1 Mokole 22 - Wunta Mempori

I Ahabi mate a mpeteaa i Ramoti-Gilea

¹ Otolu nta'u tehineno nahina petea i olodo to Arami ka to Isaraeli.

² A ntolu nta'uno i Yosapa, mokole i Yehuda, lumako tepohaweakono mokoledo to Isaraeli.

³ Se'eluno umariomo mokoledo to Isaraeli pauako ira pegawaino, ipotae, ”Nde imento'orio koa ke, nine Ramoti-Gilea ba kanaano ontae mpe'ueo? Sine butu kita mpo'ia, nahi tompete'umalao inso a ngkaedo mokole i wita Arami.”

⁴ Ka i'amba motaeakono i Yosapa, ”Komiu koa behe ke aiwa mokowali aku meteaakono Ramoti-Gilea?” Sumangki i Yosapa ndi mokoledo to Isaraeli, ”Toperonga-ronga, ongkue ka omiu, paliliku ka palilimiu, ngaraku ka ngaramiu.”

⁵ Sine motae i Yosapa ndi mokoledo to Isaraeli, ”Se'eluno ipo'ema pontiso a mpau-Do i Ue.”

⁶ Ka i'amba mokoledo to Isaraeli pumpu ira luwuno nabi, bara'ura pato etu mia. Ka i'amba mesikeno ndi ondae, ”Moiko koa ke kulako metea umewaio Ramoti-Gilea ke siimo?” Mesangki ira, ”Imelakomo, Ira meweengakono i Ue a ngkaemiu mokole.”

⁷ Sine i Yosapa mesikeno, ”Nde nami hina mbo'u ke i ndi'ai te asa mia nabi-Do i Ue, ka tompokompo'ema pontiso molalo ndi onae?”

⁸ Sumangki mokoledo to Isaraeli ndi Yosapa, ”Da hinao mbo'u asa mia anu molalo onae topokompo'ema pontiso-Do i Ue. Sine ku'o'aliaakono hangano nahi hori mompau anu moiko mongkona ongkue, tendeano butu masolaa. Mia atuu, onaemo i Mika, anano i Yimila.” Motae i Yosapa, ”Siimo ipepau kanatuu mokole.”

⁹ Ka i'amba mokoledo to Isaraeli moboio asa mia anu langkai potorono, ipotae, ”Pontuturako lako poboio i Mika, anano i Yimila.”

¹⁰ Mokole to Isaraeli ka i Yosapa, mokole to Yehuda, singge mia mentoro a ngkadera poparentaano saru mesangka mokole, i asa mpo'ianga ponsesaa i arono pewowa langkai Samaria. Luwudo nabi atuu pompau i arodo.

¹¹ Ka i'amba i Sedekia, anano i Kena'ana anu mompatindaomo tandu-tandu labu, motae, ”Kanandiomo pau-Do i Ue: Saru tandu andio kotumanduo Arami ranta kau mepingko ira.”

¹² Luwuno mbo'u nabi atuu mpopau kanatuu, dompotae, ”Lakomo i Ramoti-Gilea ka komiu monangi. Ondae i Ue Ira meweengakono a ngkaemiu mokole.”

¹³ Mia tinena lumako moboio i Mika atuu, motaeakono, ”Kai to'oriomo, luwudo nabi atuu ntepo'asa iramo mempopau anu moiko ndi ondae mokole. Moikoopo pinaumiu mbo'u kana pinauno asa mia inso ndi ondae ka ipompaumo anu moiko.”

¹⁴ Sine sumangki i Mika, ”A nee-Do i Ue anu tuwu, menteeano maupo hapa anu pinau-Do i Ue ndi ongkue, onae anu aku pauako ira.”

¹⁵ Sa haweno ndi ondae mokole, mesikenoomo mokole ndi onae, ”Mika, moiko koa ke kami melako mpetea umewaio Ramoti-Gilea, ke siimo?” Sangkino ndi onae, ”Lakomo ka komiu monangi. Ondae i Ue meweengakono a ngkaemiu mokole.”

¹⁶ Sine motae ira mokole ndi onae, ”Hawe tepempia kutenako mesumpa, kasi upompau maupo hapa ndi ongkue sangkadio anu mentee a nee-Do i Ue?”

