1 Mokole 18 - Wunta Mempori

I Obaja, pegawaino i Ahabi, tepohaweakono i Elia

¹ Tehine umarino atuu, haweomo pau-Do i Ue ndi Elia i larono ta'u anu ko'otolu, ”Lakomo, pepopokita ndi Ahabi, hangano Akumo mompotii usa i wawontolino.”

² Ka i'amba lumako i Elia mepopokita ndi Ahabi. Tempo atuu mokoninggoa mongkokongiri mbo'u i Samaria.

³ I Ahabi moboio i Obaja anu gagi petewawa langkanae. I Obaja atuu asa mia anu mentee ntu'u dumoitoako Ira i Ue.

⁴ I tempono i Isebeli mepate ira nabi-Do i Ue, i Obaja umala ira asa etu mia nabi ka iwuni ira i larono ngkunepo, asa mpo'ianga lima pulu mia, ka ipompatindaako ira kaanga ka inuado.

⁵ Ipotae i Ahabi ndi Obaja, ”Pelempamo sompoo wita andio ranta hawe a luwuno mata uwoi ka korono; bara'ura kita mohawe ewo, ka da domentuwukoa ngara ka bagali, ka siimo toponsumbele maupo te'asa pinotuwu.”

⁶ Ka do'amba metiao wita atuu anu ta lakoado. I Ahabi lumako asa-asano a mpo'ianga anu asa, ka i Obaja lumako a mpo'ianga anu susua.

⁷ Tempono i Obaja a laro pelempaa, itepotowoakono i Elia. Ito'orio, onaemo ka ipenggolontuu mesikeno, ”Omiuke andio ueku Elia?”

⁸ Sumangki i Elia ndi onae, ”Mentee! Lakomo pauakono uemu: I Elia kongko i ndi'ai.”

⁹ Sine sumangki i Obaja, ”Hapamo ke, hala anu wineweuku ka komiu meweengakono atamiu andio ndi Ahabi kai pinepate?

¹⁰ A nee-Do i Ue, Ue Alamiu anu tuwu, menteeano, nahina tongku ke poparentaa anu nahi domelakoio tinenado ueku i Ahabi umungke komiu. Tewala mpotae ira: onae nahi kongko, onaemo kai tuntu ira tongku ke poparentaa atuu mpesumpa nine nahi domehawe komiu.

¹¹ Ka i'amba kanandio-andio motae komiu: Lakomo pauakono uemu: I Elia kongko i ndi'ai.

¹² Bara'ura ta gagi, tempono kulako inso ndi omiu, Penaa-Do i Ue tumande komiu a mpo'ianga anu nahi kuto'orio. Tewala hawe aku pauakono i Ahabi ka nahi hawe komiu, manasaomo ta mepate aku, kahinaano atamiu andio mompu'u da kodei dumoitoako Ira i Ue.

¹³ Nahi ipinauako ke ueku hapa anu kuweweuomo tempono i Isebeli mepate ira nabi-Do i Ue, kana'umpe kuwuni ira asa etu mia nabi-Do i Ue a laro kunepo, lima pulu mia asa bawaa ka mompatindaako ira kaanga ka inuado?

¹⁴ Kanandio-andio, tembio kai potae: Lakomo pauakono uemu: I Elia kongko i ndi'ai! Manasa ipepate aku.”

¹⁵ Sumangki i Elia, ”A nee-Do Ueno luwuakoano anu tuwu, anu kupekakaako Ira, menteeano oleo mbo'u andio aku mopokitao koroiku ndi onae.”

I Ahabi tepohaweakono i Elia

¹⁶ Ka i'amba i Obaja lumako tepohaweakono i Ahabi ka pauakono mongkona atuu ndi onae. I Ahabi mbo'u lumako tepohaweakono i Elia.

¹⁷ Mansano i Ahabi kumitao i Elia, motaeomo, ”Omueke atuu mia anu sumolangi ira to Isaraeli?”

¹⁸ Sumangki i Elia ndi onae, ”Komba ongkue anu sumolangi ira to Isaraeli, tendeano omue ka pe'etumu. Imebintaomo luwuno parenta-Do i Ue ka omue andio utonda iramo Ba'ala.

¹⁹ Kanandio-andio, tena iramo luwuno to Isaraeli mpepumpu ka dontepohaweakune i torukuno Karameli, ka mbo'u pato etu lima pulu nabi Baala ka pato etu nabi Asieri, anu mpongkaa a medano i Isebeli.”

I Elia i torukuno Karameli

²⁰ I Ahabi mo'oliwi pe'oliwi a luwudo to Isaraeli ka pumpu ira luwuno nabi atuu i torukuno Karameli.

²¹ I Elia rumangkuhi ira luwuno palili atuu ka ipotae, ”Hawe te'ipia mbo'u me'orua laro? Tewala Ondae i Ue atuu Ue Ala, imentonda Ira, tewala Baala, imentondao,” Sine palili nahi domesangki maupo te'asa mpali pau.

²² Ka i'amba i Elia motaeako ira palili atuu, ”Asa-asakumo koa nabi-Do i Ue, sekono luwuno nabino Baala atuu pato etu lima pulu mia.

²³ Ipoweeakamimo orua sapi laki. Po'ineeomo dompobiniki asa sapi, mebatu-batuo, menaao i wawono i wawono keu ponahu, sine sidompopolanga api. Ongkue mbo'u aku patindao sapi anu asa, numaao i wawono keu ponahu ka nahi aku mompolanga api.

²⁴ Ka i'amba asalakono impoboio neeno pinesombaimiu ka ongkue aku moboio nee-Do i Ue. Pinesombai anu sumangkiaako api, Ondaemo Ue Ala!” Luwuno palili mesangki, dompotae, ”Moikoomo kanatuu!”

