1 Mokole 5 - Wunta Mempori

Pepatinda mpowangu Raha Mempori

¹ I Hirami, mokole i Tirusi, tumena ira pegawaino melako ndi Salomo, tempono irongeo nine i Salomo inurapiomo gagi mokole umeuo amano, hangano i Hirami mewali-wali ira mpiha i Daudi.

² Ka i'amba i Salomo montena mia lumako ndi Hirami saru pe'oliwi,

³ ”Ito'orio nine i Daudi, amaku, nahi dopolio mowangu aasa raha tiano nee-Do i Ue, Ue Alado, hangano luwuno iwalido tiku-tiku mpeteaako ira, ranta ka Dopeweengako ira i Ue a ntoto pele ngkarudo.

⁴ Sine kanandio-andio, Ondae i Ue, Ue Alaku, Dopowee akumo rodoa tiku-tiku, nami hina mbo'u ewaiku ka nami hina mbo'u masolaa.

⁵ Kai to'oriomo, Tinooku aku mowangu asa raha tiano nee-Do i Ue, Ue Alaku, kana anu dinandi-Do i Ue ndi ondae amaku i Daudi, kanandio: Anamu anu Aku motoroo a ngkadera poparentaamu umeuko, onaemo anu ta wanguo raha atuu tiano nee-Ku.

⁶ Onaemo pu'uno, parenta iramo mia mpotuehiakune keu arasi inso i torukuno Libano ka luwuno ataku mpokowali ira atamiu. Tambodo atamiu aku umowahio ndi omiu, maupo te'opia ipo'ema, hangano ito'orio, nine i olomami nahina maupo te'asa mia anu monto'ori montuehi keu kana to Sidoni.”

⁷ Mansano rumongeo i Hirami pe'oliwino i Salomo atuu, tedoaomo mo'unde ka ipotae, ”Unde-unde Ira i Ue a oleo andio, hangano Dopoweeakonomo i Daudi asa ana anu pande mompewowolo wawa ira tongku anu langkai atuu.”

⁸ Ka i'amba i Hirami montena mia lumako ndi Salomo, ipotae, ”Kurongeomo pe'oliliwimiu. Aku koa weweuo luwuno po'ehemiu mongkona keu arasi ka keu sanobari.

⁹ Luwuno ataku anu mpotiio inso i torukuno Libano hawe i tahi ka luwuno keu atuu aku mokogagi ira lanti kai pinolomo a ntahi, te'aro a mpo'ianga anu komiu tumisoakune. Luwuno atuu aku kumaleo i ra'ai ka ipinokowawa. Ka omiu asalakono umihiio po'eheku onaemo mompowee kaanga tiano ihino langkanaeku.”

¹⁰ Kanatuumo i Hirami moweeakono keu arasi ka keu sanobari ndi Salomo montonda hadiono anu inemano.

¹¹ I Salomo moweeakono i Hirami rua pulu nsowu kor gandu kaangado ihino langkanaeno ka rua pulu kor lana inisa anu moiko. Onaemo atuu anu iweeakono i Salomo ndi Hirami sompo-sompo ta'u.

¹² Ondae i Ue moweeakono i Salomo ponto'ori mompewowolo kana anu dinandi-Do ndi onae. I olodo i Hirami ka i Salomo hinao manangai ka orua ira moweweu pedandia.

¹³ I mokole Salomo tumena ira mia mpo'angga dinadai inso i olodo luwuno Isaraeli, tolu pulu nsowu mia.

¹⁴ Itena ira melako i Libano, hopulu nsowu mia sompo wula, wela mpe'eu-eu: i larono asa wula i Libano, ka i larono orua wula i raha. I Adonira gagi petewawado mia mpo'angga dinadai.

¹⁵ I Salomo hinao mbo'u pitu pulu nsowu mia puu mpotandeno sangka, ka halo pulu nsowu mia puu mpompole watu i mentorukuno.

¹⁶ Umarino atuu i Salomo hinao tolu nsowu ka tolu etu mia mandoro anu metewawa a anggaa atuu ka dumagai ira palili anu me'anggao anggaa atuu.

¹⁷ Ondae mokole meparenta ka dopompeha watu melolangkai, inso a mpoleno watu atuudo luwuno watu tebiniki ta wineweu pondasino raha.

¹⁸ Luwuno puu mpo'anggano i Salomo, luwuno puu mpo'anggano i Hirami ka luwuno to Gebali meweweuo tadeno. Keu ka watu domempatindao tiano wanguno raha atuu.