¹⁷ Ka i'amba sumangki i Mika, ”Kukita iramo to Isaraeli ntesiarawo a luwuno torukuno kana bawaano bimba anu nahina puu pompakambi. Mepau Iramo i Ue: Ondae andio hina uedo, laluopo singge mia mekule i rahano ka itekadudui.”

¹⁸ Ka i'amba i mokole to Isaraeli motaeakono i Yosapa, ”Kombake umariomo kupauakomiu: onae nahi hori mompau anu moiko mongkona ongkue, sangkadio masolaa?”

¹⁹ Motae i Mika, ”Onaemo pu'uno, irongeomo pau-Do i Ue. Kukita Iramo i Ue mentoro a wawo kadera poparentaa-Do ka luwuno sorodadu suruga mpentade umpeda ndi Ondae, i koana ka i manggali-Do.

²⁰ Ondae i Ue mepau: Isema ke ta popandeio i Ahabi lumako metea kai mate i wita Ramoti-Gilea? Asa mia motae kanandio, anu susua motae kanatuu.

²¹ Ka i'amba meluarakoomo asa penaa ka mentade i aro-Do i Ue, ipotae, ’Ongkuemo anu ta popandeio.’ Mesikeno Ira i Ue ndi onae, ’Kana'umpe ke pompopandeimu?’

²² Sangkino, ’Aku meluarako gagi penaa megaupi a gagado luwuno nabino.’ Mepau Ira i Ue, Po'ineeono omue popandeio ka manasa biisa. Peluarakomo ka weweumo kanatuu.

²³ Gagi, menteeano Donaaomo i Ue penaa megaupi a laro ngangado luwuno nabimu andio. Dopakosiomo i Ue masolaa ndi omue.”

²⁴ Umarino atuu i Sedekia anano i Kena'ana aiwa umpedaakono ka itampeleo kombisino i Mika. Ipotae, ”Kana'umpe ke penaa-Do i Ue melimba inso ndi ongkue ka ipepau ndi omue?”

²⁵ Sumangki i Mika, ”Menteeano ka u'amba kumitao ia oleo upewinso a bolongko i arono komewuni.”

²⁶ Motaeomo mokoledo to Isaraeli, ”Imerakoo i Mika! Imempokuleo ndi Amoni, anu pabawa i kota, ka ndi Yoasi, anado mokole.

²⁷ Ka i'amba mempauo kanandio: kanandiopo petenado mokole: Winsoo mia andio a laro torungku, ka pakaanoko roti, ka mo'inu uwoi ntededei koa ranta kupekule tekadudui.”

²⁸ Sine sumangki i Mika, ”Tewala mentee omue mekule da tuwu, manasaomo Ondae i Ue nahi Ira mepau molalo ongkue.” Ka i'amba motae mbo'u, ”Imerongeo, hei luwuno bawaa!”

²⁹ Umarino atuu to Isaraeli melempa saru i Yosapa, mokoledo to Yehuda, i Ramoti-Gilea.

³⁰ Mokole to Isaraeli motaeakono i Yosapa, ”Aku mo'onde-onde kana mia susua ka mesangka mewinso a laro mpeteaa, sine omiu impokonaomo sangka mokolemiu.” Ka i'amba mokoledo to Isaraeli mo'onde-onde kana mia susua ka ipewinso a laro mpeteaa.

³¹ Kontongaano atuu mokoledo to Arami parenta iramo luwuno tadulako sorodadu mpekareta anu porokono tolu pulu ka orua mia, kanandio, ”Siimo impetea umewaio maupo isema langkai ke kodei, sangkadio mokoledo to Isaraeli.”

³² Mansano luwuno tadulako sorodadu mpekareta atuu mengkitao i Yosapa, dompotae, ”Manasa onaemo mokoledo to Isaraeli!” Onaemo ka dopelimba mensapoio, sine i Yosapa mebooli.

³³ Mansano luwuno tadulako sorodadu mpekareta atuu mengkitao nine onae komba mokoledo to Isaraeli, mpepokule ira mebintao.

³⁴ Sine aasa mia padiio wo'eno panano ka mepana mondeeno, ranta ibelaio mokoledo to Isaraeli i olono pesombuano lemba labuno. Ondae mokole motaeakono anu mowawa karetano, ”Pepokulemo wawa aku meluarako inso a mpeteaa, hangano mobela akumo.”

