1 Mokole 16 - Wunta Mempori

¹ Ka i'amba, haweomo pau-Do i Ue ndi Yehu, anano i Hanani umewaio i Baesa, unino,

² ”Omue Kutandekomo inso a pampawu ka Kupotoroko gagi mokoledo bawaa-Ku to Isaraeli, sine omue tuwu kana i Yerobea, ka gagi pu'uno bawaa-Ku Isaraeli mpoweweu ira hala. Ranta ka dompokotesingkao tekuda-Ku hangano halado.

³ Hangano atuu, menteeano Aku rumoahio morina i Baesa ka somborino. Aku weweuo somborimu kana somborino i Yerobea anano i Nebati.

⁴ Isema inso a nsomborino i Baesa anu mate i kota, ta kumaano dahu ka anu mate i tonga mpada ta kumaano manu-manu i laro meene.”

⁵ Anu susuaano teweweuno i Baesa ka anu wineweuno ka mosiano, kombake luwuno atuu teburi a wunta tutuludo luwuno mokole i Isaraeli?

⁶ I Baesa mate ka kinaburu i Tiresa. Ka i'amba i Ela, anano gagi mokole umeuo.

⁷ Kanandiomo molalo i nabi Yehu anano i Hanani, haweomo pau-Do i Ue mongkona i Baesa ka somborino hangano luwuno wineweuno anu mosa'o a pongkita-Do i Ue ka hangano ipepateomo i Yerobea. Onae mokotesingkao tekuda-Do i Ue hangano wineweuno kaeno, ranta kai gagi mengkena kana somborino i Yerobea.

I Ela, mokole i Isaraeli

⁸ A nta'u korua pulu ka onoo poparentaano i Asa, mokole i Yehuda, i Ela anano i Baesa gagi mokoledo to Isaraeli i Tiresa. Onae moparenta orua nta'u tehineno.

⁹ I Simiri, pegawaino anu gagi tadulako sorodadu a entongano sorodadu mpekareta, memoroko ira umewaio. Tempono i Ela mo'inu ranta kai molangu i Tiresa, i rahano i Arisa anu gagi petewawa langkanae i Tiresa,

¹⁰ haweomo i Simiri sumapoio ka ipepateo a nta'u korua pulu ka opitu poparentaano i Asa, mokole i Yehuda. Ka i'amba onae gagi mokole umeuo i Ela.

¹¹ Mansano gagi mokole, ka ipentoro a ngkadera poparentaa, ipepateo luwuno somborino i Baesa. Nahina maupo te'asa tama anu ipo'ineeo tuwu, tewinso pe'etuno ka wali-walino.

¹² Kanandiomo i pingko ira i Simiri luwuno somborino i Baesa, menunu saru pau-Do i Ue anu pinohawe-Do ndi Baesa molalo i nabi Yehu,

¹³ hangano luwuno hala anu wineweuno i Baesa ka i Ela, anano, anu gagi pu'uno to Isaraeli mpoweweu mbo'u hala. Dompokotesingkao tekuda-Do i Ue, Ue Alado to Isaraeli, hangano ue alado anu nahina pengkonaano.

¹⁴ Anu susuaano inso a nteweweuno i Ela ka luwuno anu wineweuno, kombake luwuno atuu teburi a wunta tululudo luwuno mokole i Isaraeli?

I Simiri, mokole i Isaraeli

¹⁵ A nta'u korua pulu ka opitu poparentaano i Asa, mokole i Yehuda, i Simiri gagi mokole. Onae moparenta opitu oleo tehinano i Tiresa. Tempo atuu palili mpekema mengkaduo Gibetoni, witado to Pelisiti.

¹⁶ Palili anu kontongaado mpekema merongeo mia mpotae, ”I Simiri memoroko iramo ka ta mepate ira mbo'u mokole.” Ka i'amba luwudo to Isaraeli mpotoroo i Omiri, tadulako sorodadu, gagi mokoledo to Isaraeli a oleo koa mbo'u atuu, a mpekemaa.

¹⁷ Ka i'amba i Omiri saru luwudo to Isaraeli melako inso i Gibetoni ka domengkaduo Tiresa.

