1 Samueli 11 - Wunta Mempori

I Saulu kumadudui ira palilino Yabesi-Gilea

¹ I Nahasi, to Amoni, lumako mekema kumaduo Yabesi-Gilea. Luwudo to Yabesi mpotae ndi Nahasi, ”Poweweumo pedandia saru omami, kami koa mpetenunu ndi omue.”

² Sine ipotae i Nahasi to Amoni atuu ndi ondae, ”Moiko tompooweweu pedandia, sine sompo mia, mata ngkoanano aku gumogoio. Bakanandio aku moweweuako ira tataano luwudo to Isaraeli.”

³ Mesangki ira mia memota'u to Yabesi, ”Powee kami tempo opitu oleo, kami mpotena mia paleleo a luwuno wita Isaraeli. Tewala nahina mia anu kumadudui kami, kami mpeluarako mpe'urumako ndi omue.”

⁴ Mansado mehawe mia mentinena atuu i Gibea-Saulu ka domempauako ira tongku atuu, mpengese iramo luwu tongku atuu tedoa meroku.

⁵ I tempo atuu haweomo i Saulu inso i lere mowawa sapino. Mesikeno i Saulu, ”Tembio ka dompengese luwu mia atuu?” Domempauakono hapa anu pinaudo to Yabesi atuu.

⁶ Mansano rumongeo i Saulu pinaudo atuu, Penaa-Do Ue Ala mewinsokio ka tensilaomo tekudano tedoa mongkokongiri.

⁷ I'alao i Saulu asa pasa sapi ka i sampao, i batu-batuo, kai oliwio ia asa wawo wita Isaraeli anu domewawao mia mentinena saru pe'oliwi, ”Isema anu nahi behe lumako tumondao i Saulu ka i Semueli, sapino ta wineweu kanandio.” Pondendea inso ndi Ondae i Ue umaluo tongku atuu, onaemo ka dontepo'asa aroa melako mpetea.

⁸ I Saulu paresao baresido i Beseki. To Isaraeli tepumpu tolu etu nsowu mia ka to Yehuda tolu pulu nsowu mia.

⁹ Ka do'amba umoliwi ira mia mentinena mpowawa lele atuu, ”Kanandiomo imempauako ira to Yabesi-Gileadi: Tisomo tempono napi ntonga oleo ta hawe tekaduduia ndi omiu.” Mpekule iramo mia mentinena atuu ka domempauako ira to Yabesi pe'oliwi atuu, onaemo ka dompo'unde.

¹⁰ To Yabesi mpotaeakono i Nahasi, ”Tisomo kami mpeluarako mpe'urumako ndi omiu ka imeweweu kamimo hapa anu pinemoikomiu.”

¹¹ Tisomono i Saulu tumiao palili gagi otolu ntia. Umpeda meene, dompewinsokio pekemaado iwali ka napi ntonga oleo donangi iramo to Amoni. Luwuno mia anu tola ntesiarawo ka nahina molai nte'o'orua mia.

¹² Mpotae iramo tongku atuu ndi Semueli, ”Isema mia anu motae: ’Kana'umpe i Saulu ta gagi mokoleto?’ Iweea kami mia atuudo, kami mpepate ira.”

¹³ Sine motae i Saulu, ”Oleo andio nahina maupo te'asa mia anu ta hinuku mate, hangano oleo andio Ondae i Ue moweweu Iramo tekaduduia ia nto Isaraeli.”

¹⁴ Ipotaeako ira i Semueli tongku atuu, ”Aiwa ka tomelako i Giliga wali mpokorosoo potorono mokole i ra'ai.”

¹⁵ Luwuno tongku atuu melako i Giliga. I ra'ai dompotoroo i Saulu gagi mokole i aro-Do i Ue. Ka i ra'ai dompopesombaako pesomba tekaduduia ndi Ondae i Ue. I ra'ai i Saulu saru luwuno to Isaraeli tedoa memawongko.