²⁵ Ka i'amba i Elia motaeako ira nabi Ba'ala atuu, ”Impobinikimo asa sapi ka imempatindao se'elu pesombamiu hangano omiu mehadio komiu, umarino atuu impoboiomo neeno pinesombaimiu, sine si mpopolanga api.”

²⁶ Dome'alao sapi anu domewineeako, mempatindao ka mempoboio neeno Ba'ala mompu'u mo'oru hawe ntonga oleo, dompotae, ”Oo Ba'ala, sangki kamimo!” Sine nahina anu sumangki. Mpelonso-lonso ira melimbuo meda pontunua pesomba anu wineweudo.

²⁷ I tempono ntonga oleo i Elia mompu'u umani-ani ira, ipotae: ”Poboiomo temeroku, kombake onae Ue Ala? Bara'ura tekonai mompewowolo, bara'ura hinao orusuano, ke tekonai melakopi. Bara'ura kontongaano moturi, ka asalakono kai winangu.”

²⁸ Mpeboo-booli iramo meroku ka mensosorekiakono ponai ka kansai koroido, kana wela wineweudo, ranta kai nte'i'iti reado,

²⁹ Mansano laloomo ntonga oleo, kana iramo mia pinewinsokino i mosa'o ranta kai haweako tempono mompesombaako pesomba ngkiniwia, sine nahina anu sumangki, nahina merio ira.

³⁰ Motae i Elia a luwuno palili, ”Ime'umpedamo ndi ongkue.” Luwuno palili me'umpeda ndi onae. Ka i'amba mokomoikoo meda pontunua pesomba ndi Ondae i Ue anu hinoaomo.

³¹ I Elia mo'ala hopulu ka orua watu montonda hadiono suku inuleno i Yako, anu ndi onae haweomo pau-Do i Ue: ”Omue konineeako i Isaraeli.”

³² Ipontade ira watu atuu gagi meda pontunua pesomba a nee-Do i Ue ka i limbuno meda pontunua pesomba atuu iweweuo pangkoro anu mokompo'ula orua ponsa'u inii.

³³ Ipotudao keu ponahu, ibatu-batuo sapi atuu ka inaao i wawono keu atuu.

³⁴ Umarino atuu ipotae, ”Ime'ihiioakonomo uwoi tebuke opaa takea, imentawao a wawono pesomba tinunu ka keu atuu!” Ka i'amba motae, ”Imeweweuo mbo'u kompenduano.” Domeweweuo kompenduano. Ipotae mbo'u, ”Imeweweuo mbo'u kopentoluno.” Domeweweuomo kopentoluno.

³⁵ Waaomo uwoi lumimbuo meda pontunua pesomba atuu; ka pangkoro atuu bukeakoomo uwoi.

³⁶ Ka i'amba tempono mompesombaako pesomba ngkiniwia, mentadeomo i nabi Elia ka ipotae, ”Oo Ue, Ue Alado i Burahima, i Saki ka i Isaraeli, po'ineeomo kai tino'ori oleo andio nine Omiumo Ue Ala i Isaraeli ka ongkue andio tetenaa-Miu, ka a mpau-Miumo kuweweuo luwuno andio.

³⁷ Isangki akumo oo Ue, Isangki akumo, ka domento'orio tongku andio nine Omiumo Ue Ala, oo Ue, ka Omiumo anu weweuo aroado mpepokule ndi Omiu.”

³⁸ Ka i'amba metiiomo api-Do i Ue kumaano pesombaa tinunu, keu, watu ka wita atuu, sekonopo uwoi a pangkoro pingko isile'io.

³⁹ Kumitao anu gagi atuu, luwuno palili mpenggolontu, ka dompotae, ”Ondae i Ue, Ondaemo Ue Ala! Ondae i Ue, Ondaemo Ue Ala!”

⁴⁰ Motae i Elia ndi ondae, ”Imerako iramo luwu nabi Ba'ala atuu, si mpo'ineeo maupo te'asa mia inso ndi ondae anu tola.” Mansado merinako, iwawa ira i Elia a ngkorono Kisoni ka isumbele ira i ra'ai.

⁴¹ Ka i'amba i Elia motaeakono i Ahabi, ”Lakomo, pongkaamo ka po'inumo, hangano unino marombono usa terongeomo.”

⁴² Ka i'amba i Ahabi lumako kai pongkaa ka mo'inu, sine i Elia mewuatako a punsuno torukuno Karameli. Ka i'amba me'odo a wita ka rupano i olono orua oluntuuno.

⁴³ Umarino atuu ipotaeakono atano, ”Pewuatakomo, pengkitamo te'aro a ntahi.” Mewuatakoomo atano atuu ka ipengkita, ka i'amba motae, ”Nahina hapa-hapa.” Motae i Elia, ”Lako mbo'u tepohona.” Pepintu ipotaeakono i Elia kanatuu.

⁴⁴ A kopepintuno motae atano atuu, ”Kitao, seru kodei asa pelengkae me'umbaako inso a ntahi.” Ka i'amba motae i Elia, ”Lakomo pauakono i Ahabi: Pasaomo karetamu ka petiimo kasi mansa ute'onsoiako usa.”

⁴⁵ Asa mpiniro koa, langi wongi-wongiako seru ka melompiu, ka i'amba metiiomo usa marombo. I Ahabi me'ula a ngkaretano ka ilako i Yisire'eli.

⁴⁶ Sine kae-Do i Ue pabawaio i Elia. Ibooo tongano kai pelulu mese'elungio i Ahabi hawe a nsala te'aro i Yisire'eli.