1 PETURU 4 - Wunta Mempori

¹ Gaagi, hangano marasai Iramo i Kerisituu tebobarasai ngkoroi, maupo omiu mbo'u asalakono imemparewaakono pompewowolo kanatuu koroimiu, – hangano ba isema marasaiomo tebobarasai ngkoroi, menaa-naaomo moweweu hala –,

² ka si mempakeo tempo anu da hinao montonda mosisirino mia, sine montonda po'ehe-Do Ue Ala.

³ Hangano hadioomo ntu'u tempo pinakemiu meweweuo po'ehedo mia anu nahi domento'ori Ira Ue Ala. Mentuwu komiumo a mperupa-rupa po'eheno koroi, mosisiria, molangua, mpogawe langkai, pelimbua mpo'inu ka pompesombaia lahumoa anu inonto.

⁴ Onaemo pu'uno ka domengkohali-hali, nine omiu nahi mpetonda mpentoa merongaako ira a laro umbele nahi pototono anu mengkena, ka domposebe komiu.

⁵ Sine asalakono ka domesangkio ndi Ondae, anu mepatinda mpiha bitarao mia tuwu ka anu mate.

⁶ Onaemo pu'uno ka ipinalelemo mbo'u Lele Mawongkoa a mia memate, ka dompengkena kana luwuno mia, binitara montonda koroi; sine hangano penaa mokotuwu montonda po'ehe-Do Ue Ala.

Tuwudo to Kerisituu 4:7-11

⁷ Pokotompaano luwuakoano umpedaomo. Onaemo pu'uno imempabawaiomo koroimiu ka impomperodomo, ka impokompekakai koa.

⁸ Sine anu lalu i wawono: imemambe pehohawamo ntu'u, hangano pompehohawa tumutuwio hadio ntu'u hala.

⁹ Imemambe totoka si mpewuruki.

¹⁰ Imemambe pekakaako, menunu saru pompowee anu hinaweno sompo-sompo mia kana puu mpo'orusu anu moiko a mpe'aroa-Do Ue Ala.

¹¹ Tewala hinao mia anu mepau, ka ipepaumo kana mia anu mohaweo pau-Do Ue Ala; tewala hinao mia anu mompekakaako, ka iweweuakonomo roso anu Doweeakono Ue Ala, ka Dopinokomaramba Ue Ala a luwuakoano hangano Ondae i Yesu Kerisituu. Ondaemo anu me'ueo marambaa ka pabawa ranta nahina tampulaano! Ami.

Tebobarasai gagi to Kerisituu 4:12-19

¹² Luwuno pepaekompo anu pinehohawa, siimo imengkohali-haliakono langano api pobobarasaia anu hawe ndi omiu gagi po'arahako, kana hinao bahapa anu tedoa langkai gagi ndi omiu.

¹³ Tendeano, impo'undemo, menunu saru tia anu hinawemiu a ntebobarasai-Do i Kerisituu, ka impohawe koa mbo'u mawongko ka mpo'unde a tempo Dopokomengkaao maramba-Do.

¹⁴ Meme'ura komiumo, tewala mentinata komiu hangano nee-Do i Kerisituu, hangano Penaa marambaa, onaemo Penaa-Do Ue Ala kongko ndi omiu.

¹⁵ Si hina i olomiu anu asalakono tebobarasai kana anu mompepate ke monako ke anu moweweu mosa'o, ke anu morisui.

¹⁶ Sine, tewala onae marasai gagi to Kerisituu, ka siimo imokoko'ii, tendeano moikoomo ipelangkai Ira Ue Ala a nee-Do i Kerisituu atuu.

¹⁷ Hangano kanandio-andio haweomo tempono ipinu'u pobitaraa, ka a raha-Do isa'a Ue Ala anu asalakono amba-ambano binitara. Ka tewala pobitaraa atuu pinu'u ndi ontae, kana'umpeke pokotompaano ondae anu nahi dompe'ala-alao Lele Mawongkoa-Do Ue Ala?

¹⁸ Ka tewala mia mentee ilawu nahi domengkinadudui, hapake anu ta gagi a mia mosa'o guano ka mia tehala?

¹⁹ Onaemo pu'uno moiko mbo'u ondae anu asalakono ntebobarasai hangano po'ehe-Do Ue Ala, mpeweengakono sumangado, saru wela mpoweweu moiko, ndi Ondae anu Mompokogagi nahi Dobali.