1 Mokole 8 - Wunta Mempori

PORONSO RAHA MEMPORI 8:1-66 Burua pedandia linimba a raha-Do i Ue

¹ I Tempo atuu i mokole Salomo tumena ira luwuno mia memota'u to Isaraeli, luwuno petewawa suku, luwuno petewawa pepe'etuado to Isaraeli, mpepumpu i arodo mokole Salomo i Yerusale, ka domewawao burua pedandia-Do i Ue inso i kota Daudi, onaemo Sioni.

² Luwuno to Isaraeli mpepumpu i arodo mokole Salomo a oleo langkai i wula Etanimi, onaemo wula ko'opitu.

³ Mansado mehawe luwu mia memota'udo to Isaraeli, domentandeomo sando mpesomba burua atuu.

⁴ Domewawao burua-Do i Ue, Kema Tepotowoa, ka luwuno parewa mempori anu kongko a Kema atuu. Luwuno atuu domenselao sando mpesomba ka to Lewi.

⁵ I mokole Salomo ka luwuno to Isaraeli anu mpepumpu iramo i arono, meronga saru onae i arono burua atuu, mpopesombaako asa bawaa bembe bimba ka sapi anu nahi pinokodoa ka nahi pinokopau hadiono.

⁶ Ka i'amba luwuno sando mpesomba mewawao Burua Pedandia-Do i Ue atuu a mpo'iangano a bolongko i larono ntu'u raha atuu, po'ianga tedoa mempori, i totono panido kerubi;

⁷ Hangano kerubi atuudo wileo orua panido i wawono po'iangano burua atuu ka borungio burua saru luwuno keu ponselano inso i wawono.

⁸ Luwuno keu ponsela atuu ondau ntu'u. Tapuno tengkita inso a mpo'ianga mempori anu i arono bolongko i larono ntu'u atuu, sine nahi tengkita inso i bungkuno. I tu'aimo po'iangano ranta hawe oleo andio.

⁹ Nahina maupo hapa anu susua a laro burua atuu, sangkadio orua lempe watu anu ninaano i Musa i larono i torukuno Hore, po'iangaa-Do i Ue moweweu pedandia saru to Isaraeli i tempono dompeluarako inso i wita Masiri.

¹⁰ Mansado mpeluarako sando mpesomba inso a mpo'ianga mempori, bukeomo seru a laro raha-Do i Ue.

¹¹ Luwuno sando mpesomba nahi dompokompentade tehine mpoweweu pominggu hangano seru atuu, ka hangano maramba-Do i Ue umihiio raha-Do i Ue.

¹² Ka i'amba motae i Salomo, ”Ondae i Ue mepau Iramo, nine Ira mo'ia a laro nseru anu mokapa ntu'u.

¹³ Menteeano kupowanguaKomiumo raha anu tekosi, po'ianga-Miu mpiha ranta nahina tampulaano.”

Ondae i Ue umihiio dandi-Do ndi Daudi

¹⁴ Ka do'amba mokole mewolili me'aro a luwudo bawaa Isaraeli anu kontongaado mpentade ka i ronso ira.

¹⁵ Ipotae, ”Unde-unde Ira i Ue, Ue Alado to Isaraeli, anu Doweweuakonomo kae-Do pau anu Dopohaweakonomo wiwi-Do ndi Daudi, amaku, kanandio:

¹⁶ Mompu'u Kuwawa ira bawaa-Ku Isaraeli mpeluarako inso i wita Masiri, nahi Kupobiniki maupo kota hapa inso i olono luwuno suku Isaraeli kai winangu asa raha kai po'ia nee-Ku i ra'ai, sine Kubinikiomo i Daudi kai pabawai ira bawaa-Ku Isaraeli.”

¹⁷ I Daudi, amaku, dopo'asao aroado mowangu raha po'iangano nee-Do i Ue, Ue Alado to Isaraeli.

¹⁸ Sine mepau Ira i Ue ndi Daudi, amaku, ”Omue lano upo'asao aroamu mowangu raha po'iangano nee-Ku ka tinoomu atuu tedoa moiko.

¹⁹ Butumo koa omue nahi moiko uwanguo raha atuu, tendeano ana ngkoroimu anu ta pine'anaako, onaemo anu ta wanguo raha atuu tiano nee-Ku.

