1 Mokole 7 - Wunta Mempori

Langkanaeno i Salomo

¹ I Salomo mowangu langkanaeno hopulu ka otolu nta'u tehineno, ranta luwuno langkanae atuu umari iwanguo.

² Onae mowangu raha langkai ”Wana Libano,” asa etu hiku ondauno, lima pulu hiku maluano ka tolu pulu hiku mantandeno, saru opaa dede karuno inso a ngkeu arasi ka luwuno sobo keu arasi i wawono karuno atuu.

³ Raha langkai atuu inso i wawono tinutuwiako keu arasi, i wawono luwuno sobo anu tinumbono pato pulu ka olima karuno, sompo dede hopulu ka olima karuno.

⁴ Hinao mbo'u otulu dede simpino pentangoa; otolu dede pentangoa tepo'aro saru pentangoa i larono.

⁵ Luwuno pewowa ka pentangoano tadeno mensiu opaa; otolu dede pentangoa pada tepo'aro.

⁶ Iweweuo mbo'u tambi mekaru, lima pulu hiku ondauno, ka tolu pulu hiku maluano. I arono hinao mbo'u tambi mekaru ka me'ensa i arono.

⁷ Iweweuo mbo'u Bansala Pentoroano mobitara. Bansala Pobitaraa atuu inapiiako keu arasi inso a horono hawe a dunsi.

⁸ Raha po'iangano onaeno, a kintala susua i bungkuno bansala atuu, mengkena mbo'u weweuno. I Salomo moweweu mbo'u asa raha, kana bansala atuu, tiano anano i Pirao, anu inalano gagi kombiano.

⁹ Luwuno atuu wineweu inso a watu biniki anu pinole montonda songkano ka pinokomereako parewa pompole i larono ka i bungkuno, inso i totono hawe i wawono, ka inso a rere i bungkuno hawe a rereno a kintala langkai.

¹⁰ Maupo pondasino inso mbo'u a watu bininiki, watu melolangkai, watu anu songkano hopulu hiku ka oalu hiku.

¹¹ I wawono hinao watu bininiki, anu pinole menunu songkano ka keu arasi mbo'u.

¹² Hinao otolu dede watu pina'o ka asa dede sobo keu arasi lumimbuo kintala langkai, mengkena kana kintala i larono a raha-Do i Ue ka bolongkono.

Luwuno parewa labu a Raha Mempori

¹³ Ka i'amba i mokole Salomo montena mia lumako umalao i Hirami inso i Tirusi.

¹⁴ Onae anano asa tuwu beine inso a nsuku Napatali, sekono amano to Tirusi, puu moweweu parewa inaso a mala. Onae bukeako pande ka ponto'ori ka magasi a mpoweweua luwuno anggaano mala. Onae aiwa ndi ondae mokole Salomo, ka i'amba weweuako ira mokole luwuno anggaa atuu.

¹⁵ Iweweuo orua karu raha mala, karu raha anu asa hopulu ka oalu hiku mantandeno ka pinokowewesiako ula hopulu ka orua hiku ondauno. Kanatuu koa mbo'u karu raha anu susua.

¹⁶ Iweweuo mbo'u orua uluno karu raha inso a mala tinawa ta ninaa i untuno orua karu raha atuu. Uluno karu raha anu asa, olima hiku mantandeno, ka anu susua mbo'u olima hiku.

¹⁷ Iweweuo mbo'u orua ramba-ramba kana buani tiano uluno karu raha anu i untuno karu raha atuu, kana enano rante; opitu ena tiano asa karuno raha ka opitu mbo'u tiano karu raha anu susua.

¹⁸ Ka i'amba moweweu orua dede wua delima lumimbuo ramba-ramba buani anu asa, kai tumutuwio uluno karuno i untuno karuno atuu; kanatuu mbo'u iweweou a uluno karuno anu susua.

¹⁹ Luwuno uluno karuno i untuno karuno anu umpeda a bolongko i arono atuu kana tadeno sisi bonse, mantandeno opaa hiku.

²⁰ A luwuno uluno karuno i wawono orua karuno atuu, i wawono te'alaako i tongano umpeda ramba-ramba buani atuu, hinao rua etu wua delima mpedede lumimbuo uluno karuno anu asa ka anu susua mbo'u.

²¹ Ka i'amba luwuno karuno atuu ipontadeo umpeda tambino bolongko langkai. Ipontadeo karuno i koana, ka ineeakono Yakini. Ka i'amba montadeo karuno i manggali, ka ineeakono Boasi.

²² I untuno luwuno karuno atuu inaao ramba-ramba sisi bonse. Ka umariomo anggaano orua karuno atuu.

²³ Ka i'amba moweweu bolusa langkai anu nineeako ”tahi” tinawa, tadeno bonggoli, inso i wiwino hawe i wiwino hopulu hiku, mantandeno olima hiku ka pinoko wewesiako ula tolu pulu hiku ondauno.

²⁴ I totono wiwi ”tahi” atuu, hinao gambara wua sumpere lumimbuo, hopulu gambara i larono asa hiku. Gambara wua sumpere anu lumimbuo ”tahi” atuu hinao orua dede ka pinotako tinawa meronga saru onae.

²⁵ ”Tahi” atuu mentade i wawono hopulu ka orua sapi, otolu me'aro i utara, otolu me'aro i sumooano oleo, otolu me'aro i selata ka otolu me'aro i sabaano oleo. ”Tahi” atuu mo'ia i wawono, sekono luwuno ikino sapi atuu me'aro i larono.

