1 Samueli 14 - Wunta Mempori

¹ Asa tempo, motae i Yonata, anano i Saulu ndi atano anu mowawa sangka mpeteano, ”Aiwa ka tolako a mpo'iangado puu mpeteado to Pelisiti anu mpodagai i asambalino i ra'ai.” Sine nahi pauakono amano pinewowolono atuu.

² I Saulu kontangaano mentoro a ntoto ngkeu delima i Magironi, nahi olai inso i Gibea saru palili anu mentondao bara'ura nomo etu mia.

³ I Ahia anano i Ahitubi, pepaekompono i Ikabo, anano i Pinehasi, anano i Eli, sando mpesomba-Do i Ue i Silo, mowawa epo. Nahi domento'orio palili nine i Yonata lumakoomo.

⁴ I olono luwuno petosia a pongkuno wita anu i'arahakono i Yonata lumaloo te'aro a puu mpeteado to Pelisiti anu mpodagai, hinao punsuno pongku watu, i asa mbalino ka punsuno pongku watu a asa mbalino susua. Anu asa meneeako Bosesi ka anu susua meneeako Sene.

⁵ Punsuno anu asa mantande kana keu pinontade i utara, i asambalino Mikamasi ka anu susua i selata asambalino Geba.

⁶ Motae i Yonata ndi atano anu wawao sangka mpeteano, ”Aiwa ka tolako dumadu ira puu mpetea mia anu nahi dompetindi atuu. Bara'ura Ondae i Ue Ira tumulungi kita, hangano Ondae i Ue Dopolio montulungi maupo hadio mia ke tedei mia.”

⁷ Motae anu mowawa sangka mpeteano ndi onae, ”Weweuomo tinoono aroamu. Po'asao aroamu, aku tumondao.”

⁸ Motae i Yonata, ”Kanandio-andio kita telalo a mia atuudo ka mepopokita ndi ondae.

⁹ Tewala dompotaeakita: ’Si mpelelu, kami me'aiwa ndi omiu,’ gagi toperodo-rodo ka si topewuatako a mpo'iangado.

¹⁰ Sine tewala mpotae ira: ’Iporakemo ramai,’ gagi toporake, hangano Dopeweengako iramo i Ue a ngkaeto. Onaemo tondonino ndi ontae.”

¹¹ Mansado lumako orua ira mepopokita a puu mpeteado to Pelisiti anu mpodagai, mpotae iramo to Pelisiti, ”Kitao, to Ibarani mpeluarako iramo inso a ngkineke pewuniado.”

¹² Mpebooli iramo sorodadu mpodagai atuu ndi Yonata ka atano anu mowawa sangka mpeteano, ”Iporakemo ramai! Kami mpoweeakomiu patudu.” Ipotaeakono i Yonata anu mowawa sangka peteano, ”Tonda aku, Dopeweengako iramo i Ue a ngkaedo to Isaraeli.”

¹³ I Yonata saru anu mowawa sangka mpeteano umo'ambau mewuatako i wawono. Luwuno mia atuudo ntebobangku i arono i Yonata ka anu mowawa sangka mpeteano rumopu ira inso ibungkuno.

¹⁴ Tenangia anu amba-ambano anu wineweuno i Yonata saru anu mowawa sangka mpeteano, mompepate bara'ura rua pulu mia a wita anu molueno entonga lere pompadekoa.

¹⁵ Ka mpondende iramo a mpekemaa, a mpeteaa, ka ia olodo luwuno palili. Puu mpetea mpodagai ka puu mpetea mporopu, mpondende ira koa mbo'u. Wawontolino mbo'u mondende. Gagiomo pondendea anu mongkokongiri.

¹⁶ Puu pompadasono i Saulu i Gibea-Benami mengkitao howudo sorodadu ntesiarawo ngkoraane-ngkoramai.

¹⁷ Ipotaeako ira i Saulu palili anu mentondao, ”Imemparesao ka imengkitao isema anu nami kongko ndi ontae.” Domemparesao baresido, i Yonata ka anu mowawa sangka mpeteano nami dokongko.

¹⁸ Motae i Saulu ndi Ahia, ”Wawao Burua Pedandia-Do Ue Ala i ndi'ai.” Tempo atuu Burua Pedandia-Do Ue Ala mo'ia i olodo to Isaraeli.

