1 Mokole 13 - Wunta Mempori

I Yerobea ka tetenaa-Do Ue Ala inso i Yehuda

¹ Tempono i Yerobea mentade umpeda a meda pontunua pesomba ta montunu pesomba, hangano parenta-Do i Ue hawe asa nabi-Do Ue Ala inso i Yehuda lumako i Beteli.

² Ka i'amba hangano mpetena-Do i Ue onae mebooli a meda pontunua pesomba atuu, ipotae, ”Hei meda pontunua pesomba, hei meda pontunua pesomba! Kanandiomo pau-Do i Ue: Menteeano asa nana'ote ta pine'anaako a inuleno i Daudi, i Yosia neeno. I wawomu onae anu ta sumumbele ira sando mpesomba pongku wita pesombaa anu mpotunu pesomba i wawomu, luwuno mbo'u wukudo mia ta tinunu i wawomu”

³ A oleo mbo'u atuu onae mompowee aasa petondoni kinohali-haliako, ipotae, ”Ndiomo petondoni kinohali-haliako, anu Dopauomo i Ue: Menteeano meda pontunua pesomba atuu ta tepeha ka awu anu i wawono ta te'uwu.”

⁴ Mansano rumongeo mokole pauno nabi anu pinebooliakono a meda pontunua pesomba i Beteli, itasiakono kaeno inso a mpuu meda pontunua pesomba ka ipotae, ”Imerakoomo!” Sine kaeno anu tinasiakono tumisoo nabi atuu gagi tiido, ranta nahi pokompokuleo mbo'u.

⁵ Meda pontunua pesomba atuu, tepeha ka awuno te'uwu inso a meda mpotunua pesomba atuu menunu saru petondoni kinohali-haliako anu pinoweeno nabi atuu a parenta-Do i Ue.

⁶ Ka i'amba i mokole motaeakono nabi atuu, ”Po'emamo pompehohawa-Do Ue, Ue Alamu ka pekakaiakunemo, ka kupokompokuleo mbo'u kaeku.” Nabi atuu mo'emaomo pompehohawa-Do i Ue, ka i'amba kaeno mokole atuu ipokompokuleomo kana se'eluno.

⁷ Ka i'amba mokole motaeakono nabi atuu, ”Aiwamo ka tolako irahaku, pokonsanaao koroimu ka hinao pompowee anu aku weeakomu.”

⁸ Sine motae nabi atuu ndi mokole, ”Maupo entongano inso i langkanaemiu iwee aku, nahi aku lumako merongaa komiu ka nahi aku mongkaa roti ke mo'inu uwoi a mpo'ianga atuu.

⁹ Hangano kanandiomo Doparenta aku i Ue: Si pongkaa roti ke mo'inu uwoi ka si pekule telalo a nsala anu utondaomo atuu.”

¹⁰ Ka i'amba lumako telalo a nsala susua ka nahi pekule telalo a nsala anu linalono i'aiwa i Beteli.

¹¹ Asa nabi mota'u mo'ia i Beteli. Mehawe ira anano tumutuluakono luwuno anu wineweuno nabi a oleo atuu i Beteli ka pau anu pinohaweno ndi ondae mokole, domentutuluo mbo'u ndi amado.

¹² Ka i'amba mesikeno amado, ”Sala isuake anu tinondano?” Ka do'amba anano mentisoakono pesalaano tetenaa-Do Ue Ala anu hawe inso i Yehuda atuu. Ka i'amba mesikeno amado, ”Inso a nsala isuake ilako?” Ka do'amba anano mentisoakono sala anu tinondano tetenaa-Do Ue Ala anu hawe inso i Yehuda atuu.

¹³ Ipotaeako ira anano, ”Imelapiakune kalide!” Mansano umari domelampio kalide, ipesawikio.

¹⁴ Onae lumako tumonda lembuio tetenaa-Do Ue atuu ka ihaweo kontongaano mentoro i totono asa keu tarabanti. Isikenoo, ”Omueke tetenaa-Do Ue Ala anu hawe inso i Yehuda?” Isangkio, ”Humbee, ongkuemo.”

¹⁵ Ipotaeakono, ”Aiwamo ka tolako i raha mongkaa roti.”

