1 PETURU 2 - Wunta Mempori

Ondae i Yesu Kerisituu watu siuno 2:1-10

¹ Onaemo pu'uno imentadiomo luwuno mosa'oa, luwuno pompopo'oo ka luwuno rupano po'onde-onde, kohilia ka pomposebe.

² Ka imegagimo kana nana'ote kodei anu da iaopo ihina, anu wela mosisiriakono uwoi uo ntu'u ka anu rohani, ka inte'iliako onae ka ntekadudui,

³ tewala mentee ntu'u impenamiomo moiko-Do i Ue.

⁴ Ka ime'aiwamo ndi Ondae, watu anu tuwu atuu, anu lano domentadio mia, sine anu bininiki ka pinelangkai i aro-Do Ue Ala.

⁵ Ka po'ineeomo omiu mbo'u mempinake kana watu tuwu powangu aasa raha rohani, tiano aasa imama mempori, ka ipinesombaako pesomba rohani anu hangano Ondae i Yesu Kerisituu Dopemoiko Ira Ue Ala.

⁶ Hangano hinao teburi, ”Menteeano, Kunaao i Sioni aasa watu anu tebiniki, aasa watu siuno anu masuli olino, ka isema anu me'ala-ala Ira, nahi ta pinokoko'ii.”

⁷ Onaemo pu'uno ndi omiu, anu mpompe'ala-ala, onae masuli olino, sine ndi ondae anu nahi dompompe'ala-ala, ”Watu anu domentadiomo mia mperaha, gagiomo watu siuno, gagiomo mbo'u watu tedanggia ka aasa watu tetidua.”

⁸ Dontetiduario, hangano nahi domperorongeakono pau-Do Ue Ala; ka hangano atuu ondae mbo'u mempinatindaako iramo.

⁹ Sine omiumo tongku anu tebiniki, imama anu moleo, tongku anu mempori, bawaa-Do Ue Ala, ka imempaleleo luwuno wineweu anu langkai inso ndi Ondae, anu moboi komiumo mpeluarako inso a wongi-wongia a mewine-Do anu kinohali-haliako:

¹⁰ Omiu, anu i ndi'upua komba bawaa-Do Ue Ala, sine anu kanandio-andio megagi komiumo bawaa-Do, anu i ndi'upua nahi mempinehohawa sine kanandio-andio mpohawe komiumo pe'aroa.

Pompoto'ori ka tomentuwu kana tetenaa-Do Ue Ala 2:11-17

¹¹ Pepaekompoku luwu-luwu anu pinehohawaku, kupatudu komiu, kana mia mehawe ka anu mpo'ungke tuwua, ka ime'olaiakono luwuno po'eheno koroi anu meteahako umewaio sumanga.

¹² Temoikomo gaumiu imentuwu i tonga-tongado tongku komba Yahudi, tewala domposebe komiu kana mia melambaha, ka dompokokitao inso a luwuno wineweumiu anu moiko ka melangkai Ira Ue Ala a oleo Dotepohaweako ira.

¹³ Impe'urumakomo, hangano Ondae Ue Ala, a luwuno posongkano mia, moiko a mokole anu uminio pabawa anu lalu i wawono,

¹⁴ maupo luwuno petewawa i wita anu tinenano ka domehuku ira mia anu mpoweweu mosa'o ka melangkai ira mia anu mpoweweu moiko.

¹⁵ Hangano onaemo andio po'ehe-Do Ue Ala, onaemo saru poweweu moiko ka imempokongkomino ira mia anu mebenge-benge anu nahi malua pinewowolodo.

¹⁶ Imentuwumo kana mia maradeka ka komba kana ondae anu mensala pakeo maradekaa atuu ka itetutuwi luwuno wineweudo anu mosa'o, sine imentuwumo kana tetenaa-Do Ue Ala.

¹⁷ Impelangkai iramo luwuno mia, impehohawa iramo pepaekompomiu, imedoitoako Iramo Ue Ala, impelangkai iramo mokole!

Tebobarasai-Do i Kerisituu gagi pandiri 2:18-25

¹⁸ Hei omiu, luwuno ata, impetuundumo saru buke doito a uemiu, komba butu a anu moiko ka mauru, sine a anu mbo'u lambaha.

¹⁹ Hangano onaemo pe'aroa, tewala asa mia hangano ipokonto'orio po'ehe-Do Ue Ala sumusuruo tebobarasaia anu komba asalakono susuruano.

²⁰ Hangano polioke ipinau po'unde-unde, tewala memarasaiako komiu pontunduhi hangano mpoweweu komiu hala? Sine tewala mpoweweu komiu moiko ka onaemo pu'uno omiu asalakono ntebobarasai, ka onaemo atuu pe'aroa ndi Ondae Ue Ala.

²¹ Hangano onaemo atuu ka imempinoboi, hangano maupo Ondae i Kerisituu Dotebobarasaiakomiumo ka Dopobintaakomiumo pandiri, ka imentondao wineweu-Do.

²² Nahi Dotehala, ka pompopo'oo nahina a laro nganga-Do.

²³ Tempono Dopinepauikiako, nahi Dopombaloako pompepauki; tempono Dotebobarasai, nahi Dopompokodoito, sine Dopeweengakono ndi Ondae, anu moleo Dopobitara.

²⁴ Ondae-Do isa'a tumembiomo halato a laro ngkoroi-Do a ngkeu pinotamba, ka tomentuwu tiano menteea. Hangano pelia-liamba-Do memadoo komiumo.

²⁵ Hangano i ndi'upua ntesaa komiu kana bimba, sine kanandio-andio mpepokule komiumo a puu pompakambi ka mpekariao sumangamiu.