1 Mokole 17 - Wunta Mempori

I Elia i wiwi ngkorono mo'are Keriti

¹ I Elia, to Tisibe inso i Tisibe-Gilea, motaeakono i Ahabi, ”A nee-Do i Ue anu tuwu, Ue Alado to Isaraeli anu pinekakaakoku, nahi ta hina tontoru ke usa a luwuno ta'u andio, sangkadio ongkue anu pauo.”

² Ka i'amba haweomo pau-Do i Ue ndi onae,

³ ”Lakomo inso i ndi'ai, pelempamo te'aro i sabaano oleo ka pewunimo i wiwi ngkorono mo'are Keriti i sabaano oleo koro Yarade.

⁴ Komo'inu uwoi inso a ngkorono wela mo'are atuu ka manu-manu paa-paa Kuparenta iramo ka dompowawaakomu kaanga i ra'ai.”

⁵ Ka i'amba lumako weweuo menunu saru pau-Do i Ue. Onae lumako ka ipo'ia i wiwi ngkorono mo'are Keriti i sabaano oleo koro Yarade.

⁶ I tempono mo'oru ka ngkiniwia manu-manu paa-paa mpowawa roti ka bau ndi onae ka ipo'inu uwoi inso a ngkorono wela mo'are atuu.

I Elia ka tuwu beine i Sarapati 17:7-24

⁷ Sine umarino ba'opia tempo, korono atuu mo'are, hangano nahi petii usa i wita atuu.

⁸ Ka i'amba haweomo pau-Do i Ue ndi Elia,

⁹ ”Kanandio-andio lakomo i Sarapati i wita Sidoni ka po'iamo i ra'ai. Kau to'oriomo Kuparentaomo asa mia tuwu beine i ra'ai anu ta moweeakomu kaanga.”

¹⁰ Onaemo kai pelungka lumako i Sarepati. Sahaweno a mpewowa langkai i kota atuu, ikitaomo i ra'ai asa mia tuwu beine kontongaano mopumpu keu ponahu. Ipebooliakono beine atuu, ipotae, ”Po'alaakunemo tedei uwoi a laro takea kaku po'inu.”

¹¹ Mansano lumako beine atuu umalao, onae mebooli mbo'u, ”Po'alaakunemo mbo'u te'asa mpudu roti.”

¹² Sumangki beine atuu, ipotae, ”A nee-Do i Ue, Ue Alamiu anu tuwu, menteeano nahina roti maupo tedei ndi ongkue, sangkadio tarigu asa raku a ngkusi ka lana tedei a mpido. Kanandio-andio kontongaaku mopumpu orua otolu mpole keu ponahu, ka ku'amba mekule weweuakono anaku. Kami kumaano; pingko atuu, kami mate.”

¹³ Sine ipotae i Elia ndi onae, ”Si doito, pekule weweuomo kana nineemu. Sine, poweweuakune se'elu te'asa bunggoli kodei roti inso a ntarigu atuu ka wawaomo ndi ongkue. Umarino atuu ka u'amba moweweu tiamu saru tiano anamu.

¹⁴ Hangano kanandiomo pau-Do i Ue, Ue Alado to Isaraeli: Tarigu a ngkusi atuu nahi ta pingko ka maupo lana a mpido atuu nahi ta makura ranta ka Dopompotii usa i Ue i wawontolino.”

¹⁵ Lumakoomo beine atuu ka iweweuo kana anu pinauno i Elia. Beine atuu ka pe'asa rahano saru i Elia, mpongkaa ira mpiha sompo oleo.

¹⁶ Tarigu a ngkusi atuu nahi pingko ka lana a mpido nahi makura, kana pau-Do i Ue anu pinohawe-Do molalo i Elia.

¹⁷ Ba opia tempo lembuino, ana beineno ue raha atuu mahaki. Hakino tedoa mobea ranta tampula mpenaa.

¹⁸ Ipotae beine atuu ndi Elia, ”Hapake tinoomu ndi ongkue, oo tetenaa-Do Ue Ala? Hapake aiwamu ndi ongkue hawe mopoto'oriakune salaku ka onae pu'uno anaku ka imate?”

¹⁹ Ipotae i Elia ndi onae, ”Peweengakonomo anamu atuu ndi ongkue.” I Elia umalao nana'ote atuu inso a mpekopuino beine atuu ka iwawao a bolongko i wawono peratoano, ka i'amba momboleo nana'ote atuu a mpoturiano.

²⁰ Ka i'amba mebooli ndi Ondae i Ue, ipotae, ”Oo Ue, Ue Alaku! Nde Omiuke Ue anu mompotiiakono masusaa a ntuwu beine andio anu mowee aku peratoa saru mepateo nana'ote andio?”

²¹ Umarino atuu ipe'opoio nana'ote atuu pentolu ka ipebooli ndi Ondae i Ue, ipotae, ”Oo Ue, Ue Alaku! Tewala Ipemoikoo, Ipokuleakonomo penaano nana'ote andio a ngkoroino ka iwali tuwu.”

²² Dorongeo i Ue po'emano i Elia atuu, ka penaano nana'ote atuu mekule a ngkoroino ranta ka iwali tuwu.

²³ I'alao i Elia nana'ote atuu ka ipotiio inso a bolongko i wawono kai wawao a laro raha. Ka i'amba i Elia meweengakono ndi ineno, ipotae, ”Ndio anamu, tuwuomo!”

²⁴ Ipotae beine atuu ndi Elia, ”Kanandio-andio kuto'oriomo nine omiu tetenaa-Do Ue Ala ka pau-Do i Ue anu pinaumiu atuu mentee.”