1 PETURU 5 - Wunta Mempori

Pakambi iramo bawaano bimba-Do Ue Ala 5:1-11

¹ Kupatudu ira penatua i olomiu, ongkue kana walido penatua ka sakosii tebobarasai-Do i Kerisituu, anu ta mohawe koa mbo'u tia a marambaa anu ta pinokomengkaa lembuino.

² Impakambi iramo bawaano bimba-Do Ue Ala anu kongko ndi omiu, si komba hangano dinada, sine inso ntu'u i aroamiu menunu saru po'ehe-Do Ue Ala, ka si hangano inehemiu mpo'ungke me'uraa, sine a mawongkono aroamiu.

³ Si mpoweweu kana komiu meparenta ira anu pine'ala-alaako ndi omiu, sine moikoomo imegagi pandirido bawaano bimba atuu.

⁴ Ka omiu, tewala hawe Ira Puu Pompakambi Langkai, komiu mpontarima ramba-ramba ulu marambaa anu nahi pokomoleu.

⁵ Kanandio koa mbo'u omiu, hei mia memongura, impe'urumakomo a mia anu memota'u. Ka luwumiu, imemambe'urumako, hangano, ”Ondae Ue Ala umewaio mia mompelangka-langkai, sine mehohawao mia anu me'urumako.”

⁶ Onaemo pu'uno impe'urumakomo a toto ngkae-Do i Ue anu moroso, ka Dopokomantande komiu a tempono.

⁷ Impeweengakonomo luwuno pinorerengkomiu ndi Ondae, hangano Ondae anu mekaria komiu.

⁸ Intelikemo ka impedaga-dagaimo! Anu umewai komiu, i Mosa'o, melempa metanggolili mengkena kana singa anu mengaoli ka mo'ungke mia anu pinokoteleno.

⁹ Ewaiakonomo pompe'ala-ala anu moroso, hangano imento'orio, nine luwuno pepaekompomiu i asa wawontolino mpompembasai tebobarasaia anu mengkena.

¹⁰ Ka Ondae Ue Ala, pu'uno luwuno pe'aroa, anu moboi komiumo ndi Ondae i Kerisituu a maramba-Do anu nahina tampulaano, Ira mokosompo komiu, rumonso komiu, mokomokora komiu ka mokoroso komiu, umarimiu ntebobarasai asa tempo.

¹¹ Ondaemo anu me'ueo pabawa ranta nahina tampulaano! Ami.

Tabea 5:12-14

¹² Mesala ndi Siliwanu, anu kutuduo kana aasa pepaekompo anu pinokompe'ala-ala, kupoburiakomiu owowa ka patudu komiu ka imento'orio, nine andio onaemo pe'aroa anu mentee ntu'u inso ndi Ondae Ue Ala. Impentademo temoroso i larono!

¹³ Tabea ndi omiu luwu inso a walimiu anu tebiniki anu i Babilo, ka inso mbo'u ndi Marakusu, anaku.

¹⁴ Imemambe tabeaako pewoo-woo anu mempori. Rodoa kumongkomi komiu luwu anu mekongko ndi Ondae i Kerisituu. Ami.