1 KORINTI 6 - Wunta Mempori

Mo'ungke moleoa a mia anu nahi dompompe'ala-ala 6:1-11

¹ Nde hinaoke te'asa mia i olomiu, anu tewala teposisalaakono mia susua, mosia mo'ungke moleoa a mia anu nahi domementee, ka komba a mia anu memempori?

² Ke nahi imento'orioke, nine mia memempori ira mebitarao wawontolino? Ka tewala pobitarano wawontolino kongko a ngkaemiu, nahi imempolioke mebitarao kara-kara anu nahina pengkonaano?

³ Nahi imento'orioke, nine kita mebitara ira mala'eka? Gaagi tamoako mongkona tumuwuto sompo-sompo oleo.

⁴ Maupo kanandio, tewala asalakono komiu mebitarao mongkona pepotuwu, impeweengakonoke ndi ondae anu nahi domentinudu a laro bawaa?

⁵ Ka kupauo mongkona andio ka imemokoko'ii. Nahinake te'asa mia i olomiu anu monto'ori, anu polio bitarao kara-karado mpepaekompono?

⁶ Hinaoke pepaekompo anu aasa mo'ungke moleoa a mpepaekompo anu susua, ka tendeano a mia anu nahi dompompe'ala-ala?

⁷ Da hinao koa kara-kara i olomiu anu asa mia ka anu susua mengkaaomo mentenangi komiu. Tembio ka nahi lalumiupo memarasaiako molengkua? Tembio ka nahi lalumiupo memarugi?

⁸ Sine omiu isa'a mpoweweu molengku ka omiu isa'a anu mpopokorugi, ka anu kanatuu imeweweuo a mpepaekompomiu.

⁹ Ke nahi imento'orioke, nine mia anu nahi domemoleo nahi ira mpohawe tia a laro Poparentaa-Do Ue Ala? Si ntepopo'oo! Mia mebelesu, mpesomba a lahumoa, mia mpososabo, salabai, tama mewowaliako tama,

¹⁰ anu mponako, mia memodoko, mara molangu, anu momposebe ka anu mompopo'oo nahi ira mpohawe tia a laro Poparentaa-Do Ue Ala.

¹¹ Ka ba opia mia i olomiu kanandiomo i ndi'upua. Sine impeweengakonomo koroimiu ka iwino'ohi, mempinokomempori komiumo, mempinokomentee komiumo a nee-Do Ue Yesu Kerisituu ka a Mpenaa-Do Ue Alato.

Patudu mongkona pebelesua 6:12-20

¹² Luwuakoano nahina ku'inontoako, sine komba luwuno mentudu. Luwuakoano nahina ku'inontoako, sine nahi kupo'ineeo koroiku ipe'atao hapamo koa.

¹³ Kaanga onaemo tiano kompo ka kompo tiano kaanga: sine oruano Ira umoninio Ue Ala. Sine koroi komba tiano pebelesua, tendeano tia-Do i Ue, ka Ondae i Ue tiano koroi.

¹⁴ Ondae Ue Ala anu wangu Ira i Ue, Ira wangu kita mbo'u hangano pabawa-Do.

¹⁵ Nahi imento'orioke, nine koroimiu onaemo parewa ngkoroi-Do i Kerisituu? Aku umalaoke parewa ngkoroi-Do i Kerisituu ka kupeweengakono a mpebelesua? Poore ntu'u naahi!

¹⁶ Ke nahi imento'orioke, nine isema anu mompe'asaako beine belesu, gagi me'asa ngkoroiakono? Hangano, kanandiomo pauno Wunta Mempori, ”Oruano ira gagi me'asa ihi.”

¹⁷ Sine isema anu me'asaako Ira i Ue, gagi me'asa mpenaako Ira.

¹⁸ Impoko'olaio koroimiu inso a mpebelesua! Sompo hala susua anu wineweuno mia, komba gagi a ngkoroino. Sine mia anu mebelesu mokontehalao koroino onaeno.

¹⁹ Ke nahi imento'orioke, nine koroimiu onaemo raha-Do Penaa Mempori anu mo'ia i laromiu, Penaa Mempori anu hinawemiu inso ndi Ondae Ue Ala, — ka nine omiu komba omiu isa'a mpe'ueo?

²⁰ Hangano me'inoli komiumo ka olino lesoomo inowahi: Onaemo pu'uno ka impelangkaiako Ira Ue Ala koroimiu!