1 Samueli 10 - Wunta Mempori

¹ Ka i'amba i Semueli umalao pido kodei me'ihi lana ka isiwuiakono a uluno i Saulu. Iwoo-wooo i Saulu ka ipotae, ”Ondae i Ue anu umurapiko gagi mokole a bawaa-Do Isaraeli. Omue gagi mokole a bawaa-Do i Ue ka omue anu ta motola ira inso a ngkaedo luwuno iwalido a mpetengi-tengino. Ndiomo tondonino nine Ondae i Ue umari Iramo umurapiko gagi mokole a bawaa-Do:

² I tempono ulako binta aku oleo andio, kotepotowoakono orua ira tama umpeda a ngkaburuno i Raheli, i Selisa i wita Benami. Ondae anu ta pauakomu, ’luwuno kalide anu inungkemu, hinaweomo. Anu pinemasusano amamu, komba kalide mbo'u atuu, sine koroimu. Ipotae: Hapa ta wineweuku mongkona anaku?’

³ Inso i ra'ai pelempa mpiha ranta kau hawe a pu'u ngkeu tarabanti i Tabori. I ra'ai kotepohaweakono otolu ira tama anu melako mpowawa pesomba ndi Ondae Ue Ala i Beteli. Asa mia mowawa otolu ana bembe, asa mia mowawa otulu roti ka asa mia mowawa asa kadu anggoro.

⁴ Ira mpetabe ndi omue ka ira mpoweeakomu orua roti anu kotumarimao inso ndi ondae.

⁵ Umarino atuu komo hawe i Gibea-Ue Ala, i tu'ai hinao po'ianga podagaiado sorodadu to Pelisiti. Itempono upewinso i kota, kotepotowoako ira asa bawaa nabi anu mpontindulu inso a pongku mpesomba, saru mia mpegambusu, mperebana, mpesiloli ka mpekasapi i arodo. Kanatuumo ondae mebukeako penaa kana nabi.

⁶ Penaa-Do i Ue ta mo'ia ilaromu pabawaiko ka omue mbo'u kobukeako penaa kana luwuno nabi perongamu. Omue kotebali nami pengkena tuwumu se'eluno.

⁷ Tewala luwuno petondoni andio gagi ndi omue, weweuo hapamo koa anu tekona uweweuo, hangano Ondae Ue Ala kumongkomiko.

⁸ Omue asalakono kometii i Giliga mese'elungi aku, penootio aku aiwa ndi omue mompesombaako pesomba tinunu ka pesomba tekaduduia. Asalakono komesikori opitu oleo ranta ka kuhawe ndi omue pauakomu hapa anu ta wineweumu.”

⁹ Tempono i Saulu lumako bintao i Semueli, Dobalio Ue Ala aroano ka luwuno petondoni gagi ndi onae oleo atuu.

¹⁰ Mansado mehawe i Gibea inso iraane, ntepotowo iramo asa bawaa nabi saru i Saulu. Nahi koo-kooo Penaa-Do Ue Ala mansa pabawaio ka bukeakoomo Penaa kana nabi i olodo.

¹¹ Mansado mengkitao luwudo mia anu tumo'orio i Saulu se'eluno, nine bukeakoomo Penaa saru luwuno nabi, sisingge ira mpepau nte'o'asa mia, ”Hapa anu gagi ndi anano i Kisi? Nde saru mbo'u i Saulu ke tewinso nabi?”

¹² Asa mia i olodo sumangki, ”Isema menteeano petewawado?” Onaemo kai hina pau, nde tewinso mbo'u nabi ke i Saulu?

¹³ Umarino ibuketio Penaa kana nabi, mekuleomo i Saulu i pongkuno wita.

¹⁴ Maamano i Saulu motaeakono saru atano, ”Insokomiu isua ke?” Sumangki i Saulu, ”Inso kami umungke ira kalide atuu. Hangano nahi kikita ira, lumako kami ndi Semueli.”

¹⁵ Ka i'amba motae maamano i Saulu, ”Tutuluakune hapa anu pinauno i Semueli ndi omue.”

¹⁶ Ipotae i Saulu ndi maamano, ”Dopauakami nine kalide atuudo mehinawe iramo.” Sine i Saulu nahi tutuluako ira hapa anu pinaudo i Semueli mongkona potoro mokole.

I Saulu gagi mokole molalo undi

¹⁷ I Semueli moboi ira palili mpepumpu i aro-Do i Ue i Misipa.

¹⁸ Ipotaeako ira to Isaraeli, ”Kanandiomo pau-Do i Ue, Ue Alado to Isaraeli: Kutaate komiumo mpeluarako inso i wita Masiri ka Kupotola komiumo inso a ngkaedo to Masiri ka inso a luwuno poparentaa anu mpokonsii komiu.

¹⁹ Sine kanandio-andio nahi impe'ala-ala Ira Ue Alamiu anu kumadudui komiu inso a luwuakoano masolaa ka masusaamiu, ka impotaeako Ira, ’Ipotoroa kami asa mokole.’ Gagi kanandio, impentademo i aro-Do i Ue montonda suku ka pepe'etuamiu.”

²⁰ I Semueli tumena ira luwudo suku Isaraeli mpentade i arono, ka i'amba suku Benami anu kona undi.

²¹ Itena ira suku Benami mpentade i arono montonda pepe'etuado, ka pepe'etuano i Matiri anu kona undi, ka i'amba undi pokotompa kona ndi Saulu anano i Kisi. Sine mansano inungke, nahi hinawe.

²² Onaemo pu'uno ka dompo'ema mbo'u pontiso ndi Ondae i Ue, ”Nde mia atuu hawe koa ke i ndi'ai?” Sumangki Ira i Ue, ”Kitao, onae mewuni i olono sangka anu hadio.”

²³ Ka do'amba mpelulu mia lumako moboio. Mansano mentade i olodo mia hadio, onae anu lalu ondau, luwuno mia butu hawe i oweano.

²⁴ Ipotaeako ira i Semueli luwuno tongku atuu. ”Imengkitaomo mia anu bininiki-Do i Ue atuu? Nahina kana onae a luwuno tongku andio.” Mpebooli iramo tongku atuu, ”Hio! Tuwu mokole.”

²⁵ I Semueli pauako ira tongku atuu luwuno tiano poparentaa. Ka i'amba burio a wunta ka inaao i aro-Do i Ue. Umarino atuu itena iramo i Semueli tongku atuu ka dompekule sompo-sompo mia i rahado.

²⁶ I Saulu mbo'u mekule i rahano i inia Gibea, ka mpetonda ira ba opia mia moroso ntu'u anu aroado Dopabawaiomo i Ue Ala.

²⁷ Sine dompotae mia melambaha, ”Kana'umpe mia andio ta mokokadudui kita?” Dompepaukiakono ka nahi dompowawa pompowee ndi onae. Sine nahi perio ira.