¹⁹ Kontongaano i Saulu mepauakono sando mpesomba atuu, gagiomo marisua langkai a mpekemaado to Pelisiti. Ipotaeakono i Saulu sando mpesomba atuu, ”Sompoomo, potiiomo kaemu!”

²⁰ Umarino atuu mpepumpu iramo i Saulu saru palili anu mentondao. Mansado mehawe a mpeteaa domengkitaomo sompo mia tumoboakono ponai walino, asa marisua anu tedoa langkai.

²¹ Ka do'amba to Ibarani anu mentinambodo to Pelisiti anu mpekema saru ondae, wali ira mpewolili ntepo'asa saru to Isaraeli anu mentondao i Saulu ka i Yonata.

²² Mansado merongeo luwudo to Isaraeli anu mpewuni a mentorukuno Eparai nine to Pelisiti mpolai iramo, me'aiwa iramo luwuno mia atuu ntepo'asaako ira walido a mpeteaa.

^23a Kanandiomo Dokadudui ira i Ue to Isaraeli oleo atuu.

I Yonata tola inso a mpototonaa

^23b Peteaa ranta hawe lumaloo Beti-Awe.

²⁴ Tempono dompembasaio to Isaraeli tedadodo oleo atuu, i Saulu tumena ira palili mpesumpa, ”Tetotonaaomo mia anu mongkaa hapamokoa se'eluno napi ngkiniwia, ba napi kupombalo pontooku a iwaliku.” Onaemo pu'uno luwuno palili nahi dompongkaa maupo tedeimokoa.

²⁵ Tempono luwuno palili mehawe a ntobu, domengkitaomo siu hoani a wawo wita.

²⁶ Mansado palili mehawe a ntobu atuu domengkitao siu hoani nte'i'iti i ra'ai, sine nahina maupo te'asa mia anu tumineo kaeno ka sumile'io, hangano medoito ira a sumpa atuu.

²⁷ Sine i Yonata nahi rongeo petenano amano a mpalili ka dompesumpa. Ipesodoliakono tuko a ngkaeno a inenano hoani ka isile'io ka matano waliomo mewine.

²⁸ Asa mia inso a mpalili motae, ”Amamu tumena ira palili ka dompesumpa ntu'u, ipotae: Tetotonaaomo mia anu mongkaa hapamokoa oleo andio, onaemo palili ka domemolema ka ntelusa.”

²⁹ Ka i'amba motae i Yonata, ”Ondae amaku dopokomasolaomo wita. Kitao, moroso akumo, mataku wali mewine umariku monsile'i siu hoani tedei.

³⁰ Tamoako, ande-andeno oleo andio palili me'ineheako ira mpokaa pinomuru inso a iwalido, manasa to Pelisiti ira mentenangi langkai.”

³¹ Oleo atuu domenangi ira to Pelisiti inso i Mikamasi hawe i Ayaloni. Palili tedoa iramo memokendo ka ntelusa,

³² onaekoa ka domposintaki pinomuru. Dome'alao asa bawaa bembe bimba, sapi saru anano, domensumbeleo a wita ka domengkaano saru reano.

³³ Ka i'amba hinao pauakono i Saulu, ”Kitao, palili ntehala iramo ndi Ondae i Ue hangano domengkaano bau saru reano.” Ipotae, ”Mpo'ewaikomiumo sumpa. Kanandio-andio impowalundimo asa watu langkai i ndi'ai.”

³⁴ Ipotae mbo'u i Saulu, ”Imelakomo mempauako ira luwuno palili, Sompo mia asalakono kai powawa sapi ke bimbano ndi ongkue, imensumbeleomo ka imengkaano i ndi'ai. Sine simpoweweu hala ndi Ondae i Ue, mengkaano saru reano.” Umarino atuu luwuno palili, wongi koa atuu sisingge ira mpowawa sapino ka domensumbeleo i ra'ai.

³⁵ I Saulu mowangu pontunua pesomba ndi Ondae i Ue; onaemo pontunua pesomba ndi Ondae i Ue anu amba-ambano ntu'u winanguno.

³⁶ Ka i'amba motae i Saulu, ”Aiwa ka tomelulu ira to Pelisiti wongi andio ka topomuru ira ranta hawe meene. Tompepate ira luwu.” Mesangki ira palili, ”Iweweuomo hapa anu pinemoikomiu.” Sine ipotae sando mpesomba, ”Aiwa ka tompo'ema pontiso-Do Ue Ala i ndi'ai.”

