1 Samueli 13 - Wunta Mempori

I Saulu nahi petenunu tempono i'aropi ira to Pelisiti

¹ Ba opia nta'u tinuwuno i Saulu tempono igagi mokole, orua nta'umo ipoparenta i Isaraeli.

² I Saulu mobiniki tolu nsowu mia inso a nto Isaraeli: rua nsowu mia merongaakono i Saulu i inia Mikimasi ka i wita mentorukuno Beteli, asa nsowu mia tumondao i Yonata i inia Gibea-Benami. Palili anu mehano itena ira mpekule a ngkemado.

³ I Yonata numangi ira puu mpeteado to Pelisiti anu mpodagai i Geba ka domerongeo to Pelisiti anu gagi atuu. Onaemo ka ipuurio i Saulu tawuwua i asa wawo wita, ipewowoloo po'ineeomo domerongeo to Ibarani.

⁴ Luwudo to Isaraeli merongeo nine inangi iramo i Saulu puu mpeteado to Pelisiti anu mpodagai, onaemo to Pelisiti tedoa memosa'oako ira to Isaraeli. Ka i'amba palili mepinumpu ntepo'asa saru i Saulu i inia Giliga.

⁵ To Pelisiti mpepumpu melako mpetea umewai ira to Isaraeli, tolu pulu nsowu kareta mpe'iwali, nomo nsowu sorodadu mpengara, ka sorodadu mpelempa kana one i wiwi ntahi hadiono. Melako iramo ka dompekema i Mikamasi, i sabaano oleo Beti-Awena.

⁶ Mansado mento'orio to Isaraeli nine ntekadu iramo, onaemo ka dompewuni a ngkunepo, a api watu, a pongkuno watu, a ngkineke pewunia, ka a nsumuru mo'are

⁷ Hinao to Ibarani anu sumakio koro Yarade lumako i wita Gadi ka i Gilea, i Saulu da mo'ia i Giliga ka luwuno mia anu tumondao mpondende iramo.

⁸ Onae mo'ia mesikori opitu oleo, ranta ia tempo anu pinakosino i Semueli. Sine, i Semueli nahi aiwa i Giliga ka palili mpompu'u iramo ntesiarawo mebintao.

⁹ Onaemo ka ipotae i Saulu, ”Imewawaomo ndi ongkue pesomba tinunu ka pesomba tekaduduia.” Ka i'amba mesombaakono pesomba tinunu.

¹⁰ Da iaopo umari ipesombaakono pesomba tinunu, haweomo i Semueli. Lumakoomo i Saulu tumotowoo metabe ndi onae.

¹¹ Sine ipotae i Semueli, ”Hapa anu wineweumu andio?” Sumangki i Saulu, ”Kukita ira palili ntesiarawo iramo mebinta aku, ka omiu nahi hawe a tempo anu pinakosimiu, ndio iramo to Pelisiti mpepumpu iramo i Mikamasi,

¹² kupewowoloo: ira me'aiwa to Pelisiti mensapoi aku i Giliga, kahinaano napi kupo'ema po'ehe-Do i Ue; onaemo ka kuperokuhi mompesombaako pesomba tinunu.”

¹³ Motae i Semueli ndi Saulu, ”Wineweumu andio tedoa benge-benge! Omue nahi upetenunu a songka-Do i Ue, Ue Alamu, anu Dopauakomu. Bakanaano Ondae i Ue Ira mokorosoo poparentaamu a nto Isaraeli ranta nahina tampulaano,

¹⁴ sine kanandio poparentaamu nahi ta mo'ia mpiha. Ondae i Ue Ira mo'ungke asa mia montonda po'eheno aroa-Do ka Dopotoroo gagi petewawa a bawaa-Do, hangano omue nahi upetenunu a petena anu Dotenaakomu i Ue,.”

¹⁵ Umarino atuu lumakoomo i Semueli inso i Giliga te'aro i Gibea-Benami. Tempo atuu i paresao i Saulu baresido palili, bara'ura nomo etumokoa mia anu da mo'ia saru onae.

¹⁶ I Saulu ka i Yonata, anano, saru palili anu da mo'ia saru ondae, mpo'ia i Gibea-Benami, ka to Pelisiti mpekema i Mikamasi.

¹⁷ Inso a mpekemaado to Pelisiti, mpeluarako iramo sorodadu mporopu otolu ntia. Asa ntia, mpotonda sala lumako i Opera, i wita Suala.

¹⁸ Anu asa ntia, mpontonda sala lumako i Beti-Horo. Bawaa anu mehano mpontonda sala lumako i tida wita anu te'aro i Lembono Seboimi te'alaako i pada one.

¹⁹ A luwuno wita Isaraeli nahina puu mpolabu, hangano potaedo to Pelisiti, ”Kasihina to Ibarani molabu ponai ka kansai.”

²⁰ Gagi luwudo to Isaraeli asalakono ira melako a nto Pelisiti mpo'aha mata mpadeko, pasese, uase, ka ponsewodo.

²¹ Tambono asa mata mpadeko ka asa pasese orua tia otolu sikala, mo'aha uase ka montangkei ponsepi sapi asa tia otolu sikala.

²² Onaemo pu'uno i oleo peteaa, nahina ponai ke kansai a ngkaedo luwuno palili anu mentondao i Saulu ka i Yonata, sangkadio ndi Saulu ka ndi Yonata, anano.

Mosiano i Yonata

²³ Puu mpetea to Pelisiti anu mpodagai, mpeluarako iramo a mpetosia a pongkuno wita i Mikamasi.