanaano ta rinopu. Ira mingki mpesombaakono ndi Ondae i Ue, Ue Alamiu, i Giliga.”

²² Sine ipotae i Semueli, ”Nde Ira memoikoo i Ue pesomba tinunu ka pesomba sinumbele, mengkena kana momperorongeako pau-Do i Ue? Menteeano, moikoopo momperorongeako, sekonopo pesomba sinumbele, tumondao songka-Do, moikoopo sekono tabano bimba laki.

²³ Mo'ewai songka mengkena halano kana mia puu mpososa'ori. Nahi pomperorongeako mengkena kana mosaono mia mpelahumoa. Hangano omue umewaiomo pau-Do i Ue, omue nami Dotarimako mbo'u gagi mokole.”

²⁴ Motae i Saulu ndi Semueli, ”Tehala akumo ndi Ondae i Ue hangano ku'ewaiomo songka-Do ka paumiu, hangano kudoitoako ira palili onae ka kutondaako ira po'ehedo.

²⁵ Kanandio-andio, ipehohawa aku siimo ikitaakune halaku. Pekulemo saru ongkue, ka kupokompesomba koa ndi Ondae i Ue.”

²⁶ Sine ipotae i Semueli ndi Saulu, ”Nahi aku behe mbo'u merongaakomu, hangano omue u'ewaiomo pau-Do i Ue, nde Ondae i Ue mbo'u nami Dotarimako gagi mokoledo to Isaraeli.”

²⁷ Mansano mewolili i Semueli ta lumako, i'inio i Saulu untuno lemba meloeno i Semueli ranta kai teberi.

²⁸ Ka i'amba motae i Semueli ndi onae, ”Oleo andio Dokansao i Ue poparentaa Isaraeli inso ndi omue ka Doweeakono mia susua anu moikoopo sekono omue.

²⁹ Ondae i Ue Anu Maramba, Ue Alado to Isaraeli, nahi Dopegaupi, hangano Ondae komba mia ka Ira me'o'ole.”

³⁰ Motae i Saulu, ”Lano tehala akumo, sine kanandio-andio popokitao pontudumiu ndi ongkue i arodo luwuno mia mota'u tongku andio ka to Isaraeli. Ipekulemo saru ongkue ka kupokompesomba ndi Ondae i Ue, Ue Alamiu.”

³¹ Umarino atuu i Semueli wali tumondao i Saulu. Ka i'amba i Saulu mesomba ndi Ondae i Ue.

³² Motae i Semueli, ”Wawao ndi ongkue i Aga, mokoledo to Amale.” Haweomo i Aga ndi Semueli, mawongko aroano hangano ipewowoloo, ”Nahi ta pinepate.”

³³ Sine ipotae i Semueli, ”Kana pinembasaido hadio beine anu ntetadi anado hangano ponaimu, kanatuukoa mbo'u ta membasaio inemu tetadi anano i olodo hadio beine.” Ka i'amba i Semueli sumumbeleo i Aga i aro-Do i Ue i Giliga.

³⁴ Ka i'amba i Semueli lumako i Rama, sine i Saulu lumako i rahano i wita Gibea-Saulu.

³⁵ Ranta kai mate i Semueli, nami hori mbo'u tepohaweakono i Saulu. Masusa aroano i Semueli hangano wineweuno i Saulu ka me'o'ole Ira i Ue motoroo i Saulu gagi mokoledo to Isaraeli.