1 KORINTI 5 - Wunta Mempori

Hala a laro bawaa 5:1-13

¹ Lano domerongeo mia, nine hinao pebelesua i olomiu, ka pebelesua anu kanatuu, kana komba hina hinawe maupo i olodo tongku anu nahi domento'ori Ira Ue Ala, onaemo nine hinao mia anu tuwu saru kombiano amano.

² Maupo kanandio mpompelangka-langkai komiu. Kombake tekonaopo impompemasusa ka mempoko'oalaio mia anu moweweu kanatuu inso i tonga-tongamiu?

³ Hangano ongkue, maupo montonda koroi nahi kukongko, sine montonda rohani kongko aku, ongkue – mengkena kana kongko aku – kupakosiakonomo hukuno, anu moweweuomo gau anu kanatuu.

⁴ Ba tewala ntepumpu kita i larono penaa, mperonga-ronga komiu saru ongkue, a mpabawa-Do i Yesu, Ueto,

⁵ mia atuu asalakono tompeweengakono ndi Mosa'o a nee-Do Ue Yesu, ranta ka imate koroino, ka ikinadudui penaano a oleo-Do i Ue.

⁶ Mawongkomiu nahi moiko. Nahi imento'orioke, nine ragi tedei sumoopio luwuno tarigu sinalo?

⁷ Imentadiomo ragi anu tehineomo atuu, ka imegagi tarigu sinalo anu wo'ohu, hangano omiu lano nahi mperagi. Hangano ana bimba Pasato mbo'u sinumbele Iramo, onaemo Ondae i Kerisituu.

⁸ Onaemo pu'uno aiwamo ka tompogawe, komba saru ragi anu tehineomo, komba mbo'u saru ragi mokoburua ka mosa'oa, sine saru roti anu nahi peragi, onaemo molinoa ka menteea.

⁹ A wuntaku kuburiakomiumo, ka si mpewali-waliako ira mia mebelesu.

¹⁰ Anu tinooku komba saru luwuno mia mebelesu i wawontolino andio ke saru luwuno mia memodoko ka mpopopo'oo ke saru luwuno mia mpopesombai lahumoa, hangano tewala kanandio asalakono imebintao wawontolino andio.

¹¹ Sine anu kuburiakomiu onaemo, ka si mpewali-waliako mia, anu maupo ipauo koroino pepaekompo, onaemo mia belesu, modoko, mompesombai lahumoa, puu pomposebe, wela molangu ke wela mompopo'oo; saru mia anu kanandio si koa ntu'u impe'asaako ira mpongkaa.

¹² Hangano hapake pabawaku bitara ira, anu komba bawaa? Kombake anu binitaramiu butu ondae anu i larono bawaa?

¹³ Ondae anu komba bawaa Ondae Ue Ala anu bitara ira. Imensaari ira mia anu mpoweweu mosa'o i olomiu.