1 Mokole 3 - Wunta Mempori

Ondae i Ue memoikoo po'emano i Salomo

¹ I Salomo gagi ponino i Pirao, mokole i wita Masiri. Ikombiao anano i Pirao ka iwawao i kota Daudi ranta kai umari wanguo langkanaeno ka raha-Do i Ue saru bente lumimbuo Yerusale.

² Butumokoa, tongku atuu da mpopesombaako pesombado a pongku-pongkuno wita pompesombaa, hangano raha po'iangano nee-Do i Ue napi winangu hawe i tempo atuu.

³ I Salomo mehohawa Ira i Ue saru tuwu montonda luwuno pompakosino i Daudi, amano. Butumokoa, onae da mompesombaako pesomba sinumbele ka dupa a pongku-pongkuno wita pompesombaa.

⁴ A aasa oleo ondae mokole lumako i Gibeo ira mompesombaako pesomba, hangano i tu'aimo pongku wita pompesombaa anu lalu langkai. Asa nsowu pesomba tinunu ipesombaakono i Salomo a wawo meda pontunua pesomba atuu.

⁵ I Gibeoni, Ondae i Ue mepopokita ndi Salomo a laro mo'ipino i tempono wongi. Mepau Iramo Ue Ala, ”Emaomo hapa anu inehemu Kuweeko.”

⁶ Ka i'amba motae i Salomo, ”Ipopokitaomo pompehohawa-Miu anu langkai ndi tetenaa-Miu i Daudi, amaku, hangano ondae tuwu metenunu i aro-Miu, mentee ka moleo aroado ndi Omiu. Omiumo mekariao pompehohawa-Miu anu langkai atuu ndi ondae ka ipoweeako ira asa ana anu mentoro a ngkadera poparentaa kana a oleo andio.

⁷ Kanandio-andio, Oo Ue, Ue Alaku, Ipotoroomo tetenaa-Miu andio gagi mokole umeu ira i Daudi, amaku, mauapo da tedoa aku mongura ka napi hadio ponto'oriku.

⁸ Tetenaa-Miu andio mo'ia i tonga-tongado bawaa-Miu anu Ibiniki iramo, bawaa anu langkai anu nahi pinokodoa ka nahi pinokotasere hadiodo.

⁹ Onaemo Iweeakonomo tetenaa-Miu andio aroa anu bukeako ponto'ori ka igagi puu mpobitara a bawaa-Miu, ka polio monsiao anu moiko ka anu mosa'o. Hangano isemake anu polio gagi puu mpobitara a bawaa-Miu anu langkai andio?”

¹⁰ Ondae i Ue memoikoo po'emano i Salomo atuu.

¹¹ Ka i'amba Ondae i Ue Ala mepau ndi onae, ”Hangano u'emaomo mongkona atuu ka nahi upo'ema tinuwu melai ka pompolia tiano koroimu omuemu saru nahi upo'ema penaado iwalimu, tendeano mo'ema ponto'ori tiano monteahako moleoa,

¹² onaemo pu'uno Aku weweuo menunu saru po'emamu. Menteeano Aku moweeakomu aroa pande mompewowolo ka bukeako ponto'ori, ranta se'eluno omue nahina te'asa mia kana omue, maupo pepaekompomu nahi ta hina te'asa mia kana omue.

¹³ Hapa mbo'u anu nahi u'emao Aku weeakomu, moiko pompolia maupo marambaa, ranta asa ntinuwumu nahi ta hina te'asa mia kana omue i olodo luwuno mokole.

¹⁴ Umarino atuu, tewala omue tuwu montonda sala-Ku ka mekariao luwuno pompakosi ka parenta-Ku, kana anu wineweuno i Daudi, amamu, manasa Aku moweeakomu tinuwu anu melai.”

¹⁵ Mekaangakoomo i Salomo, kahinaano ndio koa mo'ipi. Onae mekule i Yerusale ka ipentade i arono burua pedandi-Do i Ue. Ka i'amba mompesombaako pesomba tinunu ka pesomba tekaduduia, ka i'amba moweweu pelimbua tiado luwuno pegawaino.

Pandeno i Salomo momputusi kara-kara

¹⁶ Asa tempo orua ira beine belesu aiwa ndi ondae mokole, ka ipentade i arodo.

¹⁷ Asa mia i olodo beine atuu motae, ”Oo ueku, ongkue ka beine andio mo'ia kami me'asa raha. Tempono kupe'ana, onae kongko i raha.

¹⁸ Otolu oleo umariku me'ana, beine mbo'u andio me'ana. Butu koa omami, nahina mia susua me'asaa kami i laro raha. Butu orua kami i raha.

¹⁹ Anano beine andio mate i tempono wongi, hangano idunsio.

²⁰ A ntonga wongi onae mewangu ka i'alao anaku inso i horiku, kontongaano atamiu andio da moturi. Ipomboleo anaku a radano, sekono anano anu mate atuu, ipomboleo a radaku.

²¹ Mansaku mewangu mo'oru aku mo'uoo anaku, kukitao nana'ote atuu mateomo. Sine mansaku paresao ntu'u mo'oru atuu, komba onae nana'ote anu kupe'anaakono.”

²² Ipotae beine anu susua, ”Naahi! Anaku koa anu tuwu, anamu anu mate.” Sine beine anu amba-ambano mepau mbo'u, ”Naahi! Anamu koa anu mate, anaku anu tuwu.” Kanatuumo doteposangki i arodo mokole.

²³ Ka do'amba mepau mokole, ”Anu asa mia motae anaku koa anu tuwu, anamu koa anu mate, ka anu asa mia mbo'u motae, anaku koa anu tuwu, anamu koa anu mate.”

²⁴ Umarino atuu dopotae mokole, ”Alaakune ponai!” Onaemo ka domewawao ponai i arodo mokole.

²⁵ Dopotae mokole, ”Poleomo nana'ote anu tuwu atuu gagi orua. Weeakono asa mpole a mia anu aasa ka entongano mbo'u weeakono anu susua.”

²⁶ Beine anu me'ueo nana'ote anu tuwu atuu mepepehohawa ndi ondae mokole, hangano mondende aroano mehohawao anano atuu, ipotae, ”Ipehohawa aku ueku mokole, iweeakonomo nana'ote anu tuwu atuu, siimo ipinepate.” Sine beine anu asa motae, ”Naahi, siimo tiaku, siimo tiamu, ipoleomo!”

²⁷ Sine sumangki ira mokole, ”Weeakono nana'ote anu tuwu atuu. Osi'i ntu'u impepateo. Beinemo atuu ineno.”

²⁸ Rumongeo pomputusi anu doweeakono mokole, luwuno to Isaraeli gagi iramo pelangkai ira mokole, hangano domengkitao nine ponto'ori inso ndi Ondae Ue Ala kongko i laro aroano ka ipoweweu moleoa.