1 KORINTI 9 - Wunta Mempori

Pabawa ka lano anggaado tinena 9:1-27

¹ Kombake ongkue tinena? Kombake ongkue mia malua? Kombake kukita Iramo i Yesu, Ueto? Kombake omiu wuano inanggaku ndi Ondae i Ue?

² Maupo a mia susua ongkue komba tinena, sine ndi omiu ongkue tinena. Hangano tuwumiu ndi Ondae i Ue onaemo tondonino ongkue tinena.

³ Ndiomo pe'alaakoku ndi ondae anu mentata aku.

⁴ Nahi moikoke ba kipongkaa ka mo'inu?

⁵ Nahinake pabawamami ka kipowawa beinemami to Kerisituu a laro pelempaamami, kana tinena mehano ka pepaekompo-Do i Ue ka i Kepa?

⁶ Ke butu koa ongkueke ka i Baranaba anu nahina pabawa ka kipinokompenaa-naa inso a mpo'anggano kaemami?

⁷ Isemake anu horio metonda a laro mpeteaa tumembio luwu kinereno? Isemake anu mompahoakono lere anggoro ka nahi kaano wuano? Ke isemake anu mompakambi bawaano bimba ka nahi po'inu susuno bimba atuu?

⁸ Hapa anu pinauku andio komba butu pinewowolono mia. Kombake songka Taura motae mbo'u kanandio?

⁹ Hangano a songkano i Musa hinao teburi, ”Si kapuo ngusuno sapi anu kontongaano monsesa!” Sapike anu pinerio-Do Ue Ala?

¹⁰ Ke ontaeke anu tinoo-Do? Humbee, tiatomo ka ibinuri mongkona andio, onaemo mompadeko asalakono mompadeko a laro pomperorohia ka monsesa asalakono monsesa a laro pomperorohia ka ipohawe tiano.

¹¹ Gaagi, tewala kiporawoakomiumo inii rohani, laloomo lahike, ba kipohawe pompowee tolino inso ndi omiu?

¹² Tewala mia susua hinao pohawado pomperorohi anu kanatuu inso ndi omiu, kombake omami hinao pabawa anu lalu langkai? Sine komba kipakeo pabawa atuu. Tendeano kitembio luwuakoano, ka si kipompokohina pontombolei a pompalelea Lele Mawongkoa-Do i Kerisituu.

¹³ Nahi imento'orioke, nine ondae anu mpompekakaako a mpo'ianga mempori mpohawe pepotuwudo inso a mpo'ianga mempori atuu ka nine ondae anu mpompekakaako meda pontunua pesomba, mpohawe tiado inso a meda pontunua pesomba atuu?

¹⁴ Kanatuu koa mbo'u Ondae i Ue Dopakosiomo, nine ondae anu mpompalele Lele Mawongkoa, asalakono mentuwu inso a pompalelea Lele Mawongkoa atuu.

¹⁵ Sine nahi kuhori mompake maupo te'asa inso a luwuno pabawa atuu. Kuburio luwuno andio, komba ka kuwineweu mbo'u kanandio. Hangano lalukupo mate sekonopo moweweu kanatuu! Mentee ntu'u, anu kupo'undeakono nahina moko'onini maupo isemamo koa!

¹⁶ Hangano tewala kupaleleo Lele Mawongkoa, nahina pepu'uano aku mompelangka-langkai. Hangano atuu lano anggaaku. Masola akumo, tewala nahi kupaleleo Lele Mawongkoa.

¹⁷ Tewala mansa kuweweuo montonda po'eheku ongkueku, lano tekona kupontarima tambo. Sine hangano kuweweuo komba montonda po'eheku ongkueku, pompalelea atuu onaemo anggaa anu kupinopotembiako.

¹⁸ Tewala kanandio hapake tamboku? Tamboku onaemo andio: nine moiko kupompalele Lele Mawongkoa nahina tambo, ka nine nahi kupompake pabawaku kana pompalele Lele Mawongkoa.

¹⁹ Maupo ongkue komba atado luwuno mia, kupokogagio koroiku atado luwuno mia, ka ihadio koa mia hinaweku.

²⁰ Kanandiomo a nto Yahudi gagi akumo kana to Yahudi, ka kupongko'ala ira koa to Yahudi. A mia anu mentuwu mpontonda songka Taura gagi akumo kana mia anu mentuwu mpontonda songka Taura, maupo kutuwu komba montonda songka Taura, ka kupongko'ala ira koa anu mentuwu mpotonda songka Taura.

²¹ A mia anu mentuwu komba mpontonda songka Taura gagi akumo kana mia anu mentuwu komba mpontonda songka Taura, maupo kutuwu komba mebungkuio songka-Do Ue Ala, hangano kutuwu montonda songka-Do i Kerisituu, ka kupongko'ala ira koa anu mentuwu komba mpotonda songka Taura.

²² A mia anu memolema gagi akumo kana mia anu memolema, ka kupokokadudui ira koa anu memolema. A luwuno mia gagi akumo luwuakoano ka ihina koa kupompoko'ala ba te'opia mia inso i olodo.

²³ Luwuakoano andio kuweweuo hangano Lele Mawongkoa, ka kupohawe tia i larono.

²⁴ Nahi imento'orioke, nine a mpetandia luwuno anu ntewinso mpetonda mpelulu, sine asa mia koa anu mohawe tambo? Onaemo pu'uno impelulumo kanatuu, ranta ka imehaweo!

²⁵ Sompo-sompo mia anu metonda a mpetandia, ka ipokompeteao koroino a luwuakoano. Domeweweuo kanandio ka dompohawe ramba-ramba ulu anu ta tampula, sine ontae ka tompohawe ramba-ramba ulu anu nahina tampulaano.

²⁶ Onaemo pu'uno nahi kupelulu tewala nahina tinunggaiku ka ongkue komba puu mpetidu anu mondeenomo koa metunduhi.

²⁷ Sine kupokoleleoo koroiku ka pabawaio luwuno, ka umariku paleleako ira mia susua Lele Mawongkoa, ka ongkue isa'a nahi tinarima.