1 Samueli 1 - Wunta Mempori

Hinaano i Samueli

¹ Hinao asa mia tama te'inso i Ramataimi i wita Supi, te'inso i mentorukuno Eparai, neeno i Elikana anano i Yerohama anano i Elihu, anano i Tohu anano i Supi, to Eparai.

² Mia andio orua kombiano, anu asa meneeako i Hana ka anu asa mbo'u meneeako i Penina. I Penina hinao anano, sine i Hana nahina.

³ Sompo ta'u i Elikana inso i Rama lumako mesomba ka mompesombaako pesombano ndi Ondae i Ueno luwuakoano i Silo. Orua ira anano i Eli, onaemo i Hopini ka i Pineha gagi sando mpesomba-Do i Ue i ra'ai.

⁴ A oleo lakoano i Elikana mompesombaako pesomba, i wela moweeako ira asa mia asa ntia, ndi Penina kombiano, ka a luwuno anano tama ka beine.

⁵ Sine i Hana butu mohawe asa ntia, hangano Ondae i Ue nahi Dopoweeakono ana, sine maupo kanatuu, tedoa ipehohawao i Elikana.

⁶ I Penina wela mokomahakiakono aroano i Hana, hangano nahi Dopoweeakono i Ue ana.

⁷ Kanatuumo anu gagi sompo ta'u, sompo lakoano i Hana i raha-Do i Ue, i Penina wela mokomahakiakono aroano, onaemo ka ipengese nahi behe mongkaa.

⁸ Ka i'amba i Elikana, tamano sumikenoo, ”Hana, tembio kau pengese? Tembio ka nahi ubehe mongkaa? Tembio ka imasusa aroamu? Ongkue andio mentuduopo ndi omue sekonopo hopulu ana ntama.”

⁹ Asa tempo, mansado me'umari mpongkaa ka mpo'inu i Silo, mentadeomo i Hana, ka sando mpesomba Eli kontongaano mentoro a ngkadera umpeda a ngkaruno pewowa raha-Do i Ue.

¹⁰ A laro masusano aroano, i Hana mekakai ndi Ondae i Ue i tondaakono mengese sensedu.

¹¹ Ka i'amba montanga kanandio, ”Omiu Ue luwuakoano, tewala ipehohawa aku, Ikitaomo masusano aroaku, tetenaa-Miu andio, Irambe aku kasi kolupe aku, tetenaa-Miu, tewala ipowee akumo asa ana ntama, aku meweengakono asa ntinuwuno ndi Omiu Ue. Piso pekeru nahi ta dumanggio uluno.”

¹² Kontongaano wela mekakai ndi Ondae i Ue, i kokontooo i Eli wiwino;

¹³ I Hana mekakai i laro aroano, butu wiwino anu momuti-muti, nahi teronge ipepau. Onaemo ka ipotae i Eli, beine atuu molangu.

¹⁴ Ka i'amba motaeakono i Eli, ”Hawe te'ipia ka i'amba tetadi molangumu? Siimo po'inu anggoro.”

¹⁵ Sine sumangki i Hana, ”Komba kanatuu, ue, ongkue andio asa beine anu tedoa me'isei aroaku. Nahi kupo'inu anggoro ke inua anu mompokomolangu, sine kuluarakono ihino aroaku i aro-Do i Ue.

¹⁶ Si potaeakune tetenaamiu andio beine anu mosa'o gauno. Kupekakai tehine hangano tedoa aku mompemasusa ka mahaki aroa.”

¹⁷ Sumangki i Eli, ”Lakomo temoiko. Ondae Ue Alado to Isaraeli Ira moweeko hapa anu inemamu ndi Ondae.”

¹⁸ Motaeomo i Hana, ”Ipehohawa akumo, ue.” Ka i'amba beine atuu lumako, ka mongkaaomo, rupano moleoomo.

¹⁹ Tisomono mo'oru, mpewangu iramo ka dompenggolontu mpesomba i aro-Do i Ue. Ka do'amba mpekule i Rama. I Elikana mewowaliakono i Hana, kombiano, onaemo ka Doronsoo i Ue i Hana.

²⁰ Mentiaomo i Hana ka ipe'anaakono asa ana ntama. Ineeakono anano atuu i Semueli, hangano ipotae, ”Ku'emaomo ndi Ondae i Ue.”

²¹ I Elikana, tama atuu, lumako saru luwuno pe'asa rahano, mpompesombaako pesomba sompo ta'u ka pesomba pontangano ndi Ondae i Ue.

²² Sine i Hana nahi petonda, ka ipotaeakono, tamano, ”Ambapo tewala tetoeomo mo'uo nana'ote atuu, ka ku'amba lumako wawao. Onae ta me'aro ndi Ondae i Ue ka ta mo'ia mpiha i ra'ai asa ntinuwuno.”

²³ Ipotae i Elikana tamano, ndi onae, ”Weweuomo hapa anu pinemoikomu. Po'iamo ranta ka itepotoe mo'uo. Topo'ema ka Do'ihiio i Ue dandi-Do.” Gagi beine atuu mo'iaomo i raha mo'uoo anano ranta ka itepotoe.

²⁴ Mansano tepotoeomo mo'uo nana'ote atuu, da kodei iwawaomo beine atuu i raha-Do i Ue i Silo saru asa sapi lakino tinuwuno otolu nta'u, asa efa tarigu ka asa kadu anggoro.

²⁵ Mansano sinumbele sapi laki atuu, winawaomo nana'ote atuu ndi Eli.

²⁶ Ipotae i Hana, ”Tabeamiu ueku, ndi omiu ueku anu tuwu, ongkuemo beine anu i ndi'upua mentade mekakai ndi Ondae i Ue i ndi'ai umpeda ndi omiu,

²⁷ onaemo andio ana anu inemaku a laro mpekakaiku ka Doweeakumo i Ue anu inemaku ndi Ondae.

²⁸ Gaagi kuwali meweengakono ndi Ondae i Ue asa ntinuwuno.” Ka do'amba mpenggolontu mpesomba ndi Ondae i Ue i ra'ai.