³⁵ Peteaa tepahe mongkokongiri a oleo atuu, kontongaano ondae mokole kongkono mentade inini a laro ngkareta ntepo'aro saru to Arami. Ka i'amba maate tempono ngkiniwia, ka rea inso a mobelano waa a horono kareta.

³⁶ Mansano tamo sumoo oleo terongeomo peboolido inso i olono baresido sorodadu atuu, ”Singge mia lumako i kotano, singge mia lumako i witano!”

³⁷ Hangano mateomo mokole, ondae mbo'u mpekule i Samaria ka mengkaburuo mokole i Samaria.

³⁸ Mansano wino'ohi kareta atuu i wiwino rano kodei i Samaria, reado mokole domensile'io dahu, kontongaado beine belesu mpedolo a mpo'ianga atuu, menunu kana pau-Do i Ue anu umariomo Dopauo.

³⁹ Anu susuano inso a nteweweuno i Ahabi ka luwuno anu wineweuno saru langkanae tindu gaja ka luwuno kota winanguno, kombake luwuno atuu teburi a wunta tutuluno mokole i Isaraeli.

⁴⁰ Kanandiomo i Ahabi mate. Ka i'amba i Ahasia, anano, umeuo gagi mokole.

I Yosapa, mokole i Yehuda

⁴¹ I Yosapa, anano i Asa, gagi Mokoledo to Yehuda a nta'u ko'opaa poparentano i Ahabi mokoledo to Isaraeli.

⁴² I Yosapa tolu pulu ka olima nta'u tinuwuno tempono i gagi mokole, ka rua pulu ka olima nta'u tehineno i poparenta i Yerusale. Neeno ineno, i Asuba, anano i Silihi.

⁴³ Onae tumondao sala tinuwuno i Asa, amano, ka nahi pansia inso i tu'ai; onae moweweu hapa anu mentee i aro-Do i Ue.

⁴⁴ Butu koa luwuno po'ianga pesombaa nahi liahakono. Palili da pompesombaako ka mpotunu pesomba a luwuno pongku wita atuu.

⁴⁵ I Yosapa tuwu manangai saru mokoledo to Isaraeli.

⁴⁶ Anu susuano inso a nteweweuno i Yosapa, mosiano anu pinopokitano, ka kana'umpe ipetea, kombake luwuno atuu teburi a wunta tutuludo mokole i Yehuda.

⁴⁷ Luwuno toreano pebelesua a raha mpelahumoaa anu da hinao tempono i Asa, amano, morina iroahio inso a wita atuu.

⁴⁸ Nahina mokole i Edomi; anu gagi mokole onaemo aasa kapala daera.

⁴⁹ I Yosapa moweweu hadio kapala Tarisi pakeano lumako i Opiri mo'ala wulaa. Sine, luwuno kapala atuu nahi gagi lumako hangano tepeha i Esioni-Geberi.

⁵⁰ Tempo atuu i Ahasia anano i Ahabi, motaeakono i Yosapa, ”Moikoomo domelako ataku meronga luwuno atamiu saru luwuno kapala atuu.” Sine, i Yosapa nahi pepatinda.

⁵¹ Ka i'amba i Yosapa mate. Onae kinaburu i horido uempu'uno i kora Daudi, ama mpu'uno. Ka i'amba i Yorama, anano, umeuo gagi mokole.

I Ahasia, mokole i Isaraeli

⁵² I Ahasia anano i Yahabi gagi mokoledo to Isaraeli i Samaria a nta'u kohopulu ka opitu poparentaano i Yosapa mokoledo to Yehuda. Onae moparenta a nto Isaraeli orua nta'u tehineno.

⁵³ Onae moweweu anu mosa'o a mpongkita-Do i Ue ka tumondao sala ntumuwuno amano ka ineno saru i Yerobea anano i Nebati, anu weweu iramo to Isaraeli mpoweweu hala.

⁵⁴ Onae mesomba a Ba'ala ka menggolontu mesombaio, ranta ka ipokotesingkao tekuda-Do i Ue, Ue Alado to Isaraeli, mengkena kana wineweuno amano.