1 Mokole 14 - Wunta Mempori

Pinauno nabi Ahia mongkona somborino i Yerobea

¹ Tempo atuu i Abia, anano i Yerobea mahaki.

² Ka i'amba i Yerobea motaeakono kombiano, ”Pepatindamo! Po'onde-ondemo kana mia susua, kasi domento'oriko mia nine omue kombiano i Yerobea, ka lakomo i Silo. Nde komba i ra'ai ke po'iangano nabi Ahia. Onae anu umari pauo mongkona ongkue, nine ongkue ta gagi mokoledo tongku andio.

³ Wawaomo hopulu roti, kukisi ka siu hoani asa pido ka u'amba lumako ndi onae. Onae ta pauakomu, hapa anu ta gagi saru nana'ote andio.”

⁴ Kombiano i Yerobea weweuo kanandio. Mepatindaomo ka ilako i Silo ka ipewinso a rahano i Ahia. I Ahia nami pongkita mbo'u, matano morawuomo hangano tinuwuno.

⁵ Sine Ondae i Ue mepau Iramo ndi i Ahia, ”Menteeano kombiano i Yerobea ta hawe mesikenoakono ndi omue, mongkona anano, hangano anano atuu kontongaano mahaki. Asalakono kanandio-andio pauakono.” Tempono ipewinso beine atuu iweweuo kana-kana onae mia susua.

⁶ Mansano irongeomo i Ahia unino pelempano beine, anu mewinso a mpewowa, motaeomo, ”Pewinsomo, hei kombiano i Yerobea! Tembio kau po'onde-onde omue mia susua? Tinena aku mohaweo pe'oliwi anu montaso ndi omue.

⁷ Lakomo pauakono i Yerobea, kanandio, ’Kanandiomo pau-Do i Ue, Ue Alado to Isaraeli: Kutandekomo inso i olodo tongku atuu, ka motoroko gagi mokoledo bawaa-Ku Isaraeli.’

⁸ Kukansa-kansaomo poparentaa inso a nsomborino i Daudi, ka meweengakono ndi omue, sine omue nahi kana tetenaa-Ku i Daudi anu mekariao luwuno parenta-Ku ka tumonda Aku a tompaano aroano ka moweweu butu anu mentee a pongkita-Ku.

⁹ Omue moweweukomo anu mosa'o, lansaraopo sekono anu mese'elungiko. Uweweuomo tiamu luwuno pinesombai susua ka luwuno tinaha tinawa, ranta mokotesingkao tekuda-Ku, tendeano upebungkui Akumo.

¹⁰ Onaemo pu'uno, Aku mompotii masukaraa a nsomborino i Yerobea. Aku rumopuo inso ndi Yerobea sompo tama, moiko anu mantande ke anu i totono potorono i Isaraeli. Aku rumoahio somborino i Yerobea kana mia moroahi anu mokoburu ranta kai pingko.

¹¹ Isema inuleno i Yerobea anu mate i kota ta kumaano dahu ka anu mate i tonga mpada ta komaano manu-manu i laro meene, hangano Ondae i Ue mepau Iramo.

¹² Sine omue, pekulemo i rahamu. I tempono upewinso i kota, nana'ote atuu ta mate.

¹³ Luwudo to Isaraeli ira mensabangio ka mengkaburuo. Butu koa onae inuleno i Yerobea anu ta kinaburu, hangano i olodo inuleno i Yerobea, butu ndi onae Dopohawe i Ue, Ue Alado to Isaraeli anu moiko.

¹⁴ Ondae i Ue Ira mompotoro asa mokoledo to Isaraeli anu ta rumopuo somborino i Yerobea oleo andio, ka tempo koa mbo'u andio.

¹⁵ Ka Do'amba i Ue humuku ira to Isaraeli kana gelaga anu bunembua a uwoi ka butasi ira inso a wita moiko andio anu Doweeako ira uempu'udo. Ondae Ira weweuo ka dontetia-tia i asatowano koro Eparata, hangano mpoweweu iramo luwuno karuno lahumoado, ranta mokotesingkao tekuda-Do i Ue.

¹⁶ To Isaraeli iramo mempinebungkui, hangano luwuno hala anu iweweuomo i Yerobea ka anu mokontehala ira to Isaraeli.”

¹⁷ Umarino atuu kombiano i Yerobea melungka lumako, kai hawe i Tiresa. I tempono ilinggeio arono pewowano raha, nana'ote atuu mate.

¹⁸ Luwudo to Isaraeli mengkaburuo ka mensabangio, menunu saru pau-Do i Ue anu pinohawe-Do molalo tetenaa-Do i nabi Ahia.

¹⁹ Toreano inso a nteweweuno i Yerobea, kana'umpe ipe'iwali ka kana'umpe ipoparenta, menteeano teburi a wunta tutuludo luwuno mokole i Isaraeli.

²⁰ I Yerobea moparenta rua pulu ka orua nta'u tehineno, ka i'amba mohawe penaa-naaano saru uempu'uno. Ka i'amba i Nadabi, anano gagi mokole umeuo.

Poweweudo to Yehuda anu mokoburu tempono i Rehabea

²¹ Onaemo i Rehabea, anano i Salomo, moparenta i Yehuda. Tinuwuno i Rehabea pato pulu ka asa nta'u tempono igagi mokole, ka hopulu ka opitu nta'u tehineno ipopareta i Yerusale, kota anu bininiki-Do i Ue inso a luwuno sukudo to Isaraeli gagi po'ianga Donaao nee-Do. Neeno ineno, i Na'ama, asa beine to Amoni.

²² To Yehuda mpoweweu anu mosa'o a pongkita-Do i Ue. Mpoweweu ira hala anu mokomahakiako Ira aroa-Do, lumaloio luwuno anu wineweudo uempu'udo.

²³ Ondae mbo'u mpowangu hadio pongku wita pesombaa saru hadio tugu ka hadio karuno pelahumoaa i wawono sompo pongku wita anu mantande ka i totono sompo keu anu marombo.

²⁴ Tendeano hinao po'iangga pebelesua i wita atuu. Domeweweuo luwuno anu mokoburu, kana luwudo tongku anu Dosaari iramo i Ue inso a nto Isaraeli.

²⁵ A nta'u ko'olima poparentano i mokole Rehabea, i Sisaki, mokoledo to Masiri, aiwa sumapoio Yerusale.

²⁶ Irontuo arataa anu ninaa a raha-Do i Ue ka arataa a rahado mokole; luwuno irontuo. Irontuo mbo'u luwuno kanta wulaa anu wineweuno i Salomo.

²⁷ Gagi euno, i mokole Rehabea moweweu luwuno kanta mala anu ipe'ala-alaakono a luwuno petewawado puu mpodagai pewowa langkanaedo mokole.

²⁸ Sompo ipewinso mokole i raha-Do i Ue, luwuno puu mpodagai mewawao luwuno kanta atuu. Ka do'amba mpokuleo a bolongko podagaiado luwuno puu mpodagai.

²⁹ Anu susuano inso a nteweweuno i Rehabea ka luwuno anu wineweuno, kombake luwuno atuu teburi a wunta tutuludo luwuno mokole i Yehuda.

³⁰ Peteaa i olodo i Rehabea ka i Yerobea nahi hori menaa-naa.

³¹ I Rehabea mate. Onae kinaburu i horino uempu'uno i kota Daudi. Neeno ineno i Na'ama, asa beine to Amoni. Ka i'amba i Abiama anano i Rehabea, gagi mokole umeuo.