1 PETURU 1 - Wunta Mempori

Tabea 1:1-2

¹ Inso ndi Peturu, tetenaa-Do i Yesu Kerisituu, a luwuno mia mehawe, anu ntesiarawo i Pontu, i Galatia, i Kapadokia, i Asia Kodei ka i Bitinia,

² onaemo mia anu mebininiki, menunu saru songka-Do Ue Ala, Amato, ka anu pinokomempori-Do Penaa, ka dompomperorongeako ndi Ondae i Yesu Kerisituu ka mentarimao tinawisiako rea-Do. Po'ineeomo pe'aroa ka rodoa ka ikohadi-hadiono ndi omiu.

Pomperorohia, pompe'ala-ala ka pompehohawa 1:3-12

³ Inunde-unde Iramo Ue Ala ka Ama Ueto i Yesu Kerisituu, anu hangano pompehohawa-Do anu langkai wali Iramo me'anaakita a mpewangu-Do inso i olodo mia mate, a aasa tuwua anu buke pomperorohia,

⁴ ka imentarimao aasa tia anu nahi pokotampula, anu nahi pokotesosa'ai ka nahi pokomoleu, anu imeninaaako i suruga.

⁵ Onaemo omiu anu tepekaria a laro roso-Do Ue Ala hangano pompe'ala-alamiu kontongaamiu mensikorio tekaduduia anu pinatindaomo ka ipinokomengkaa a mpokotompaano tempo.

⁶ Imemawongkoakonomo mongkona atuu, maupo kanandio-andio a tempo sarai omiu asalakono mpompemasusaako mperupa-rupa po'ara-arahako.

⁷ Tinoono luwuno atuu onaemo ka ipinokomengkaa menteeno pompe'ala-alamiu – anu masuliopo olino sekono wulaa anu ta pingko, anu inarahakoako api menteeno – onaemo ka impohawe po'unde-unde ka marambaa ka pelangkai a oleo Dopepokomengkaa i Yesu Kerisituu.

⁸ Maupo napi hori mengkita Ira, sine impehohawa Ira. Impe'ala-ala Ira, maupo nahi imengkita Ira kanandio-andio. Memawongko komiu hangano po'unde anu maramba ka anu nahi pinokopau,

⁹ hangano imehaweomo tinoono pompe'ala-alamiu, onaemo tekaduduino sumangamiu.

¹⁰ Tekaduduiamo atuu anu pinaresa ka pinepenteedo luwuno nabi, anu mpompau iramo anu ta gagi mongkona pe'aroa anu ta tiamiu.

¹¹ Ka dompepenteeo tempo anu isua ka anu kana'umpe tinoono Penaa-Do i Kerisituu, anu kongko i larodo, onaemo Penaa anu se'eluno mompowee ponsakosii mongkona luwuno tebobarasaia anu ta umalu Ira i Kerisituu ka mongkona luwuno marambaa anu metonda lembui umarino atuu.

¹² Ndi ondae pinokomengkaaomo, nine ondae komba pompekakaako koroido ondaedo, sine mpekakaakomiu a luwuakoano anu pinaleleomo ndi omiu kanandio-andio mesala ndi ondae, anu hangano Penaa Mempori, anu tinena inso i suruga, mohaweo Lele Mawongkoa ndi omiu, onaemo mongkona luwuno anu domingki mento'orio mala'eka.

Memporia ka pompehohawa pepaekompoa 1:13-25

¹³ Onaemo pu'uno imempatindaomo pompewowolo moilino, impetangkoromo ka imenaaomo luwuno pomperorohimiu a mpe'aroa anu imewineeako i tempono Dopepokomengkaa i Yesu Kerisituu.

¹⁴ Imentuwumo gagi nana'ote anu mpomperorongeako ka si mentondao po'eheno aroa anu pabawai komiu i tempono imebenge-benge,

¹⁵ sine po'ineeomo ka imegagi mempori a laro luwuno tumuwumiu mengkena kana Ondae anu mempori, anu moboi komiumo,

¹⁶ hangano hinao teburi: Memempori komiumo, hangano mempori Aku.

¹⁷ Ka tewala imeneeako Ira Ama, onaemo Ondae anu nahi Dopompesusua bitarao luwuno mia montonda wineweuno, ka po'ineeomo ka imentuwu a laro doitoa tempono imperato i wawontolino andio.

¹⁸ Hangano imento'orio, nine mentinolosi komiumo inso a gau ntumuwu anu nahina tuduno pusakamiu inso a uempu'umiu atuu komba saru sangka anu ta tampula, komba mbo'u saru salaka ke wulaa,

¹⁹ tendeano saru rea anu masuli olino, onaemo rea-Do i Kerisituu anu mengkena kana reano ana bimba anu nahi mokoburu ka nahina tataano.

²⁰ Bininiki Iramo se'eluno ipinokogagi wawontolino, sine – hangano omiu – ka Do'amba mepokomengkaa a pokotompaano tempo.

²¹ Hangano Ondae ka impe'ala-ala Ira Ue Ala, anu wangu Iramo inso i olodo mia mate ka anu mokomaramba Iramo, ranta pompe'ala-ala ka pomperorohimiu te'aro ndi Ondae Ue Ala.

²² Hangano koroimiu impokomemporiakonomo petenunu a menteea, onaemo ka impokoweweuo pompehohawa pepaekompoa anu inso i aroa, po'ineeomo ka imemambe pehohawa ntu'u tompaano aroamiu.

²³ Hangano wali komiumo mempine'anaako komba mepu'u inso anu ta tampulaano, sine mepu'u inso a nahi ta tampula, hangano pau-Do Ue Ala anu tuwu ka anu nahina tampulaano.

²⁴ Hangano, ”Luwuno anu tuwu onaemo kana ewo ka luwuno marambano kana sisino ewo, ewo gagi mokari, ka sisino ronta,

²⁵ sine pau-Do i Ue kongko mpiha ranta nahina tampulaano.” Ndiomo pau anu pinohaweno Lele Mawongkoa ndi omiu.