²⁶ Mokapano ”tahi” atuu asa pele ngkae ka wiwino kana wiwino tonde mekaru kana sisi bonse anu tewile. ”Tahi” atuu mompoko'ula rua nsowu bati uwoi.

²⁷ Iweweuo mbo'u hopulu kareta pontumbo inso a mala, asa kareta opaa hiku ondauno, opaa hiku maluano ka otolu hiku mantandeno.

²⁸ Kanandio tadeno kareta pontumbo atuu: hinao dopi tutuwino ka dopi atuu i'asio simpi.

²⁹ A dopi pontutuwi anu inasino simpi atuu hinao singa, sapi, ka kerubi; kanatuu mbo'u a simpino atuu. I wawono ka i totono singa ka sapi atuu hinao bunga tinangkei anu pinalu.

³⁰ Sompo kareta pontumbo hinao opaa bolano inso a mala saru tambeno mala koa mbo'u. Opaa karuno kareta hinao pontumbo bolusa pewo'ohia. Luwuno pontumbo atuu wineweu inso a mala, ka i bungkuno sompo pontumbo hinao gambara bunga tinangkei.

³¹ Ngangano kareta pontumbo atuu kongko i larono luwuno pontumbo atuu, telanso asa hiku i wawono. Ngangano atuu bonggoli, wineweu gagi pentorono, ka ondalono asa ka entonga hiku. A ngangano mbo'u atuu hinao nggori-nggorino. Sine luwuno dopi tutuwino mensiu opaa, nahi bonggoli.

³² Opaa bolano atuu mo'ia i totono dopi pontutuwi, ka luwuno taralino bola atuu menggoe saru kareta pontumbo. Mantandeno sompo bolano asa ka entonga hiku.

³³ Luwuno bolano atuu wineweu kana bolano kareta mpe'iwali. Luwuno petakoano taralino, bolilino, taralino ka petakoano tarali i tongano, luwuno hasilino tinawa.

³⁴ Opaa pontumbo a opaa siuno sompo kareta pontumbo menggoe saru kareta atuu.

³⁵ I wawono kareta pontumbo atuu, hinao we'u bonggoli mantandeno entonga hiku. I wawono kareta pontumbo atuu hinao mbo'u tarali pontumbo ka dopi pontutuwi anu menggoe saru kareta atuu.

³⁶ A wawono luwuno tarali pontumbo atuu ka a luwuno dopi tutuwino, inggorio kerubi, singa, ka keu kuruma, sompo gambara montonda po'iangano, saru bunga tinangkei lumimbuo.

³⁷ Kanatuumo hopulu kareta pontumbo atuu iweweuo: tawaano, songkano, ka tadeno mengkena luwu.

³⁸ Iweweuo mbo'u hopulu bolusa pewo'ohia inso a mala. Sompo bolusa me'ihi pato pulu bati uwoi. Sompo bolusa songkano opaa hiku ka hinao asa bolusa i wawono sompo kareta inso a hopulu kareta pontumbo atuu.

³⁹ Olima kareta pontumbo inaao i koanano raha atuu, ka olima i manggalino. Sine ”Tahi” atuu inaao i koanano raha atuu, te'aro i tenggara.

⁴⁰ I Hirami weweu ira mbo'u kusi, sikopa, ka loea kodei ponsiwui. Kanandiomo ipoko'umario i Hirami luwuno anggaa anu asalakono iweweuakono mokole Salomo a raha-Do i Ue:

⁴¹ orua karuno saru orua bonggolino uluno karuno i untuno karuno atuu, ka orua ramba-ramba kana buani anu tumutuwio orua bonggolino uluno karuno atuu;

⁴² Wua delima anu pato etu tiano orua ramba-ramba buani atuu, orua dede wua delima tiano asa ramba-ramba buani kai tutuwio orua bonggoli uluno karuno i wawono karuno atuu;

⁴³ Hopulu kareta pontumbo ka hopulu bolusa pewo'ohia i wawono kareta atuu;

⁴⁴ ”Tahi” anu asa atuu ka hopulu ka orua sapi i totono ”Tahi” atuu;

⁴⁵ luwuno kawali, sikopa ka loea kodei ponsiwui. Luwuno parewa anu wineweuno i Hirami tiado mokole Salomo a raha-Do i Ue atuu wineweu inso a mala anu tinawa ka imangkilo.

⁴⁶ Luwuno atuu doweweuo mokole, tinawa a wita pulu i Lembono Yarade, olono Sukuti ka Saritani.

⁴⁷ I Salomo nahi petena kai tinimba luwuno parewa atuu, hangano hadio ntu'u; mala atuu nahi pinokodoa mobeano.

⁴⁸ I Salomo weweuo luwuno parewa anu kongko a laro raha-Do i Ue, onaemo meda pontunua pesomba wulaa, meda wulaa po'iangano roti pesomba;

⁴⁹ luwuno hulu mekaru inso a wulaa mpena i arono bolongko i larono ntu'u, olima i koana ka olima i manggali; bungano, hulu, ka sipino, luwuno inso a wulaa;

⁵⁰ bolusano, piso, luwuno loea kodei ponsiwui, sangkiri ka polu pontunua, luwuno inso a wulaa moiko. Henseno tondo anu i bolongko i larono ntu'u, onaemo po'ianga tedoa mempori, ka henseno tondo bolongko langkai Raha Mempori, luwuno inso a wulaa.

⁵¹ Ka umariomo luwuno anggaa anu wineweudo mokole Salomo a raha-Do i Ue atuu. Ka i'amba i Salomo winso ira sangka memporino i Daudi, amano, ka inaao salaka, wulaa, ka luwuno sangka atuu a laro bolongko ponaapa arataano raha-Do i Ue.