²⁰ Do'ihiiomo i Ue dandi anu umariomo Dopauo. Ongkuemo umeu ira i Daudi, amaku, ka mentoro a ngkadera poparentaa i Isaraeli, kana anu pinau-Do i Ue, saru wanguo raha andio tiano nee-Do i Ue, Ue Alado to Isaraeli.

²¹ I ra'ai kupatindaomo po'iangano burua pedandia, anu me'ihi pedandia anu wineweu-Do i Ue saru uempu'uto, tempono Dowawa ira mpeluarako inso i wita Masiri.”

Pekakaino i Salomo

²² Ka i'amba mentadeomo i Salomo i arono meda pontunua pesomba ndi Ondae i Ue i arodo luwuno bawaa Isaraeli, ka itaangakono kaeno kontahane i langi,

²³ ka ipotae, ”Oo Ue, Ue Alado to Isaraeli! Nahina Ue Ala kana Omiu, moiko i langi anu i wawono maupo i tolino anu i totono. Omiu anu mekariao pedandia ka pompehohawa a luwuno tetenaa-Miu anu tuwu tompaano aroano i aro-Miu.

²⁴ Omiu anu uminio dandi-Miu ndi tetenaa-Miu i Daudi, amaku, ka anu weweuakonomo kae-Miu pau anu Ipohaweakono wiwi-Miu, kana anu gagi a oleo andio.

²⁵ Kanandio-andio Oo Ue, Ue Alado to Isaraeli, Ipekariaomo hapa anu dinandi-Miu ndi tetenaa-Miu i Daudi, amaku, ka ipepau: Nahi ta hori te'otu i aro-Ku inulemu anu ta mentoro a ngkadera poparentaa i Isaraeli, tewala dompekario anamu salado saru mentuwu i aro-Ku, mengkena kana utuwu i aro-Ku.

²⁶ Kanandio-andio Oo Ue, Ue Alado to Isaraeli, Po'ineeomo ka igagi mengkaa dandi anu Ipauomo ndi tetenaa-Miu i Daudi, amaku.

²⁷ Sine menteeke Omiu Ue Ala Komiu mo'ia i wawontolino? Menteeano langi, tendeano maupo langi luwuno langi, nahi ta moko'ulaKomiu, tamoako lahi raha anu winanguku andio.

²⁸ Maupo kanatuu, Irongeomo pekakai ka po'emano tetenaa-Miu andio, Oo Ue, Ue Alaku, Irongeomo pebooli ka pekakai anu winuatakono tetenaa-Miu i aro-Miu a oleo andio!

²⁹ Po'ineeomo ka Ipensiroio mpiha raha andio meene ka wongi, a mpo'ianga anu pinau-Miu, ’nee-Ku ta mo'ia i ra'ai,’ ka irongeo pekakai anu winuatakono tetenaa-Miu a mpo'ianga andio.

³⁰ Irongeomo po'emano tetenaa-Miu ka bawaa-Miu Isaraeli anu winuatako a mpo'ianga andio. Irongeomo a mpo'ianga-Miu i suruga; Irongeomo ka I'ampuni kamimo.

³¹ Tewala asa mia tehala a mpe'asa miano, ka itinena mesumpaako totonaa a ngkoroino, ka i'amba aiwa mesumpa i arono meda pontunua pesomba-Miu i raha andio,

³² po'ineeomo Irongeo i suruga, Iweweuo ka Ibitara ira tetenaa-Miu: humukuo anu sala saru mombalo wineweuno a ngkoroino onaeno, ka mokomenteeo mia anu mentee, saru moweeakono ponsulo menunu saru menteeno.

³³ Tewala bawaa-Miu to Isaraeli ntenangi a iwalido hangano ntehala ira ndi Omiu, ka do'amba wali mpepokule ndi Omiu ka pementeeo nee-Miu, mpekakai ka mpo'ema pompehohawa ndi Omiu i raha andio,

³⁴ po'ineeomo Irongeo inso i suruga, I'ampunio halado bawaa-Miu Isaraeli ka Iwawa ira mpepokule a wita anu Iweeako iramo uempu'udo.

