1 Mokole 19 - Wunta Mempori

I Elia lumako i torukuno Hore

¹ I Ahabi pauakono i Isebeli luwuno anu wineweuno i Elia ka poweweuno mbo'u i Elia mepateako ira ponai luwu nabi.

² I Isebeli tumenao asa mia lumako ndi Elia saru pe'oliwi, ”Po'ineeomo luwuno pinesombai humuku aku mobea maupo torea mbo'u, tewala tisomo tempo kanandio nahi kupepateko mengkena kana asa mia i olodo atuu.”

³ Onae mbo'u doitoomo, ka i'amba lumako mewuni. Mansano hawe i Bereseba i witado to Yehuda, ibintao atano i ra'ai.

⁴ Sine onae lumako i pada one asa oleo pelempaa olaino. Hawe ka ipentoro i totono keu arari. Onae mo'ema kai mate, ipotae, ”Sompoomo! Kanandio-andio, oo Ue, I'alaomo penaaku, hangano ongkue andio komba laluaopo moiko sekono uempu'uku.”

⁵ Ka i'amba mepombole ka ipoturi i totono keu arari atuu. Mansa hawe asa mala'eka dumanggio ka ipotaeakono, ”Pewangumo, pongkaamo.”

⁶ Mansano mengkita, ikitaomo umpeda i uluno hinao roti tinunu ka takea me'ihi uwoi. Mongkaaomo ka ipo'inu, ka i'amba mepombole mbo'u.

⁷ Sine mala'eka-Do i Ue aiwa anu kompenduano ka idanggio, ipotae, ”Pewangumo, pongkaamo! Hangano pelempaa atuu te'ingka kotedoa me'olaio.”

⁸ Mewanguomo kai pongkaa ka mo'inu. Hangano kaanga atuu onaemo kai moroso melempa pato pulu oleo ka pato pulu wongi hawe i torukuno Hore, torukuno-Do Ue Ala.

Ondae Ue Ala mopokitao koroi-Do i torukuno Hore

⁹ I ra'ai ipewinso a laro aasa kunepo ka iperato i tu'ai. Ka i'amba haweomo pau-Do i Ue, ndi onae, kanandio, ”Hapa inanggamu i ndi'ai Elia?”

¹⁰ Sangkino, ”Tedoa aku me'o'osu mo'angga ndi Omiu Ue, Ue Alano luwuakoano, hangano to Isaraeli mebintao pedandia-Miu, mpobangkuo luwuno meda pontunua pesomba ndi Omiu ka mpepateako ira ponai luwuno nabi-Miu. Butu ongkue asa-asaku anu da tuwu ka ondae mpo'ungke sala ira mpepate aku.”

¹¹ Ka i'amba pau-Do, ”Peluarakomo ka pentade i wawono torukuno atuu i aro-Do i Ue!” Ka i'amba telalo Iramo i Ue. Angi langkai ka mokora bansio luwuno torukuno ka pehao luwuno pongku watu mese'elungi Ira i Ue. Sine Ondae i Ue nahi Dokongko a laro angi atuu. Umarino angi haweomo lelu. Sine Ondae i Ue nahi Dokongko a laro lelu atuu.

¹² Umarino lelu, haweomo api. Sine Ondae i Ue nahi Dokongko a laro api atuu. Umarino api atuu haweomo uni mepuuri anu me'ara-arai.

¹³ Mansano rumongeo i Elia, itutuwiakono lemba meloe rupano, ka i'amba meluarako ka mentade a mpewowano kunepo atuu. Haweomo suara ndi onae, kanandio, ”Hapa ke inanggamu i ndi'ai, hei Elia?”

¹⁴ Sangkino, ”Tedoa aku me'o'osu mo'angga ndi Omiu Ue, Ue Alano luwuakoano, hangano to Isaraeli mebintao pedandia-Miu, mpobangkuo luwuno meda pontunua pesomba ndi Omiu ka mpepateako ira ponai luwuno nabi-Miu. Butu ongkue asa-asaku anu da tuwu ka ondae mpo'ungke sala ira mpepate aku.”

¹⁵ Mepau Ira i Ue ndi onae, ”Lakomo, pekulemo a nsalamu lumako i pada one Damasi. Sahawemu i ra'ai asalakono kau urapio i Hasaeli gagi mokoledo to Arami.

¹⁶ Omue asalakono umurapio mbo'u i Yehu ana ueno i Nimisi gagi mokoledo to Isaraeli, ka i Elisa, anano i Sapati inso i Abeli-Mehola, gagi nabi umeuko.

¹⁷ Isema anu tola inso a mponaino i Hasaeli, i Yesu anu ta mepateo. Isema anu tola inso a mponaino i Yehu, i Elisa anu ta mepateo.

¹⁸ Sine Aku mobinta pitu nsowu mia i Isaraeli, luwuno mia anu nahi penggolontuu mesombaio ka nahi wowooo i Ba'ala.”

I Elisa tumondao i Elia

¹⁹ I Elia lumako inso i ra'ai ka itepohaweakono i Elisa anano i Sapati anu kontongaano mompadekoako hopulu ka orua pasa sapi. I Elisa i bungkuno pasano sapi anu kohopulu ka orua. Mansano telalo umpeda ndi onae, i Elia metendeakono lemba meloeno ndi onae.

²⁰ Ka i'amba i Elisa bintao sapino atuu ka ipelulu tumondao i Elia, ipotae, ”I'eheakunemo ari woo-woo ira amaku ka ineku, ka ku'amba tumonda komiu.” Sumangki i Elia, ”Lakomo, ka u'amba mekule hangano hapa anu kuweweuomo ndi omue.”

²¹ Mepokuleomo i Elisa bintao i Elia. I'alao sapi asa pasa atuu, isumbeleo, ka bauno inahuo, ka padekono sapi atuu gagi keu ponahu. Bauno atuu iweeako ira luwuno miano ka do'amba pongkaa. Umarino atuu lumakoomo tumondao i Elia ka mekakaakono.