1 Mokole 2 - Wunta Mempori

Pe'oliwino i Daudi anu pokotompa, se'eluno napi mate

¹ Mansano umpedaomo tempono tamo mate, i Daudi me'oliwi ndi Salomo, anano,

² ”Nami ta tehine mbo'u akumo mate, gagi aroano ka pelelumo kana tama.

³ Petenunumo weweuo songka-Do i Ue, Ue Alamu, ka tuwu tumodao sala-Do, ka pekariao luwuno pinakosi, parenta, ka atora-Do, kana anu teburi a songkano i Musa. Ba kanandio, kome'ura a laro luwuakoano anu wineweumu ba isuamokoa ulako,

⁴ ka Ondae i Ue Ira umihiio dandi anu pinau-Do mongkona ongkue: Tewala luwuno anamu mekongko ira mentuwu mpetenunu i aro-Ku, tompaano aroado ka tompaano tinuwudo manasa inulemu nahi ta te'otu inso a ngkadera poparentaa i Isaraeli.

⁵ Ka omue mbo'u uto'orio hapa anu wineweuno i Yoabi, anano i Seruya ndi ongkue, hapa anu wineweuno ndi Abinere anano i Nere ka i Amasa anano i Yetere, orua ira tadulako sorodadu to Isaraeli. Ipepate ira ka mo'uwu rea i tempono manangai kana tempono peteaa, ranta sulepeno ka sandalano rea luwu.

⁶ Gagi weweumo te moiko ka sipo'ineeo mia me'uwaomo atuu metii moiko a mpo'iangado mia mate.

⁷ Sine, asalakono ka upopokitao pompehohawa a luwuno anano i Barisilai, to Gileadi atuu. Po'ineeomo ondae tewinso bawaa anu mpongkaa a medamu, hangano kanatuumo domentotowo aku i tempono kupolai inso ndi Abisalo, pepaekompomu.

⁸ Umarino atuu da kongko ndi omue i Simei anano i Gera to Benami inso i Bahurimi. Onaemo anu mepaukiakune saru pontotonaa anu mompokomahaki i tempono kulako i Mahanai. Sine lembuino onae aiwa tumotowo aku i koro Yarade ka mesumpa akumo ndi onae a nee-Do i Ue: Nahi aku mepateakomu ponai!

⁹ Kanandio-andio si potolao inso a mpohuku, hangano omue anu pande mompewowolo ka tumo'orio hapa anu asalakono koweweuo ndi onae; omue asalakono weweuo mia anu me'uwa atuu ka ipetii medoloako rea a mpo'iangado mia mate.”

¹⁰ Ka i'amba i Daudi mate, ka onae kinaburu i kota Daudi.

¹¹ I Daudi parenta ira to Isaraeli patopulu nta'u tehineno. I Heberoni onae moparenta opitu nta'u ka i Yerusale onae moparenta tolu pulu ka otolu nta'u.

¹² Kanatuumo i Salomo mentoro a ngkadera poparentaano i Daudi, amano ka poparentaano tedoa moroso.

I Salomo mokomorosoo kadera poparentaano

¹³ Ia asa oleo i Adonia, anano i Hagi, me'aro ndi Bateseba, ineno i Salomo. Ipotae beine atuu, ”Nde aiwamu atuuke saru tinoo mesintuwu?” Sumangki i Adonia, ”Humbee, aiwa mesintuwu.”

¹⁴ Ka ipotae mbo'u, ”Hinao anu aku paua komiu.” Sumangki beine atuu, ”Pauomo!”

¹⁵ Ipotae mbo'u, ”Omiumo isa'a tumo'orio, nine ongkuemo anu tekona mentorokio pentoroano mokole ka nine luwudo to Isaraeli mpomperorohi kai ongkue gagi mokole. Sine pentoroano mokole melimbaomo ndi uaiku, hangano inso ndi Ondae i Ue ihaweo.

¹⁶ Kanandio-andio, asa koa po'emaku ndi omiu. Po'ineeomo itarimao po'emaku.” Sumangki beine atuu ndi onae, ”Pauomo.”

