1 Mokole 9 - Wunta Mempori

Ondae i Ue mepopokita kompenduano ndi Salomo

¹ Mansano umari i Salomo wanguo raha-Do i Ue ka langkanaeno mokole, saru luwuno anu ineheno,

² Ondae i Ue mepopokita kompenduano ndi Salomo, kana umari-Do mepopokita ndi onae i Gibeo.

³ Ondae i Ue mepau ndi onae, ”Kurongeomo pekakai ka po'emamu anu pinohawemu i aro-Ku. Kupokomemporiomo raha anu winangumu andio anu weweuo nee-Ku mo'ia i tu'ai ranta nahina tampulano. Mata-Ku ka aroa-Ku ta mo'ia i ra'ai asantinuwu.

⁴ Omue mbo'u, tewala tuwuko i aro-Ku mengkena kana i Daudi, amamu, saru a moleono aroamu, tuwu moleo, ka moweweu menunu saru luwuno anu Kuparentaakomu, ka tewala upekariao luwuno pompakosi ka atora-Ku,

⁵ Aku mokorosoo kadera poparentaamu a nto Isaraeli, anu nahina tampulaano, kana anu Kudandiakonomo i Daudi, amamu, saru mepau: Inulemu nahi ta hori te'otu inso a ngkadera poparentaa i Isaraeli.

⁶ Sine tewala omue saru luwuno anamu mpebungkui Aku, nahi mpe'ini a luwuno parenta ka pompakosi-Ku anu Kuweeakomiumo i aromiu, ka melako mpesomba a mpinesombai susua ka mpenggoluntu mpelangkaio,

⁷ Aku mokotampula ira to Isaraeli inso a wawo wita anu Kuweeako iramo. Aku mebungkuio raha anu umariomo Kupokomemporio tiano nee-Ku atuu. Isaraeli ta gagi potundaano ka pasinggiri i olono luwuno tongku.

⁸ Raha andio tamokoa gagi hanga raha, ranta sompo mia anu telalo ta kohali-hali, ira mpomansu ka dompotae: Tembio Ondae i Ue ka Doweweuo kanandio wita ka raha andio?

⁹ Ira mpotae mia: Hangano ondae mebinta Ira Ue, Ue Alado, anu wawa ira uempu'udo mpeluarako inso i wita Masiri ka mpe'ini a mpinesombai susua ka mpenggolontu mpelangkaio saru mpesomba ndi onae. Onaemo pu'uno Ondae i Ue mompotii luwuno masukaraa andio ndi ondae.”

Pelempano Powanguno i mokole Salomo

¹⁰ Rua pulu nta'u lembuino, umari iwanguo i Salomo orua raha atuu, onaemo raha-Do i Ue ka langkanaedo mokole.

¹¹ I mokole Salomo moweeakono i Hirami rua pulu kota i wita Galilea, hangano i Hirami mokole i Tirusi, umariomo mompatindaakono i Salomo keu arasi, keu sanobari ka wulaa montonda hadiono anu ineheno.

¹² Sine, mansano hawe i Hirami inso i Tirusi ka ikitao luwuno kota anu iweeakono i Salomo atuu, nahina ine'eheo.

¹³ Onaemo ka ipotae, ”Kota kana hapa anu iwee akumo andiodo, pepaekompoku?” Mia meneeakono wita Kabuli ranta hawe oleo andio.

¹⁴ I Hirami umariomo mo'oliwiakono mokole asa etu rua pulu talenta wulaa.

¹⁵ Ndiomo burino mongkona luwuno mia mpo'angga dinadai anu umari tinenado mokole Salomo ka domewanguo raha-Do i Ue, langkanaeno onaeno, Milo, bente Yerusale, Hasori, Megido ka Geseri.

¹⁶ I Pirao, mokole i wita Masiri atuumo, anu lumako metea ka ipongko'alao Geseri, itunuo ka ipepate ira to Kana'a anu mpo'ia i kota atuu. Iweeakono kota atuu gagi kowei ndi anano, kombiano i Salomo.

¹⁷ Ka i'amba i Salomo wali wanguo Geseri. Domewanguo mbo'u Beti-Horoni Hiliri,

¹⁸ Ba'alati, Tamari i pada one, i wita atuu,

¹⁹ luwuno kota popumpuano kaanga i Salomo, luwuno kota po'iangano kareta, luwuno kota po'iangaado sorodadu mpengara, ka luwuno anu ineheno i Salomo wanguo i Yerusale, i torukuno Libano, ke a luwuno wita pinabawaino,

²⁰ Luwuno mia anu da tepo'ia, inso a nto Amori, to Heti, to Perisi, to Hewi ka to Yebusi, luwuno anu nahi tewinso to Isaraeli,

²¹ ondaemo inuledo tongku atuu anu da mpo'ia i wita atuu, anu nahi dompokoropuo to Isaraeli, ondaemo anu tinenano i Salomo gagi puu mpo'angga dinadai hawe oleo andio.

²² To Isaraeli nahina anu pinokogagi atano i Salomo. Ondae megagi sorodadu, pegawai, anu langkai potorono, ka sorodadu langkai pangkano, ke tadulakodo sorodadu mpekareta ka sorodaduno mpengara.

²³ Ndiomo luwuno petewawado puu mpodagai anu dumagaio anggaano i Salomo, lima etu ka lima pulu mia hadiono. Ondae parenta ira palili anu me'anggao anggaa atuu.

²⁴ Nahi tehine umarino melimba anano i Pirao inso i kota Daudi lumako i raha anu iwanguakonomo i Salomo tiano, i Salomo mowangu mbo'u Milo.

²⁵ Pentolu asa nta'u i Salomo mompesombaako pesomba tinunu ka pesomba tekaduduia a wawo meda pontunua pesomba anu winanguno tia-Do i Ue, saru mompesombaako pesomba dupa i aro-Do i Ue. Kanandiomo ipoko'umario raha atuu.

²⁶ I mokole Salomo mowangu mbo'u hadio kapala i Esioni-Geberi umpeda i Eloti, i wiwi ntahi Teberau i wita Edomi.

²⁷ Saru luwuno kapala atuu i Hirami tumena ira pegawai, luwuno anu mpo'angga a ngkapala anu mpoto'ori mongkona tahi, merongaako ira pegawaino i Salomo.

²⁸ Ondae melako i Opiri ka inso i ra'ai mpo'ala ira pato etu ka rua pulu talenta wulaa, ka do'amba mewawao ndi mokole Salomo.