1 Mokole 4 - Wunta Mempori

Luwuno petewawano i Salomo

¹ I Salomo gagi mokole a luwuno Isaraeli.

² Ndiomo luwuno anu langkai potorodo: i Asaria anano i Sadoki gagi sando mpesomba,

³ i Elihore ka i Ahia, ondae anano i Sisia gagi puu mpoburi a poparentaa. I Yosapa anano i Ahiludi gagi puu mpopekaria arataa.

⁴ I Benaya anano i Yoyada gagi tadulako sorodadu. I Sadoki ka i Abiata gagi sando mpesomba.

⁵ I Asaria anano i Nata kumitao inanggado luwuno petewawa, i Sabudi anano i Nata, asa mia sando mpesomba sambe'edo mokole.

⁶ I Ahisari, petewawa a langkanae; i Adonira anano i Abida, petewawado mia mpo'angga dinadai.

⁷ Hinao hopulu ka orua bupatino i Salomo a luwuno wita Isaraeli. Ondae asalakono mpopatinda kaanga tiado mokole ka luwuno ihino langkanae, singge mia mompatinda kaanga tiano asa wula i larono asa nta'u.

⁸ Ndiomo luwu needo: I Beni-Huru, i menturukuno Eparai;

⁹ i Beni-Dekeri, i Makasi, i Saalibi, i Beti-Semesi ka i Eloni-Beti-Hanani;

¹⁰ i Beni-Hesedi, i Aruboti, witano Soko ka luwuno wita Heperi;

¹¹ i Beni-Aminada, i luwuno wita pongku Dore; kombiano onaemo i Tapati ana beineno i Salomo.

¹² I Ba'ana anano i Ahiludi, i Ta'anaka, i Megido ka luwuno Beti-Seani anu i asambalino Saratani i selatano Yesire'eli, inso i Beti-Seani hawe i Abeli-Mehola hawe i asa towano Yokemeami.

¹³ Ka i'amba i Beni-Geberi, i Ramoti-Gileadi; wita pinabawaino Hawoti-Yaeri i Gileadi. I Yeari, onaemo anano i Manase. Wita pinabawaino mbo'u tewinso Arigo anu i Basani, nomo pulu kota langkai, mewalaako watu ka pewowano melansoako mala;

¹⁴ I Ahinada anano i Ido, i Mahanai;

¹⁵ I Ahima'asi, i Napatali; onae mbo'u umalao i Basima anano i Salomo gagi kombiano.

¹⁶ Ka i'amba i Ba'ana anano i Husai, i Asieri ka i Aloti;

¹⁷ I Yosapa anano i Paruahi, i Sakari;

¹⁸ I Simei anano i Ela, i Benami;

¹⁹ ka i Geberi anano i Uri, i wita Gileadi, witano i Sihoni, mokoledo to Amori, ka witano i Ogo, mokoledo to Basani. Hinao mbo'u asa petewawado a luwuno wita.

²⁰ To Yehuda ka to Isaraeli mehadio ira ntu'u kana one i wiwi ntahi. Ondae mpongkaa ka mempo'inu memawongko.

Langkaino pabawano i Salomo 4:21-34

²¹ I Salomo pabawaio luwuno poparentaa mompu'u inso i Koro Eparata hawe a witado to Pelisiti ka hawe a ntida wita i Masiri. Ondae mpowawa peki'ue ka mpetenunu ndi Salomo asa ntinuwudo.

²² Kaanga anu kinereno i Salomo i larono asa oleo, onaemo: tolu pulu kor tarigu anu moiko ntu'u, ka nomo pulu kor tarigu biasa,

²³ hopulu sapi mewalo, ka ruapulu sapi pinakambi ka asa etu bimba, napi tewinso rusa, lagiwa, rusa dandi ka manu-manu pinekaria.

²⁴ Hangano onae pabawaio luwu wita i sumooano oleo koro Eparata, mompu'u inso i Tipisa hawe i Gasa, saru mbo'u a luwuno mokole i sumooano oleo koro Eparata atuu. Rodoa kongko a luwuno siuno witano.

²⁵ To Yehuda ka to Isaraeli sanaa domentuwu asa ntinuwuno i Salomo, singge mia a ntoto ngkeu anggorono ka keu arano, inso i Dani hawe i Bereseba.

²⁶ I Salomo mbo'u hinao pato pulu nsowu walaka ngarano tiano luwuno karetano ka hopulu ka orua nsowu sorodadu mpengara.

²⁷ Luwuno petewawa atuu mpopatinda kaanga tiado mokole Salomo ka luwuno mia anu mpetonda mpongkaa a medado mokole Salomo. Dosingge mewawao a wula tiado, ranta nahina anu makurano.

²⁸ Jelai ka seami tiado ngara biasa ka ngarano kareta, domewawao a mpo'ianga anu pinatinda, singge mia montonda tanggumiano.

²⁹ Ondae Ue Ala moweeakono i Salomo pande mompewowolo ka ponto'ori anu tedoa mantii saru pinewowolo anu malua kana one i wiwi ntahi.

³⁰ Pandeno mompewowolo i Salomo, ilaloi pandedo mpopewowolo luwuno mia i Sabaano Oleo ka lumaloio luwuno pandedo mpopewowolo to Masiri.

³¹ Onae pandeopo mosongka sekonopo luwuno mia, maupo sekono i Etani, to Eserahi ka i Hemani, i Kalikoli saru i Darida, luwuno anano i Maholi. Onaemo pu'uno neeno telele i olodo luwuno tongku petengi-tengino.

³² Onae moburi tolu nsowu powadi ka penanino asa nsowu ka olima hadiono.

³³ Onae mowadi mongkona keu, inso a ngkeu arasi i torukuno Libano hawe a ewo hisopi anu tuwu a rere watu. Onae mbo'u mowadi mongkona pinotuwu, manu-manu, kondehora anu mpelele ka luwuno bou.

³⁴ Onaemo ka domehawe hadio mia inso a luwuno tongku ira merongeo pandeno mepau i Salomo. Ondae tinenado luwuno mokole i tolino anu merongeomo mongkona ponto'orino mompewowolo.