¹⁷ Ka i'amba pauo, ”Ku'emao ka ipauomo ndi ondae mokole Salomo, hangano ira koa tumarimao po'emaku, ka i Abisagi ana beine Sunemi atuu, iwee aku gagi beineku.”

¹⁸ Sumangki i Bateseba, ”Moiko, aku koa pauako ira mokole mongkona po'emamu atuu.”

¹⁹ Ka i'amba i Bateseba me'aro ndi ondae mokole Salomo tepopauako mongkona po'emano i Adonia atuu. Mentade iramo mokole lumako tepohaweakono ka ipesomba ndi onae. Ka i'amba mentoro a ngkadera poparentaano ka ipontena mia mo'ala kadera pentoroado inedo mokole, ka i'amba beine atuu mentoro i koanado.

²⁰ Mepauomo beine atuu, ”Butu asa po'emaku anu tedei aku mohaweo ndi omue, asalakono induo po'emaku.” Sumangki ira mokole ndi onae, ”Ipo'emamo, Oo ine, hangano asalakono aku uminduo po'emamiu.”

²¹ Ipotae beine atuu, ”Po'ineeomo i Abisagi, ana beine inso i Sunemi atuu iwineeako pepaekompomu i Adonia gagi kombiano.”

²² Sine sumangki i mokole Salomo ndi ondae inedo, ”Tembio ka ibutu i Abisagi, beine inso i Sunemi atuu i'emaakono i Adonia? Ipo'emaakono mbo'u pentoroa mokole! Nde komba onaeke pepaekompoku anu te'aka, ka ndi onae kongko sando mpesomba i Abiata saru i Yoabi, anano i Seruya.”

²³ Mesumpaomo i mokole Salomo a nee-Do i Ue, ”Po'ineeomo Ondae Ue Ala humukukomiu mobea, maupo laalo mbo'u, tewala i Adonia nahi owahiakono penaano po'ema andio!

²⁴ Onaemo pu'uno, a nee-Do i Ue anu tuwu, anu mokorosoo ka montoro aku a ngkadera poparentaano i Daudi, amaku, ka anu wanguakune somboriku kana anu dinandi-Do: a oleo koa mbo'u andio asalakono i Adonia pinepate.”

²⁵ I mokole Salomo meweengakono mongkona atuu a ngkaeno i Benaya, anano i Yoyada. Ka i'amba i Adonia mate ipepateo.

²⁶ Ndi ondae sando mpesomba Abiata, mepau ira mokole, ”Lakomo i Anatoti, a wita pine'uemu, hangano omue tekona hinuku mate. Sine, a oleo andio nahi aku mepateko, hangano omue montandekomo burua pedandia-Do Ue Ala i arodo amaku i Daudi, ka hangano sarumo omue marasai a laro luwuno marasaia anu pinembasaido amaku.”

²⁷ Umarino atuu i mokole Salomo mokompenaa-naao i Abiata inso a mpo'anggaano gagi sando mpesomba-Do i Ue. Kanandiomo i'ihiio i Salomo pau-Do i Ue anu Dopauomo i Silo mongkona somborino i Eli.

²⁸ Lele atuu hawe ndi Yoabi. I Yoabi lano me'alaakoomo ndi Adonia, maupo nahi pe'alaako ndi Abisalo. Molaiomo i Yoabi a ngkema-Do i Ue ka ipe'inio a tandu-tanduno meda pontunua pesomba.

²⁹ Ka i'amba pinauako iramo mokole Salomo nine i Yoabi molaiomo a ngkema-Do i Ue, ka mo'ia i horino meda pontunua pesomba. Ka i'amba i Salomo tumenao i Benaya anano i Yoyada, ipotae, ”Lakomo pepateo.”

³⁰ I Benaya mewinso a laro ngkema-Do i Ue ka ipotaeakono, ”Kanandiomo parentado mokole: Peluarakomo.” Sumangki, ”Naahi, hangano ineheku mate i ndi'ai.” Ipohaweo i Benaya sangkino atuu ndi ondae mokole, ipotae, ”Kanandiomo ipotae i Yoabi ka kanandiomo sangkino ndi ongkue.”

