1 Mokole 6 - Wunta Mempori

I Salomo mowangu Raha Mempori

¹ A nta'u kopato etu ka halo pulu umarido mpeluarako to Isaraeli inso i wita Masiri, a nta'u ko'opaa umarino i Salomo gagi mokole i Isaraeli, ilarono wula Siwa, wula ko'orua, i Salomo mompu'u mowangu raha tia-Do i Ue.

² Raha anu winangudo mokole Salomo tia-Do i Ue atuu, nomo pulu hiku ondauno, rua pulu hiku maluano ka tolu pulu hiku mantandeno.

³ Maluaano i arono bolongko langkai, ondauno rua pulu hiku, menunu saru maluano raha atuu, ka maluano hopulu hiku te'alaako i arono raha atuu.

⁴ A raha atuu iweweu ira pentangoa anu pore taralino.

⁵ Iweweuo bolongko tiangino a rere lumimbuo raha atuu, moiko lumimbuo bolongko langkai maupo bolongko i larono ntu'u. Luwuno iweweuo metuda.

⁶ Tudano i totono maluano olima hiku, tudano i tongano, onoo hiku ka tudano ko'otolu, opitu hiku. Hangano iweweuomo bolo-bolono a rereno i bungkuno lumimbuo raha atuu, onae kanami ta biniloi mbo'u rereno raha atuu.

⁷ Tempono iwinangu, raha atuu wineweu inso a mpole-poleno watu anu pinatindaomo, ranta nahi teronge unino palu ke uase ke parewa labu hapamo koa i larono mpowangu raha atuu.

⁸ Pewowano tudano i totono, po'iangano i apa ngkoanano raha atuu ka mia mpewuatako telalo a ensa metanggolili lumako a ntudano i tongano ka inso a ntudano i tongano lumako a ntudano ko'otolu.

⁹ Mansano umari wanguo raha atuu, iweweuo dunsino raha atuu inso a nsobo ka dopi keu arasi.

¹⁰ Bolongko tiangino iwanguo lumimbuo raha atuu, sompo bolongko olima hiku mantandeno, ka i'amba pinosombu a raha atuu saru keu arasi.

¹¹ Haweomo pau-Do i Ue ndi Salomo, kanandio,

¹² ”Mongkona raha anu kontongaamu wanguo andio, tewala tuwuko menunu saru luwuno pompakosi-Ku ka metenunu weweuo luwuno atora-Ku saru mekariao luwuno parenta-Ku saru molempao, Aku umihiio dandi-Ku ndi omue anu Kupauomo ndi Daudi, amamu,

¹³ nine Aku mo'ia i olodo to Isaraeli ka nahi Aku binta ira bawaa-Ku Isaraeli.”

¹⁴ Kanatuumo iwanguo i Salomo raha atuu ka ipoko'umario.

¹⁵ Larono raha atuu i apiiakono dopi keu arasi, mompu'u inso a horono raha hawe a nsobono dunsi, i apiiakono dopi keu arasi, sekono horono raha atuu i apiiakono dopi keu sanobari.

¹⁶ I bungkuno raha atuu, anu ondauno rua pulu hiku, i olotiakono rere dopi keu arasi, mompu'u inso a horono hawe luwuno sobono. Po'ianga atuu iweweuo gagi bolongko i larono ntu'u, po'ianga tedoa mempori.

¹⁷ I arono bolongko i larono ntu'u, po'iangano bolongko langkai, pato pulu hiku ondauno.

¹⁸ Keu arasi anu i larono raha atuu menggoriako gambarano sumpere ka bunga tewile; luwuno inso a ngkeu arasi, nahina watu anu tengkita.

¹⁹ Kanatuumo ipatindao bolongko i larono ntu'u a raha atuu, i bungkuno ntu'u, kai ninaa i ra'ai burua pedandia-Do i Ue.

²⁰ Bolongko i larono ntu'u atuu, rua pulu hiku ondauno, rua pulu hiku maluano, ka rua pulu hiku mantandeno. I'apiiakono wulaa mpena. Ka i'amba meda pontunua pesomba i'apiiakono mbo'u keu arasi.

²¹ I Salomo umapiiakono wulaa mpena apano i larono raha atuu, ka i'amba padindiakono rante wulaa i arono bolongko i larono ntu'u, anu i'apiiakono wulaa.

²² Luwuno laro raha atuu i'apiiako wulaa, ranta luwuno laro raha atuu te'apii luwu. Meda pontunua pesomba i arono bolongko i larono ntu'u atuu, luwuno i'apiiakono mbo'u wulaa.

²³ A bolongko i larono ntu'u atuu, iweweuo orua kerubi inso a ngkeu lana, sompo kerubi hopulu hiku mantandeno.

²⁴ Panino kerubi anu asa kerubi atuu olima hiku ondauno, ka panino kerubi anu susua olima hiku mbo'u, ranta inso i tapuno panino anu asa hawe i tapuno panino i susua, hopulu hiku ondauno.

²⁵ Kerubi anu ko'orua hopulu hiku mbo'u ondauno. Orua kerubi atuu mengkena songkano ka mengkena tadeno.

²⁶ Mantandeno kerubi anu asa hopulu hiku, kanatuu koa mbo'u kerubi anu susua.

²⁷ Inaa ira kerubi atuu i tonga-tongano bolongko i larono ntu'u. Panido kerubi atuudo tewile, ranta panino kerubi anu asa dumalio rere ka panino kerubi anu susua dumalio rere anu susua. Luwuno panido anu me'aro a ntongano raha atuu pada tepodali.

²⁸ Luwuno kerubi atuu i'apiiakono wulaa.

²⁹ A luwuno rere lumimbuo raha atuu inggorio gambarano kerubi, keu kuruma ka bunga tewile, moiko i larono maupo i bungkuno.

³⁰ Horono mbo'u raha atuu i'apiiakono wulaa, moiko anu i larono maupo anu i bungkuno.

³¹ Gagi pewowa pewinsoa lumako a bolongko i larono ntu'u, iweweu ira pewowa inso a ngkeu lana, montoweano i wawono ka karuno mensiu olima.

³² A orua pewowa inso a ngkeu lana atuu, inggorio gambara kerubi, keu kuruma, ka bunga tewile, ka i'amba umapiiakono wulaa. Ihahiakono mbo'u wulaa a ngkerubi ka keu kuruma atuu.

³³ Kanatuu koa mbo'u tiano pewowa mewinso lumako a bolongko langkai, iweweu ira karuno inso a ngkeu lana mensiu opaa,

³⁴ ka orua pewowano inso a ngkeu sinobari. Orua lewe tondo inso a mpewowa anu asa moiko ilinupi, kanatuu koa mbo'u orua lewe tondo anu susua.

³⁵ A leweno pewowa atuu, inggorio kerubi, keu kuruma ka bunga tewile, ka i'amba ngginori atuu i'apiiakono wulaa anu hinahi merete.

³⁶ Iweweuo kintala i larono saru otolu dede watu pina'o ka asa dede sobo keu arasi.

³⁷ A nta'u anu ko'opaa, i larono wula Siwa, pondasino raha-Do i Ue pinu'u,

³⁸ ka a nta'u anu kohopulu ka asa, i larono wula Buli, wula ko'oalu, umariomo raha atuu saru luwuno bolongkono ka menunu saru luwuno anu sinongkano. Iwanguo raha atuu opitu nta'u tehineno.