³⁷ I Saulu mo'ema pontiso-Do Ue Ala, ipotae, ”Tewala ipeweengako ira to Pelisiti a ngkaedo to Isaraeli, ba Ipemoikoo aku lumulu ira wongi andio.” Sine i oleo atuu nahi Dosangkio i Saulu.

³⁸ Ka i'amba motae i Saulu, ”Luwuno petewawa palili ime'aiwa i ndi'ai. Impepenteeo, hala hapa anu wineweu oleo andio ka igagi kanandio.

³⁹ A nee-Do i Ue anu tuwu, anu kumadudui ira to Isaraeli, tewala hangano wineweuno i Yonata, maupo anaku asalakono hinuku mate.” Sine luwuno palili atuu nahina sumangkio.

⁴⁰ Ka i'amba motaeako ira luwudo to Isaraeli, ”Impentademo i tu'ai, ongkue saru anaku i Yonata i ndi'ai.” Dompotae palili ndi Saulu, ”Iweweuomo hapa anu pinemoikomiu.”

⁴¹ Motae i Saulu, ”Oo Ue, Ue Alado to Isaraeli, tembio nahi sangkio tetenaa-Miu oleo andio? Tewala anu moweweu sala andio ongkue, ke anaku i Yonata, oo Ue, Ue Alado to Isaraeli, Itisoa kamimo watu Urimi; Sine tewala anu moweweu sala andio bawaa-Miu to Isaraeli, Ipokomengkaao watu Tumimi.” Ka hinaweomo salado i Yonata ka i Saulu sine palili mentola.

⁴² Motae i Saulu, ”Pontadimo undi i oloku ka anaku i Yonata.” Ka i'amba hinawe i Yonata.

⁴³ Motae i Saulu ndi Yonata, ”Pauakune hapa anu umari wineweumu.” Sumangki i Yonata ipotae, ”Lano umari aku monsile'i siu hoani tedei anu kusodoliakono tuko anu ininiku. Mepatinda akumo mate.”

⁴⁴ Motae i Saulu, ”Po'ineeomo Ondae Ue Ala humuku aku mobea, maupo torea mbo'u, tewala omue nahi uhinuku mate, Yonata.”

⁴⁵ Sine palili mpotaeakono i Saulu, ”Nde i Yonata anu mowawa poponangi langkai i Isaraeli asalakono ta mate? Osi'i! A nee-Do i Ue anu tuwu, maupo te'asa tangke wuuno inso a uluno nahi ta tedonta a wita! Nde luwuno wineweuno oleo andio hangano pontulungi-Do i Ue Ala.” Kanandiomo i Yonata dompotolao palili, ka nahi gagi pinepate.

⁴⁶ Umarino atuu mekuleomo i Saulu, nami lulu ira to Pelisiti, ka to Pelisiti mpepokule iramo a mpo'iagaado.

Somborino i Saulu ka pe'iwalino

⁴⁷ Mansano i Saulu pinotoro gagi mokoledo to Isaraeli, ipeteaako ira luwu iwalino sompo po'ianga to Moabi, inuleno i Amoni, i Edomi, luwuno mokole wita Soba ka to Pelisiti. Maupo isua ilako metea, asalakono monangi.

⁴⁸ Hangano tedoa moroso ntu'u, onae ka inangi ira to Amale ka motola ira to Isaraeli inso a ngkaedo luwuno mia anu rumontu ira.

⁴⁹ Anano i Saulu anu tama, onaemo i Yonata, i Yisiwi, ka i Malakisua. Orua ira anano beine anu aka meneeako i Merabu ka anu ko'orua meneeako i Mikali.

⁵⁰ Kombiano i Saulu meneeako i Ahinoa anano i Ahima'asi. Tadulako sorodaduno meneeako i Abinere, anano i Nere, maamano i Saulu.

⁵¹ I Kisi amano i Saulu ka i Nere amano i Abinere, ondae anano i Abieli.

⁵² Tempo poparentano i Saulu, gagiomo peteaa langkai umewai ira to Pelisiti. Luwuno mia moroso ka moroso ntu'u anu kinitano, ipumpu ira i Saulu.