¹⁸ Kumitao kota atuu ipongko'alaomo, mewinsoomo i Simiri i larono bolongko kodei a langkanaedo mokole. Isongkoo langkanaedo mokole ka onaeno mate mo'ai,

¹⁹ hangano luwuno hala anu wineweuno ka moweweu anu mosa'o a pongkita-Do i Ue. Itondao sala ntumuwu ka halano i Yerobea anu gagi pu'uno to Isaraeli mpoweweu mbo'u hala.

²⁰ Anu susuaano inso a nteweweuno i Simiri ka tepo'asa umewa anu wineweuno, kombake luwuno atuu teburi a wunta tutuludo luwuno mokole i Isaraeli.

I Omiri, mokole i Isaraeli

²¹ I tempo atuu to Isaraeli tetia orua. Asa ntia inso a tongku atuu tumondao i Tibani, anano i Gina, ka dompotoroo gagi mokole, ka anu asa ntia mbo'u tumondao i Omiri.

²² Sine palili anu tumondao i Omiri, moroso irapo sekono anu tumondao i Tibani, anano i Gina. Umarino mate i Tibani, i Omiri gagiomo mokole.

²³ A nta'u kotolu pulu ka asa poparentaano i Asa, mokole i Yehuda, i Omiri gagi mokoledo to Isaraeli ka moparenta hopulu ka orua nta'u. I Tiresa onae moparenta onoo nta'u tehineno.

²⁴ Ka i'amba umolio torukuno Samaria inso ndi Semeri orua talenta salaka. Iwanguo kota i torukuno atuu ka ineeakono Samaria, montonda neeno i Semeri, ueno torukuno atuu.

²⁵ I Omiri moweweu anu mosa'o a pongkita-Do i Ue, ka mosa'oopo sekonopo luwuno anu mese'elungio.

²⁶ Itondao luwu sala ntumuwu ka halano i Yerobea anano i Nebati anu poko'ariano to Isaraeli mpoweweu mbo'u hala, ranta mokotesingkao tekuda-Do i Ue, Ue Alado to Isaraeli, hangano luwuno pinesombaido anu nahina tuduno.

²⁷ Anu susuaano inso a nteweweuno i Omiri, anu wineweuno ka mosiano, kombake luwuno teburi a wunta tutuludo luwuno mokole i Isaraeli?

²⁸ I Omiri mate ka kinaburu i Samaria. Ka i'amba i Ahabi, anano gagi mokole umeuo.

I Ahabi mesomba a Baala

²⁹ I Ahabi, anano i Omiri gagi mokole i Isaraeli a nta'u kotolu pulu ka oalu poparentaano i Asa, mokole i Yehuda. I Ahabi anano i Omiri moparenta a nto Isaraeli i Samaria rua pulu ka orua nta'u tehineno.

³⁰ I Ahabi, anano i Omiri moweweu anu mosa'o a pongkita-Do i Ue, ilaloio luwuno anu mese'elungio.

³¹ Napi pesompoo tuwu a laro luwuno halano i Yerobea anano i Nebati, i'alao mbo'u i Isebeli, anano i Etiba'ali, mokoledo to Sidoni, gagi kombiano, ranta kai lako mesomba a Baala ka ipenggolontu melangkaio.

³² Onae mowanguakono i Baala atuu meda pontunua pesomba a raha mpelahumoa Baala anu winanguno i Samaria.

³³ Umarino atuu i Ahabi moweweu tinaha Asera ka moweweu laluaopo sekono atuu, ranta mokotesingkao tekuda-Do i Ue, Ue Alado to Isaraeli, laluaopo inso a luwuno mokoledo to Isaraeli anu mese'elungio.

³⁴ I tempo poparentaano atuu i Hieli to Beteli wali wanguo Yeriko. Ipu'uo wanguano kota atuu saru iporumpiakono penaano i Abirami, anano anu aka, ka ipasao pewowa langkaino saru iporumpiakono penaano i Segubi, anano anu tompasusu, menunu saru pau-Do i Ue anu pinau-Do molalo i Yosua anano i Nuni.