1 Mokole 20 - Wunta Mempori

Samaria toola inso a pongkaduno i Benihada

¹ I Benihada, mokoledo to Arami pumpu ira luwuno sorodaduno, tolu pulu ka orua mokole perongano saru ngara ka kareta, ka i'amba lumako kumaduo Samaria ka meteaakono.

² Onae montena mia lumako i kota atuu ndi Ahabi, mokoledo to Isaraeli,

³ saru pe'oliwi, ”Kanandiomo pe'oliwino i Benihada: Wulaa ka salakamu ongkue me'ueo, saru mbo'u luwuno beinemu ka luwuno anamu anu lalu moiko, ongkue me'ueo.”

⁴ Sumangki mokoledo to Isaraeli, ”Kanamo pinaumiu ueku mokole, ongkue saru luwuno anu hina ndi ongkue, omiu me'ueo.”

⁵ Mia mentinena atuu wali mpekule ka dompotae, ”Kanandiomo pe'oliwino i Benihada: Lano montena akumo mia pauo ndi omue: Wulaa ka salakamu, luwuno beinemu ka luwuno anamu asalakono upeweengakono ndi ongkue,

⁶ sine tisomo bara'ura tempo kanandio, aku tumena ira pegawaiku aiwa ndi omue ka ira memparesao ihino rahamu ka rahado luwuno pegawaimu. Luwuno anu mentudu a pongkitamu ira me'alao ka mewawao.”

⁷ Ka i'amba mokoledo to Isaraeli moboi ira luwu mia memota'u i wita atuu ka ipotaeako ira, ”Impenootio, mia andio mosa'o pinewowolono ta sumolangi kita, hangano montenaomo mia aiwa ndi ongkue umema ira luwuno beineku, luwuno anaku, wulaa ka salaka ka ku'induakono.”

⁸ Dompotae mia memota'u ka luwudo palili, ”Si perorongeakono, si petondaio.”

⁹ Onaemo ka ipotaeako ira mia mentinenano i Benihada, ”Pauako ira ueku mokole: luwuno anu ipe'oliwiko amba-ambano a atamiu andio, aku weweuo, sine po'ema anu pokotompano andio nahi aku moko'ihiio.” Melako iramo mia mentinena atuu mempohaweo sangki atuu ndi i Benihada.

¹⁰ I Benihada montena mia lumako ndi Ahabi saru pe'oliwi, ”Po'ineeomo luwuno pinesombaiku mehuku aku mobea maupo torea mbo'u, tewala hadiono awuno hanga kota Samaria da dompokorakuo palili anu mentonda aku.”

¹¹ Sine sumangki mokoledo to Isaraeli, ipotae, ”Pauomo! Mia anu da'iaopo ipotampi ponai, nahi moiko ba ipompelangka-langkai kana mia anu umariomo metea.”

¹² Rumongeo pauno atuu, i Benihada anu kontongaano mo'inu a laika saru luwuno mokole, ipotaeako ira pegawaino, ”Patindao sorodadumu.” Domempatindao sorodadu umewaio kota atuu.

¹³ Nahi kinokoo-koo, asa nabi umpedaakono i Ahabi, mokoledo to Isaraeli, ipotae, ”Kanandiomo pau-Do i Ue: Ukitaomo ke howuno anu langkai atuu? Menteeano Aku meweengako ira oleo andio a ngkaemiu, kau to'oriokoa nine Ongkuemo Ue.”

¹⁴ Ka i'amba mesikeno i Ahabi, ”Hangano isema?” Sumangki nabi atuu, ”Kanandio pau-Do i Ue: Luwuno atado kapala daera.” Mesikeno mbo'u, ”Isema ta pu'uo peteaa?” Sumangki nabi, ”Omue!”

¹⁵ Ka i'amba dumoa ira luwuno atado kapala daera atuu, porokono, rua etu tolu pulu ka orua mia. Umarino ondae, idoa ira luwuno palili, luwuno to Isaraeli, porokono, pitu nsowu mia.

¹⁶ Ntonga oleo, melako iramo mposapoi, kontonggano mo'inu i Benihada ranta kai molangu a laikano saru tolu pulu ka orua mokole anu mokowalio.

¹⁷ Luwuno atado kapala daera atuu ntese'elu melako mponsapoi. I Benihada montena mia lumako paresao, ka do'amba mpekule mempauakono kanandio, ”Hinao to Samaria aiwa mposapoi.”

¹⁸ Ka i'amba motae, ”Ke ira me'aiwa tinoo moiko ke saru tinoo mpetea, imerako iramo kongko tuwu!”

¹⁹ Kontongaano atuu luwuno atado kapala daera mpeluarako inso a laro kota saru sorodadu anu tumonda ira.

²⁰ Ka i'amba singge mia mompepate iwalino, ranta luwuno to Arami atuu mpolai ka domelulu ira to Isaraeli. Sine i Benihada, mokoledo to Arami mokompolai mesawi a ngara saru ba opia sorodadu mpengara.

²¹ Mokoledo to Isaraeli mbo'u lumako sumapoio ngara ka kareta atuu, ka i'amba numangi ira to Arami mongkokongiri.

²² Ka i'amba nabi atuu rumangkuhio mokoledo to Isaraeli ka ipotaeakono, ”Lakomo, pokorosoo koroimu, to'oriomo ka pewowoloo temoiko hapa anu koweweuo, hangano a mpe'euano ta'u, mokoledo to Arami ta aiwa sumapoiko.”

Peteaa i kota Apeki

²³ Luwuno pegawaino mokoledo to Arami mpotaeakono, ”Luwuno pinesombaido onaemo pinesombai i torukuno. Onaemo pu'uno memoroso irapo sekono ontae. Sine, tewala mpetea kita i lembono, manasa memoroso kitapo sekono ondae.

