1 Samueli 12 - Wunta Mempori

I Semueli meweengakono poparentaa ndi Saulu

¹ Ipotae i Semueli a luwudo to Isaraeli, ”Kurongeomo luwu anu pinaumiu ndi ongkue. Kupotoroomo asa mokole ndi omiu.

² Kanandio-andio, ndiomo mokole anu gagi petewawamiu, nde ongkue mota'u akumo ka me'uwa. Komba luwuno ana ntamaku ke kongko i olomiu? Ongkuemo andio anu gagi petewawamiu mompu'u da kumongura ranta hawe oleo andio.

³ I ndi'ai mentade aku. Tewala hinao salaku ndi omiu imempauomo i aro-Do i Ue ka i arono mia anu bininiki-Do. Ba hinao sapimiu inalaku, ke kalideno isema inalaku, ke isema pinokonsiiku, ke isema pino'emaiku, ke a ngkaeno isema kupontarima pompowee nahi moleo? Aku mokuleakomiu.”

⁴ Mesangki ira, ”Omiu, nahi pokonsii kami ka nahi po'emai kami. Nahina hapa-hapa tinarimamiu inso a ngkaeno isemamokoa.”

⁵ Ka i'amba motaeako ira, ”Ondaemo i Ue ka mia bininiki-Do gagi sakosii ndi omiu oleo andio, nine nahina impohawe salaku ndi omiu.” Mesangki ira, ”Ondaemo gagi sakosii.”

⁶ I Semueli motaeako ira tongku atuu, ”Ondae i Ue anu biniki ira i Musa ka i Haruni ka anu tumaate ira ue mpu'umiu mpeluarako inso i wita masiri.

⁷ Kanandio-andio, impentademo aku mopokara-kara komiu i aro-Do i Ue mongkona luwuakoano wineweu anu moleo, anu wineweu-Do i Ue ndi omiu ka ndi ondae ue mpu'umiu.

⁸ Tempono i Yako mewinso i wita Masiri ka ue mpu'umiu mpeboo-booli ndi Ondae i Ue, onaemo ka Dotena ira i Ue i Musa ka i Haruni, anu wawa ira ue mpu'umiu mpeluarako inso i wita Masiri ka weweu ira mpo'ia a mpo'iangaa andio.

⁹ Sine domengkolupe Ira i Ue, Ue Alado. Dopeweengako ira a ngkaeno i Sisera, tadulako sorodadu i Hasoro ka a ngkaedo to Pelisiti ka mokole Moabi anu me'iwaliako ira.

¹⁰ Mpeboo-booli ira ndi Ondae i Ue: Mentehala kamimo, hangano kimpebungkui Iramo i Ue ka mpesomba a luwuno Baala ka Asitore. Kanandio-andio ipotola kamimo inso a ngkaedo iwali mami, kamimo mpesomba ndi Omiu.

¹¹ Ka i'amba Ondae i Ue tumena ira i Yeruba'ala, i Baraki, i Yepeta ka i Semueli. Dopotola komiu inso a ngkaedo luwuno iwalimiu limbu-limbu, onaemo kai merodo mpo'ia.

¹² Sine mansano imengkitao i Nahasi, mokoledo to Amoni aiwa ta sumapoi komiu, mpotae komiu ndi ongkue, ’Naahi, asalakono asa mokole ta parenta kami,’ ka hinaano Ondae i Ue, Ue Alamiu, Ondaemo mokolemiu.

¹³ Kanandio-andio, ndiomo mokole anu bininiki ka inemamiu. Menteeano Ondae i Ue mompotoro Iramo mokolemiu.

¹⁴ Tewala imedoitoako Ira i Ue, impesomba ndi Ondae, imperorongeakono pau-Do, si me'ewaio songka-Do, ka omiu saru mokole anu parenta komiu tumonda Ira i Ue, Ue Alamiu, moikoomo kanandio.

¹⁵ Sine tewala nahi mpomperorongeako ndi Ondae i Ue, ka ime'ewaio petena-Do, kae-Do i Ue ta umewai komiu saru mokolemiu.

¹⁶ Kanandio-andio, ikongkomo mpentade ka kitaomo tegagia langkai anu ta wineweu-Do i Ue i aromiu.

¹⁷ Nde komba tempo konsowia gandu ke kanandio-andio? Aku mebooli ndi Ondae i Ue, ka Dopompotii rundu ka usa. Kitao, ka imento'oriomo tedoa langkai mosa'ono wineweumiu i aro-Do i Ue, kai mpo'ema mokolemiu.”

¹⁸ I Semueli mebooli ndi Ondae i Ue, ka i oleo koa atuu Ondae i Ue mompotii rundu ka usa, onaemo ka dotedoa medoito tongku atuu ndi Ondae i Ue ka ndi Semueli.

¹⁹ Luwuno tongku atuu mpotaeakono i Semueli, ”Ipekakaia kami luwuno tetenaamiu andio ndi Ondae i Ue, Ue Alamiu, kasi kimemate nde hangano mpo'ema kami mokole mami, kimentiangiakonomo wineweu mosa'o andio hala mami.”

²⁰ Motae i Semueli ia tongku atuu, ”Si medoito, omiu lano mpoweweu komiumo luwuno anu mosa'o andio, sine simepansia inso ndi Ondae i Ue, tendeano impesombamo a bobotolino aroamiu ndi Ondae i Ue.

²¹ Si mepansia mpontonda pinesombai susua anu nahi mentee, anu nahina tuduno, ka nahi pokompontulungi, hangano luwuno atuu nahina pengkonaano.

²² A nee-Do anu langkai, Ondae i Ue nahi Ira bintao bawaa-Do, hangano Ondae i Ue Dobiniki komiumo gagi bawaa-Do.

²³ Mongkona ongkue, nahi aku tehala ndi Ondae i Ue, hangano menaa-naa aku mekakaiakomiu. Aku paguruakomiu sala anu moiko ka moleo.

²⁴ Butumo koa, imedoitoako Iramo i Ue ka impetenunu mpesomba ndi Ondae ia tompaano aroamiu. Hangano, kitaomo tedoa langkai wineweu-Do ndi omiu.

²⁵ Sine, tewala mpoweweukomiu mpiha anu mosa'o, asalakono komiu mempinokotampula saru mokolemiu atuu.”