1 Mokole 10 - Wunta Mempori

Pesinggerahano mokole beine wita Seba

¹ Mansano rumongeo mokole beine i wita Seba teleleno i Salomo, hangano nee-Do i Ue, onae aiwa ta umarahakono ka moweeakono pesikeno anu motungko luwu.

² Onae aiwa i Yerusale saru sorodadu hadio ntu'u anu mpetonda dumagaio, saru hadio unta anu mpowawa rampa-rampa, wulaa anu hadio ntu'u ka watu paramata anu motungko olino. Mansano hawe ndi Salomo, ipauakono luwu anu kongko i laro aroano.

³ I Salomo sumangkio luwuno pesikenono. Nahina maupo hapamokoa anu tewuni ndi ondae mokole anu nahi dopokosangkio.

⁴ Mansano kumitao mokole beine inso i Seba luwuno pandeno i Salomo ka raha anu iwanguomo,

⁵ kaanga a medano, po'atorado pentoroa luwuno pegawaino, pompekaakodo luwuno atano ka sangkado, luwuno puu mpo'atorano inua ka pesomba tinunu anu wela pinesombaakono i raha-Do i Ue, kohali-haliomo.

⁶ Ipotae ndi ondae mokole, ”Menteeomo lele anu rinongeku i witaku mongkona omiu ka pandemiu,

⁷ sine nahi kupe'ala-alao luwuno pinau atuu, ranta ka ku'aiwa ka kumitaakono mataku ongkueku. Menteeano, maupo entongano, napi kupinauako, pandemiu ka manangaimiu, olaiopo sekono anu rinongeku.

⁸ Meme'ura iramo kombiamiu! Meme'ura iramo pegawaimiu anu wela mekakaakomiu ka sumakosiio pandemiu!

⁹ Unde-unde Iramo i Ue, Ue Alamiu anu biniki komiu ka motoro komiu a ngkadera poparentaa i Isaraeli! Hangano Dopehohawao i Ue Isaraeli ranta nahina tampulaano, Dopotorokomiu gagi mokole kai weweuo moleoa ka menteea.”

¹⁰ Umarino atuu iweeakono mokole Salomo asa etu ka rua pulu talenta wulaa, rampa-rampa anu hadio ntu'u ka watu paramata anu motungko olino. Nami hori mbo'u hawe rampa-rampa kanatuu hadiono kana anu iweeakono mokole beine inso i Seba ndi mokole Salomo.

¹¹ Luwuno mbo'u kapalano i Hirami anu mowawa wulaa inso i Opiri, mowawa keu cendana anu hadio ntu'u ka watu paramata anu motungko olino.

¹² Inso a ngkeu cendana atuu ondae mokole weweuo taralino raha-Do i Ue ka langkanaeno mokole, ka iweweuo mbo'u katapi ka gambusu tiado luwuno puu mpenani. Keu cendana kanatuu nami hawe ka tengkita mbo'u hawe oleo andio.

¹³ I mokole Salomo moweeakono mokole beine luwuno anu ineheno ka inemano, sangkadio anu iweeakonomo kana po'eheno mokole Salomo. Ka i'amba melungka mekule i witano saru luwuno pegawaino.

Pompolino i Salomo anu hadio ntu'u 10:14-29

¹⁴ Mobeano wulaa anu mewinawa ndi Salomo i larono asa nta'u, onaemo nomo etu nomo pulu ka onoo talenta,

¹⁵ napi tedoa saru anu hinawe inso a mia mpebalu-balu ka mia mpo'asa-asa saru inso a luwuno mokoledo to Ara ka anu mempabawa i wita atuu.

¹⁶ I mokole Salomo moweweu rua etu kanta langkai inso a wulaa pinalu. Nomo etu sikala wulaa ipakeo tiano sompo kanta langkai atuu.

¹⁷ Iweweuo mbo'u tolu etu kanta kodei inso a wulaa pinalu; otolu mina wulaa pinakeno tiano sompo kanta kodei. Ka do'amba mokole numaao luwuno atuu i larono raha langkai ”Tobu Libano.”

¹⁸ I mokole moweweu kadera poparentaa anu langkai inso a ntindu ka i'apiiakono wulaa motu'a.

¹⁹ Kadera poparentaa atuu hinao onoo ana ensano, anu i wawono ntu'u i bungkuno kadera poparentaa atuu bonggoli tadeno. A orua horino pentoroa hinao pontambea kae ka orua singa mentade i horino pontambea kae atuu.

²⁰ Hopulu ka orua singa mentade i wawono onoo ana ensa atuu, mompombali. Napi hori wineweu anu kanatuu maupo a poparentaa isua.

²¹ Luwuno parewa po'inuado mokole Salomo wineweu inso a wulaa ka luwuno sangka a raha langkai ”Tobu Libano” atuu inso a wulaa mpena; nahina anu inso a nsalaka, hangano salaka rineke nahina olino i tempono poparentaano i Salomo.

²² Hangano, a ntahi ondae mokole hadio kapalado, kapala Tarasisi anu mpebawaa saru luwuno kapalano i Hirami. Pohona i larono otolu nta'u, mehawe ira kapala Tarisisi mpowawa wulaa, salaka ka tindu, saru bange ka manu-manu mera.

²³ I mokole Salomo lumaloio pompoli ka pandedo luwuno mokole i tolino.

²⁴ Asa wawontolino mposongka ira ntepohaweakono i Salomo, ira merongeo ondaedo pande anu Doweeakonomo Ue Ala i laro aroano.

²⁵ Singge mia aiwa mowawa pesombano, luwuno parewa salaka ka wulaa, sangka, parewa mpetea, rampa-rampa, ngara ka bagali. Kanandiomo sompo-sompo ta'u.

²⁶ I Salomo mopumpu mbo'u kareta ka sorodadu mpengara, ranta kai hina asa nsowu pato etu kareta ka hopulu ka orua nsowu sorodadu mpengara. Luwuno meninaa a luwuno kota ponaapa kareta ka umpeda mokole i Yerusale.

²⁷ I Yerusale ondae mokole kumitao salaka kana koa watu tuduno ka keu arasi kana hadiono keu ara anu tuwu i Sepela.

²⁸ Ngara tiano i Salomo winawa inso i Misiraimi ka Kewe. Puu mpebalu-baludo mokole me'olio inso i Kewe montonda pe'olia tempo atuu.

²⁹ Asa kareta anu winawa inso i Misiraimi, olino nomo etu sikala salaka ka asa ngara, asa etu lima pulu sikala. Kanatuu koa mbo'u molalo puu mpebalu-baludo mokole, luwuno atuu inasa a luwuno mokoledo to Heti ka luwuno mokoledo to Arami.