³¹ Dopotaeakono mokole ndi onae, ”Weweuomo kana anu nineeno. Pepateomo ka kaburuo. Bakanatuu uliahakonomo inso ndi ongkue ka luwuno pe'etuku rea anu inuwuno i Yoabi maupo nahina pu'uno.

³² Ondae i Ue Ira mopotembiakono reano ndi onae, hangano ipepate iramo orua mia anu laluopo mentee ka moiko sekono onae. Saru ponai ka nahi doto'orio amaku i Daudi, ipepateo i Abinere anano i Nere, tadulako sorodadu Isaraeli, ka i Amasa anano i Yeteri, tadulako sorodadu Yehuda.

³³ Reado ta pinopotembiako ndi Yoabi ka inuleno ranta nahina tampulaano, Sine i Daudi ka inuleno saru somborino ka kadera poparentaano ta mohawe manangaia inso ndi Ondae i Ue ranta nahina tampulaano.”

³⁴ Melungkaomo i Benaya anano i Yoyada. I'impahio i Yoabi ka ipepateo. Ka i'amba kumaburuo i Yoabi i rahano onaeno i pada one.

³⁵ Ondae mokole motoroo i Benaya anano i Yoyada umeuo i Yoabi gagi tadulako sorodadu. Dopotoroo mbo'u sando mpesomba Sadoki umeuo i Abiata.

³⁶ Ka do'amba mokole metena moboio i Simei ka dopotaeakono, ”Wanguomo tiamu aasa raha i Yerusale ka po'iamo i ra'ai. Si peluarako inso i ra'ai maupo isua.

³⁷ Hangano i tempono upeluarako ka sumakio Korono Mo'are Kidironi, to'oriomo nine manasa kopinepate ka reamu ta pinopotembiako a ngkoroimu omuemu.”

³⁸ Ka i'amba motae i Simei ndi ondae mokole, ”Moikomo, kana pinaumiu ueku mokole, kanatuumo ta weweuo atamiu andio.” Onaemo ka ipo'ia i Simei i Yerusale ba opia tempo tehineno.

³⁹ Otolu nta'u lembuino, orua ira atano i Simei molai ndi Akisi anano i Ma'aka, mokole i Gati. Ka i'amba pinauako i Simei, ”To'oriomo, orua ira atamu kongko ira i Gati.”

⁴⁰ Mompakaleomo i Simei lumapio kalideno, ka ilako i Gati ndi Akisi, ta umungke ira atano orua ira atuu. Ka i'amba i Simei mekule wawa ira inso i Gati.

⁴¹ Pinauako i Salomo nine i Simei inso i Yerusale lumako i Gati ka kanandio-andio mekuleomo.

⁴² Ka do'amba mokole montena mia moboio i Simei ka dopotaeakono, ”Nde komba kutenakomoke mesumpa a nee-Do i Ue ka mopoto'oriakomu, kanandio: To'oriomo nine i tempono upeluarako ka ulako maupo isua, manasa omue pinepate! Omue isa'a umari sumangki: Moiko aku koa tumondao.

⁴³ Tembio nahi utondao sumpa ndi Ondae i Ue atuu ka parenta anu kuweeakomu?”

⁴⁴ Mepau ira mbo'u mokole ndi Simei, ”Omuemu isa'a tumo'orio i laro aroamu luwuno wineweumu anu mosa'o ndi Daudi, amaku. Gagi, Dopopotembiakomumo i Ue wineweumu anu mosa'o a ngkoroimu omuemu.

⁴⁵ Posuleno, po'ineeomo ka irinonso i mokole Salomo ka moronsoomo kadera poparentaano i Daudi i aro-Do i Ue ranta nahina tampulaano.”

⁴⁶ Ondae mokole mompowee parenta ndi Benaya anano i Yoyada. Lumakoomo i Benaya ka i'amba mepateo i Simei. Kanatuumo poparentaa atuu moroso a ngkaeno i Salomo.