¹⁶ Sine isangkio, ”Nahi aku tumonda komiu ka nahi aku tetoro. Ongkue mbo'u nahi aku mongkaa roti ke mo'inu uwoi saru omue a mpo'ianga atuu.

¹⁷ Hangano, iparenta akumo pau-Do i Ue: Si pongkaa roti ke mo'inu uwoi i ra'ai. Si pekule telalo a nsala anu umarimo utondao atuu.”

¹⁸ Ka i'amba motae nabi mota'u atuu ndi onae, ”Ongkue mbo'u asa nabi kana omue. A mpetena-Do i Ue, asa Mala'eka mepau ndi ongkue: Wawaomo kai pekule saru omue i rahamu, ka ipongkaa roti ka mo'inu uwoi.” Kanandiomo igaupio.

¹⁹ Ka i'amba mia atuu lumako merongaakono, kai pongkaa roti ka mo'inu uwoi i rahano.

²⁰ Kontongaado mentoro i arono meda, haweomo pau-Do i Ue a nabi anu wawao mekule.

²¹ Ipebooliakono tetenaa-Do Ue Ala anu hawe inso i Yehuda, ”Kanandiomo pau-Do i Ue: Hangano u'ewaiomo pau-Do i Ue, ka nahi utondao luwuno parenta anu Doweeakomu i Ue, Ue Alamu,

²² sine mekule ka mongkaa roti saru mo'inu uwoi a mpo'ianga andio, ka hinaano Ondae i Ue umari iramo pauakomu: Si pongkaa roti ke mo'inu uwoi, onaemo pu'uno wata ngkoroimu nahi ta mewinso a ngkaburudo uempu'umu.”

²³ Umarino mia atuu mongkaa roti ka mo'inu uwoi, linapiomo kalideno.

²⁴ Mia atuu lumako ka i tonga nsala asa singa merangkamio ka ipepateo. Wata ngkoroino tepombole a nsala, sekono kalide atuu mentade i horino ka singa mbo'u atuu mentade i horino wata ngkoroi atuu.

²⁵ Luwuno mia anu telalo, mengkitao wata ngkoroi anu tepombole a ntonga nsala ka singa anu mentade i horino. Ka do'amba melako mentutuluo i kota po'iangano nabi mota'u atuu.

²⁶ Mansano rumongeo nabi anu popandeio ka ipekule inso a nsalano, anu gagi atuu, ipotae, ”Onaemo tetenaa-Do Ue Ala anu umewaio petena-Do i Ue. Ondae i Ue meweengakono a nsinga, ka iberi-berio ka mepateo menunu saru pau-Do i Ue anu pinau-Do ndi onae.”

²⁷ Ka i'amba motaeako ira anano, ”Imelapiakunemo kalide.” Onaemo ka domelampio.

²⁸ Ka i'amba lumako ka ihaweo wata ngkoroino mia atuu anu tepombole a nsala, sekono kalide ka singa mentade i horino wata ngkoroi atuu. Singa atuu nahi kaano wata ngkoroi atuu ka nahi beri-berio kalide atuu.

²⁹ Nabi atuu tumandeo wata ngkoroino tetenaa-Do Ue Ala atuu, inaao i wawono kalide, ka iwawao mekule i kotano onaeno kai sinabangi ka kinaburu.

³⁰ Wata ngkoroino mia atuu i kaburuo a ngkaburuno onaeno ka domensabangio, ”Waintokopo, pepaekompoku!”

³¹ Umarino kumaburuo, ipotaeako ira anano, ”Tewala mate aku, imengkaburu aku a laro ngkaburuno nabi atuu, imenaao wukuku i horino wukuno.

³² Hangano pau anu ipebooliakonomo a mperenta-Do i Ue mongkona meda pontunua pesomba anu i Beteli atuu ka a luwuno raha mpelahumoaa i pongku wita pesombaa a luwuno kota Samaria manasa ta gagi.”

³³ Umarino anu gagi mbo'u andio, i Yerobea nahi tebali inso a ntuwuno anu mosa'o atuu. Ipotoro ira mbo'u sando mpesomba inso a mpalili tiano luwuno pongku wita pesombaa. Isemamo koa anu behe ironsoo gagi sando mpesomba i luwuno pongku wita pesombaa.

³⁴ Mongkona atuu gagi halado somborino i Yerobea, ranta ka domerinopu inso i wawontolino.