³⁵ Tewala langi tetutuwi ka nahina usa, hangano ntehala ira ndi Omiu, ka do'amba mpekakai a mpo'ianga andio, pementeeo nee-Miu ka ntepidiakono halado, hangano Ipokonsii iramo,

³⁶ po'ineeomo i suruga ka I'ampunio halado tetenaa-Miu, bawaa-Miu Isaraeli, hangano Omiumo anu montisoako ira sala anu moiko anu asalakono ira mentondao. Po'ineeomo Ipompotii usa a wawo wita-Miu anu Iweeako iramo bawaa-Miu gagi tia pusaka-Do.

³⁷ Tewala i wita andio hinao mokoninggoa, hinao haki lele, ponsolagi pinopaho, haki mpinopaho, kosume, ke kosume mpokaa pinopaho, tewala iwali kumadu ira i aasa kotado, hapamokoa pohuku ke haki anu hina,

³⁸ ka i'amba asa mia ke luwudo bawaa-Miu to Isaraeli mpowuatako pekakai ka mpo'ema pompehohawa ka mentandeo kaedo i raha andio, hangano singge mia tumo'orio ma'isono aroano.

³⁹ Po'ineeomo Irongeo i suruga, po'ianga-Miu mpiha. Po'ineeomo Ipo'ampuni, moweweu, ka mombalo a sompo mia menunu saru luwuno wineweuno, hangano Omiumo tumo'orio aroano. Mentee ntu'u, butu koa Omiu anu tumo'orio aroano luwuno mia,

⁴⁰ ranta ka domedoitoako-Miu asa ntinuwudo i wawo wita anu Iweeako iramo uempu'u mami.

⁴¹ Kanatuu koa mbo'u tewala hinao asa mia hawe, anu nahi tewinso bawaa-Miu Isaraeli, aiwa inso i wita olai hangano nee-Miu, —

⁴² hangano ira merongeo mia mongkona nee-Miu anu langkai ka kae-Miu anu moroso saru tokia-Miu anu tetande — tewala onae aiwa mekakai i raha andio,

⁴³ po'ineeomo Irongeo mbo'u i suruga, po'ianga-Miu mpiha. Po'ineeomo Iweweuo menunu saru luwuno anu pinebooliakono mia hawe atuu ndi Omiu, ka luwuno tongku i tolino tumo'orio nee-Miu ka dumoitoako-Miu mengkena kana bawaa-Miu Isaraeli. Onaemo ka domento'orio nine raha anu kuwanguomo andio pinesusua tiano nee-Miu.

⁴⁴ Tewala bawaa-Miu mpeluarako mpetea umewai ira iwalido, maupo isua Itena ira, ka dompekakai ndi Omiu Ue, mpe'aro i kota anu Ibinikiomo ka a raha kuwanguomo tiano nee-Miu,

⁴⁵ po'ineeomo Irongeo i suruga pekakai ka po'emado ka moweeako ira moleoa.

⁴⁶ Tewala ntehala ira ndi Omiu, hangano nahina mia anu nahi tehala, ka tekuda-Miu ndi ondae, ka Ipeweengako ira a iwali, ka domewinawa gagi mia ntinawa a witado iwali anu olai ke anu umpeda,

⁴⁷ sine, tewala wali ira mpe'o'oleakono halado i wita po'iangado mentinawa, ka dompepokule, saru mpo'ema pompehohawa ndi Omiu i witado mia anu wawa ira gagi mia ntinawa, ka dompotae: Ntehala kamimo, mensala, ka mpoweweu anu mosa'o,

⁴⁸ tewala mpepokule ira ndi Omiu tompaano aroado ka tompaano tinuwudo i witado iwali anu wawa ira mentinawa, ka tewala mpekakai ira ndi Omiu saru mpe'aro a witado anu Iweeako iramo uempu'udo, a ngkota anu Ibinikiomo ka a raha anu kuwanguomo tiano nee-Miu,

⁴⁹ po'ineeomo Irongeo i suruga, po'ianga-Miu mpiha, pekakai ka po'emado ka moweeako ira moleoa.

⁵⁰ Po'ineeomo I'ampuni ira bawaa-Miu, anu ntehala iramo ndi Omiu ka luwuno pe'ewa anu wineweudo ndi Omiu, ka Iweeako iramo pompehohawa i arodo mia anu wawa ira gagi mia mentinawa, ranta mia atuudo mpehohawa ira,

⁵¹ hangano ondae atuu bawaa-Miu ka tia pusaka-Miu anu Iwawa iramo mpeluarako inso i wita Masiri, inso i tongano awu pompokolonoa labu.