²⁴ Weweuomo kanandio: Ipokompenaa-naa ira luwu mokole atuu singge mia inso a potorono, ka ipotoro ira kapala daera umeu ira.

²⁵ Ka i'amba patindaomo sorodadu kana hadiono sorodadumiu anu memate, kanatuu koa mbo'u ngara ka anu kareta, kana hadiono i ndi'upua. Aiwamo ka to melako mpetea umewai ira i lembono, manasa ontae laluaomo moroso sekono ondae.” Iperorongeakono mokole pohawedo ka iweweuo kanatuu.

²⁶ A nta'u tudano i Benihada paresao sorodadudo to Arami ka i'amba lumako i kota Apeki ta meteaako ira to Isaraeli.

²⁷ Umarino pinaresa sorodadudo to Isaraeli ka domempinontisoako, mpelungka iramo umaropi ira to Arami. To Isaraeli mpekema i arodo kana orua bawaa kodei bembe, sine to Arami buuke asa wawo wita atuu.

²⁸ Tetenaa-Do Ue Ala atuu umpedaakono mokoledo to Isaraeli ka ipotae, ”Kanandio pau-Do i Ue: Hangano to Arami atuu mpotae iramo: Ondae i Ue, onaemo Ue Ala i torukuno komba Ue Ala i lembono, onaemo pu'uno luwuno sorodadu anu hadio atuu, Aku meweengako ira a ngkaemu, kai mento'orio nine Ongkuemo Ue.”

²⁹ Opitu oleo tehineno dompekema ntepopo'aro ka a oleo anu ko'opitu pinu'uomo petea. I larono asa oleo to Isaraeli mpopepate asa etu nsowu sorodadudo to Arami anu mpelempa ngkaru.

³⁰ Anu mehano mpolai a laro ngkota Apeki, sine rereno tehoa idunsi ira rua pulu ka opitu nsowu mia anu da mo'ia atuu. I Benihada mbo'u molai, mewiso a ngkota ka ipewuni a asa bolongko i larono.

³¹ Ka i'amba luwuno pegawaino mpotaeakono, ”To'oriomo, kimerongeomo nine luwuno mokoledo to Isaraeli atuu onaemo luwuno mokole anu popehohawa. Aiwamo topompokona sawu mpo'inombo a ntongato ka koloro a uluto kato mpeluarako nte'aro a mokoledo to Isaraeli; bara'ura nahi ira mepatekomiu.”

³² Ka do'amba mpebooako sawu po'inombo a ntongado ka koloro a uludo. Ka do'amba melako nte'aro a mokoledo to Isaraeli, dompotae, ”Kanandiomo ipotae atamiu i Benihada: Po'inee akumo ka kutuwu.” Sumangki mokole, ”Nde da tuwuo ke? Onae atuu pepaekompoku.”

³³ Pomperorohido mia atuudo mongkona atuu gagi petondoni moiko ka ronga ira me'inio pauno ka dompotae, ”I Benihada atuu pepaekompomiu.” Motae mbo'u i Ahabi, ”Imelakomo me'alao.” I Benihada meluarako tepohaweakono, ka i'amba inoluako me'ula a ngkaretano.

³⁴ Motae i Benihada ndi onae, ”Luwuno kota anu inalado amaku inso ndi amamiu, aku mokuleo. Omiu mbo'u moiko i powangu olu i Damasi, kana wineweudo amaku i Samaria.” Motae i Ahabi, ”Hangano pedandimu atuu, aku mo'ineeko lumako.” Ka i'amba i Ahabi moweweu pedandia saru onae ka ipo'ineeo lumako.

Pohuku ndi Ahabi pinopoto'ori

³⁵ Asa mia inso a bawaano nabi motaeakono walino a petena-Do i Ue, ”Tunduhi akumo!” Sine, mia atuu nahi behe tumunduhio.

³⁶ Ka i'amba motaeakono walino atuu, ”Hangano omue nahi uperorongeakono pau-Do i Ue, to'oriomo, nahi ta tehine umarimu binta aku, asa singa ta merangkamiko.” Mansano lumako mia atuu bintao, asa singa humaweo mia atuu kai perangkamio.

³⁷ Ka i'amba nabi atuu tepotowo saru mia susua, ka i'amba motae, ”Tunduhi akumo.” Mia atuu tumunduhio meroku ranta kai mobela.

³⁸ Ka i'amba nabi atuu lumako ka mentade sumikorio mokole a nsala. Onae mo'onde-onde kana mia susua mompake pontutuwi mata.

³⁹ Mansado telalo mokole, onae mebooli mekalaki ndi ondae mokole, ipotae, ”Tempono atamiu andio lamako a mpeteaa, hinao mia mansa bintao baresi ka iwawao asa mia ndi ongkue, ipotae: Dagaio mia andio, tewala mansa tetadi, penaamu gagi euno penaano, ke asalakono komo'owawi asa talenta salaka.

⁴⁰ Tempono atamiu andio tekonai marepa, mia atuu moliu.” Ka i'amba mokoledo to Isaraeli motaeakono, ”Kanatuumo mbo'u hukumu, omuemo anu pakosio.”

⁴¹ Ka i'amba mompari-pari umungkahio sawu tutuwino matano, ranta kai to'orio mokoledo to Isaraeli nine onae asa mia inso a bawaado nabi.

⁴² Motae nabi atuu ndi onae, ”Kanandio pau-Do i Ue: Hangano upo'ineeo toola mia anu pinakosi ta pinepate hangano ongkue, penaamumo euno penaano ka palilimu euno palilino.”

⁴³ Mekuleomo mokoledo to Isaraeli a langkanaeno saru aroa mompemosa'o ka tekuda, ka i'amba hawe i Samaria.