1 PETURU 3 - Wunta Mempori

Tuwu me'asa mekokombia 3:1-7

¹ Kanandio koa mbo'u omiu, hei luwuno beine mpekombia, impetuundumo a ntamamiu, tewala hinao i olodo anu nahi petenunu a mpau-Do i Ue, maupo nahina pau ka domponangiako peleluno beinedo,

² tewala domengkitao, ba kana'umpe memporino ka moleono tuwudo beinedo atuu.

³ Peramba-rambamiu si koa montonda koroi, onaemo wuu piniu-piu, mompake ramba-ramba wulaa ke saru mompokona sangka anu ntekokosi,

⁴ sine ramba-rambamiu onaemo mia i laro aroa anu tewuniako ramba-ramba anu nahi bali anu tepu'u inso a mpenaa anu mauru ka sintuwu, anu masuli ntu'u olino a pongkita-Do Ue Ala.

⁵ Hangano kanandiomo gaudo beine mempori i ndi'upua domeramba-rambao koroido, onaemo luwuno beine anu mpomperorohi ndi Ondae Ue ala; mpetuundu ira a ntamado,

⁶ mengkena kana i Sara metenunu ndi Burahima ka numeeakono ueno. Ka omiu onaemo luwuno anano, tewala mpoweweu komiu moiko ka nahi medoitoakono pompokodoito.

⁷ Kanandio koa mbo'u omiu, hei luwuno tama mpekombia, imentuwumo pande mposongka saru beinemiu, kana mia anu lalu molema! Impelangkai iramo kana walimiu mpe'umbuo pe'aroa pompowee, onaemo tuwua, ka si tetombolei pekakaimiu.

Pompehohawa ka rodoa 3:8-12

⁸ Ka pokotompaano, po'ineeomo ka impe'asa mpau luwu, mpe'asa aroa, mpehohawa ira pepaekompo, marapompehohawa ka mpe'urumako,

⁹ ka mosa'oa si mpombaloako mosa'oa, ke pompepauikiako saru pompepaukiako, sine tendeano, po'ineeomo imporonso, hangano onaemo ka imempinoboi, onaemo ka impohawe ronso. Hangano,

¹⁰ ”Isema anu ineheno kumekewoio tuwuno ka ineheno kumitao luwuno oleo moiko, asalakono idagaio elono inso a mosa'o ka wiwino a luwuno pinau anu mompopo'oo.

¹¹ Asalakono i'olaiakono anu mosa'o ka moweweu anu moiko, asalakono ka i'ungkeo sintuwua ka i'usahao ka ihaweo.

¹² Hangano mata-Do i Ue te'aro a luwuno mia mentee, ka biri-Do a mpo'emado anu mpepetulungi, sine rupa-Do i Ue umewai ira mia anu mpoweweu mosa'o.”

Marasai saru sabara 3:13–4:6

¹³ Ka isemake anu ta moweweu mosa'o ndi omiu, tewala memokua komiu mpoweweu moiko?

¹⁴ Sine maupo asalakono imemarasai mbo'u hangano menteea, komiu koa meme'ura. Onaemo pu'uno si medoitoakono hapa anu dinoitoakodo ka si pondidi-ndidi.

¹⁵ Sine impokomempori Iramo i Kerisituu i laro aroamiu kana Ondae i Ue! Ka impepatindamo a luwuno tempo ka imesangkio sompo-sompo mia anu mpesikenoakono ndi omiu mongkona pomperorohia anu kongko ndi omiu, sine asalakono temauru ka pompelangkai,

¹⁶ ka saru ponto'orino aroa anu moiko, ka domegagi mokoko'iiakono pomposebedo atuu anu mposebe komiu hangano tuwumiu anu moleo ndi Ondae i Kerisituu.

¹⁷ Hangano moikoopo tebobarasai hangano moweweu moiko, tewala kanatuu po'ehe-Do Ue Ala, sekonopo mompemarasai hangano moweweu mosa'o.

¹⁸ Hangano Ondae mbo'u i Kerisituu mate Iramo pohona tiano luwuno halato, Ondae anu mentee tiado mia anu nahi mentee, ka Dowawa kita ndi Ondae Ue Ala; Ondae, anu pinepate Iramo a laro nteweweu-Do kana mia, sine anu winangu Iramo montonda Penaa,

¹⁹ ka i larono Penaa koa mbo'u atuu ka Dolako mompalele Lele Mawongkoa a luwuno penaa anu a laro torungku,

²⁰ onaemo a luwuno penaado anu i ndi'upua tempono i Noho nahi domperorongeako Ira Ue Ala, tempono Ondae Ue Ala mompedato sumikori ira mpiha tempono i Noho kontongaano patindao bangkano, butu koa tedei, onaemo oalu mia, anu kinaduduino lolowi atuu.

²¹ Omiu mbo'u kanandio-andio ikadudui komiu potundaano, onaemo pebahoa – tinoono komba ka ipokomorinao mokoburuno koroi, tendeano ka ipo'emaakono ponto'orino aroa anu moiko ndi Ondae Ue Ala – hangano pewangu-Do i Kerisituu,

²² anu mentoro i koana-Do Ue Ala, mansa-Do mewuatako i suruga umarino luwuno mala'eka, pabawa ka roso pinokompetenunu ndi Ondae.