⁵² Po'ineeomo Ipensiroio po'emano tetenaa-Miu ka a mpo'emado bawaa-Miu Isaraeli. Po'ineeomo Ironge ira maupo te'ipia dompebooli ndi Omiu.

⁵³ Hangano Omiumo anu monsia ira gagi tia pusaka-Miu inso i olodo luwuno tongku i tolino, kana anu Ipauomo molalo i Musa, tetenaa-Miu, i tempono Iwawa ira uempu'u mami mpeluarako inso i wita Masiri, Oo Ue Ala!”

Poronso ka po'unde-undeno i Salomo

⁵⁴ Mansano umari i Salomo tumandeo luwuno pekakai ka po'emano atuu ndi Ondae i Ue, mentadeomo inso i arono meda pontunua pesomba ndi Ondae i Ue, umari menggolontu ka itandeo kaeno kontahane i langi.

⁵⁵ Onae mentade ka ironso ira luwuno bawaa Isaraeli, ka ipepau meroku, ipotae,

⁵⁶ ”Unde-unde Ira i Ue, anu moweeako ira penaa-naaa a bawaa-Do Isaraeli menunu saru luwuno anu dinandi-Do; nahina maupo te'asa anu nahi Do'ihiio inso a luwuno dandi anu moiko, anu dinandi-Do molalo i Musa, tetenaa-Do.

⁵⁷ Po'ineeomo Ondae i Ue, Ue Alato, kumongkomi kita kana Dokongkomi iramo uempu'uto. Topomperorohi nahi Dobinta kita ke maupo tumadi kita,

⁵⁸ sine mokompetakoo aroato ndi Ondae ka tomentuwu montonda luwuno sala anu tiniso-Do, mekariao luwuno parenta-Do, luwuno pompakosi-Do ka luwuno atora-Do anu Doparentaako iramo uempu'uto.

⁵⁹ Po'ineeomo luwuno po'ema anu kupohaweomo i aro-Do i Ue, kongko umpeda ndi Ondae i Ue, Ue Alato, i tempono meene ka wongi, ranta ka Dopoweeako ira moleoa a ntetenaa-Do ka a bawaa-Do Isaraeli menunu anu kineredo sompo oleo,

⁶⁰ kai luwuno tongku i tolino tumo'orio, nine Ondaemo i Ue, Ue Ala, ka nahina anu susua.

⁶¹ Onaemo pu'uno, kai buke petenununo aroamiu ndi Ondae i Ue, Ue Alato, ka mentuwu montonda luwuno pompakosi-Do ka mekariao luwuno parenta-Do kana a oleo andio.”

Pesomba poronsoa ka pogawea

⁶² Ka do'amba mokole saru luwudo to Isaraeli mpopesombaako pesomba sinumbele i aro-Do i Ue.

⁶³ Gagi pesomba tekaduduia ndi Ondae i Ue, i Salomo mompesombaako rua pulu ka orua nsowu sapi ka asa etu ka rua pulu nsowu bembe bimba. Kanandiomo i mokole saru luwudo to Isaraeli meronsoo raha-Do i Ue atuu.

⁶⁴ A oleo anu mengkena, i tongano kintala anu i arono raha-Do i Ue. Hangano i tu'aimo ipompesombaako pesomba tinunu, pesomba kaanga ka luwuno taba pesomba tekaduduia, hangano meda pontunua pesomba mala anu i aro-Do i Ue atuu, kodei lahi pumpuano pesomba tinunu, pesomba kaanga ka luwuno taba pesomba tekaduduia atuu.

⁶⁵ A tempo mbo'u atuu, i Salomo moweweu pogawea i aro-Do i Ue, Ue Alato, saru luwuno to Isaraeli, asa bawaa anu langkai, mompu'u inso a nsala mewinso lumako i Hamati hawe a ngkoro Masiri, opitu oleo tehineno, ka i'amba opitu oleo mbo'u, luwuno hopulu ka opaa oleo.

⁶⁶ A ngko'oalu oleono, itena ira tongku atuu melako. Mpo'ema ira ronso tiado mokole, ka do'amba mpekule a ngkemado saru mpo'unde ka mawongko aroado, hangano luwuno moikoa anu Doweweuomo i Ue ndi Daudi, tetenaa-Do ka a nto Isaraeli, bawaa-Do